Tanınmış hüquqşünas Ruslan İzzətlini dəstəklədi

Tanınmış hüquqşünas Ələsgər Məmmədli 33 saylı Xətai birinci seçki dairəsindən deputatlığa namizəd, D18 hərəkatının lideri Ruslan İzzətliyə dəstək aksiyasında iştirak edib.

Ölkə.Az xəbər verir ki, parlameti dövlətin düşünən beyni olaraq qiymətləndirən Ə.Məmmədli məhz belə bir qurumda Ruslan İzzətli kimi gənc, enerjili və kifayət qədər intellektuallı gənclərin təmsil olunmasını vacib hesab edir:

“Dövləti canlı orqanizm kimi düşünsək Parlament dövlətin başı, düşünən beynidir. Parlament seçkiləri cəmiyyət üçün çox böyük əhəmiyyət kəsb edir. Cəmiyyət onu idarə edənləri seçir. Bu baxımdan cəmiyyəti təmsil edən şəxslər kifayət qədər intellektual, qabiliyyətli, zəki və bacarıqlı olmalıdırlar.

Ruslan İzzətli gənc olmasına baxmayaraq kifayət qədər siyasi savada malik, eyni zamanda ideoloji hazırlığı olan bir gəncdir. Mən əminəm ki, onun kimi gənclərin parlamentdə təmsil olunması Azərbaycan parlamentinin gücünə güc qatacaq və Azərbaycanın kifayət qədər tanınmasında çox önəmli rolu olacaq.

Ruslan İzzətliyə səs verilsə, seçicilər əminəm ki, 5 il ərzində dinamik, enerjili bir millət vəkilinə sahib olacaqlar. Bu baxımdan biz Ruslan İzzətli kimi gəncləri seçib parlamentə göndərsək ölkəmizin gələcəyi əmin əllərdə olacaq.

Mən qarşıdan gələn seçkilərdə bütün seçiciləri Ruslan İzzətliyə səs verməyə çağırıram!!!

Ölkə.Az