Bu ölkədə dəhşətli istilər 38 can aldı

Cənubi Asiyada dəhşətli istilər 38 nəfərin ölümünə səbəb olub.

Ölkə.Az xarici KİV-ə istinadla xəbər verir ki, mövsümi normalardan daha uzun yay mövsümü keçirən Taylandda istidən ölüm halları baş verib.

Tayland Səhiyyə Nazirliyinin rəsmiləri fevralın 22-dən bəri ölkədə həddindən artıq istilərə görə, azı 38 nəfərin öldüyünü açıqlayıb. Qeyd olunub ki, ölənlərin əksəriyyəti açıq havada işləyənlər, xəstəlikləri olanlar və yaşlılardan ibarətdir.
İsti hava dalğasının yay mövsümünün son günlərinə qədər təsirini davam etdirəcəyini bildirən rəsmilər taylandlılara və ölkəyə gələn turistlərə bir həftə ərzində günorta saatlarında lazım olmadıqca çölə çıxmamaları və bol maye içmələri barədə xəbərdarlıq edib.

Qeyd edək ki, Taylandın Fəlakətlərin Qarşısının Alınması Departamenti (DDPM) də ölkənin 12 əyaləti üçün rəsmi xəbərdarlıq edib.
Tayland Meteorologiya Departamentinin məlumatına görə, paytaxt Banqokda tarixin ən isti aprel ayı yaşanıb. Hiss olunan temperaturun bəzi yerlərdə 54 dərəcəyə çatdığı bildirilir.

Mütəxəssislər bildirib ki, bu ölkədə normal olaraq may da başlayan yağışlı mövsümün ləngiməsi dünyada baş verən iqlim dəyişikliyi ilə bağlıdır.

Billurə