\"İraq tərəfinin Türkiyəyə qarşı İŞİD-lə bağlı irəli sürdüyü ittihamlar İranın mövqeyidir\"

"... Rusiya da bundan istifadə edərək Suriyanı bombalamaqla miqrant selini daha da gücləndirir"

İraq kəşfiyyatı Türkiyəni İŞİD-in ticarət tərəfdaşı olmaqda günahlandırıb

İraq kəşfiyyatı İŞİD-in nəzarətdə saxladığı ərazilərdəki neft yataqlarından ayda 50 milyon dollara yaxın gəlir əldə etdiyini deyib. İraq tərəfi həm də Türkiyəni İŞİD-lə ticarət tərəfdaşlığı etməkdə günahlandırıb. Kəşfiyyat xidmətinin yaydığı məlumata görə, "İŞİD-in əsas ticarət ortağı və xüsusən neft alıcısı türkiyəli qaçaqmalçılardır. Onlar nefti alaraq sonradan başqa ölkələrə baha qiymətə satırlar. Neftə görə əsas ödəniş Ankara və İstanbulda terror qruplaşması ilə əlaqəli olan şəxslərə ödənilir".

İraq kəşfiyyatının Türkiyəyə qarşı irəli sürdüyü ittihamlara politoloq Qabil Hüseynli Ölkə.az-da münasibət bildirib:

"İraq baş nazir də daxil olmaqla İranın təsiri altındadır. İraqın keçmiş xarici işlər naziri bildirir ki, İraq İranın əlində bir oyuncağa çevrilib. Ona görə də, İraq tərəfinin Türkiyəyə qarşı İŞİD-lə bağlı irəli sürdüyü ittihamlar İranın mövqeyidir. Türkiyə necə İŞİD-in tərəfdaşı ola bilər ki, Türkiyəyə qarşı ən böyük zərbələr, terror aktları İŞİD tərəfindən törədilib. İraqın baş naziri şiədir və şiəliyi o dərəcədə yüksək tutur ki, İranın təəssübünü bir anda olsun heç yerdə vermir. Heç İraqın təəssübünü bir o qədər çəkmir. Üstəlik İraq baş naziri sünnilərə qarşı barışmaz mövqeyi ilə seçilir. Onun Türkiyəyə qarşı barışmaz mövqeyi sünnilərə qarşı olan düşüncəsindən qaynaqlanır. Türkiyə vaxtilə yalnışlıqla müəyyən qüvvələrə təlim keçib, sonradan həmin qüvvələr İŞİD-ə qoşulubsa bu Türkiyənin günahı deyil. Bu prosesdə ABŞ da iştirak edib. Əl-Nusra cəbhəsinin silahlandırılması və təlimi Türkiyə ərazisində keçirilib. Sonradan Əl-Nusra Suriya Azadlıq Ordusunun tərkibindən çıxdı və sərbəst fəaliyyət göstərməyə başladı. ABŞ Suriya Azadlıq Ordusuna silah sursat verməyi dayandırdı. Ona görə ki, ABŞ-ın təlim keçdiyi adamlar silahı əlinə alan kimi o silahları ya İŞİD-ə, ya Əl-Nusraya satdı, ya da, döyüş meydanından qaçıb cəhd etdi ki, Avropaya getsin.

Həm suriyalılar, həm də iraqlılar ruhən sarsılıblar. Onlar döyüş aparmaq istəmir. Hamısı qaçıb Avropaya getmək istəyir. Rusiya da bundan istifadə edərək Suriyanı bombalamaqla miqrant selini daha da gücləndirir. Miqrant selində Türkiyənin də günahkar olması məsələsini ortaya atmaq istəyir. Rusiya bunları özü deməsə də İraqın baş nazirinin dili ilə söyləyir. Son zamanlar İraq Rusiyaya olan rəğbətini gizlədə bilmir. Hətta İraq Rusiyanı İraqda anti-terror əməliyyatları keçirməyə səslədi. Belə olan halda ABŞ İraqa son xəbərdarlığını etdi. Bildirdi ki, əgər Rusiya ilə münasibətlər qursanız biz sizin yanınızda olmayacağıq.

ABŞ, Avropa və Türkiyə istəsə Rusiyanı islam terrorçuları ilə baş-başa qoyacaq. Elə bir şərait yaradacaqlar ki, Yaxın Şərq Rusiya üçün Əfqanıstandan betər olacaq. İraqın baş nazirinin Türkiyə əleyhinə səsləndirdiyi iftiralar çox ağırdır və bu siyasətçiyə yaraşmır. O mütləq sözünü geri götürməlidir".

Qeyd edək ki, Türkiyə uzun müddətdir ki, İraq və Suriya ərazisində İŞİD və PKK-ya qarşı hava zərbələri endirir.

Səxavət Məmməd
Ölkə.Az