Azərbaycanda ayaq, əl, dişlərimizi sığorta elətdirə bilərik?

Dünyanın bir çox ölkəsində məşhurlar bədənlərinin müxtəlif yerlərini çox böyük miqdar məbləğ qarşılığında sığorta elətdirirlər. Nə qədər qəribə səslənsə də, bəzi məşhurlar buna görə, 1 milyard dollarından belə imtina edib.

Azərbaycanda adıçəkilən bu cür sığorta məhsulu varmı və ya kimsə bunu etmək istəsə, sığorta şirkətləri hansı məhsulunu müştəriyə təklif edə bilərlər?

Oxu.Az məsələ ilə əlaqədar sığorta bazarı üzrə mütəxəssis Xəyal Məmmədxanlının fikirlərini öyrənib.

X.Məmmədxanlının sözlərinə görə, bu sığorta Azərbaycanda bir növ spesifik də olsa, fərdi qəza sığortasına bənzəyir:

“Dünyada bu cür sığorta məhsulu var. Azərbaycanda isə demək olar ki, yoxdur. Amma, əslində bu sinif olaraq, fərdi qəza sığortasıdır, amma bir az daha spesifik” - deyə, mütəxəssis qeyd edib.

Onun sözlərinə görə, bu sığortalanmaya görə, konkret sığorta məbləği müəyyən edilir və hadisə baş verərsə həmin sığorta məbləğinə əsasən ödəniş verilir.

Bundan başqa, ekspert onu da vurğulayıb ki, əgər müştəri bu cür sığortadan faydalanmaq istəsə, bu halda sığorta şirkətləri fərdi qəza sığorta növü üzrə sığortalanmanı həyata keçirə bilər və ya ehtiyac yarandığı təqdirdə, sığortaçılar yeni sığorta qaydaları hazırlayıb Maliyyə Nazirliyində təsdiq elətdirməlidirlər.

Məmmədxanlı onu da qeyd edib ki, Azərbaycanda bu cür sığorta növünün tətbiq olunmamasına səbəb bazarın hələ o sahədən çox uzaq olmasından qaynaqlanır.

Qeyd edək ki, 47 yaşlı müğənni Kylie Minogue 5 milyon dollara, Cenifer Lopez 27 milyon dollara, Mariah Karey isə nə az, nə çox düz 1 milyard dollara ayaqlarını sığorta elətdirib.

Bu siyahını uzatmaq da olar. Hətta bunlar arasında sinəsinin tüklərini belə sığorta elətdirməkdən çəkinməyənlər var.

Belə ki, ingilis müğənni Tom Jones sinə tüklərini 7 milyon dollara sığorta elətdirib. Aktrisa, Shirley MacLaine UNO-lar (Uçan Naməlum Cisimlər) tərəfindən qaçırılma riskinə görə, cüzi bir məbləğ qarşılığında olsa da, özünü sığorta elətdirib. Cəmi 25 dollara.

Bundan başqa, aktrisa Julia Roberts məşhur gülüşünü 30 milyon dollara sığortalatdırıb.

Ölkə.Az