Elşən Gəncəvi: “Seçki bir marafondur və biz, bu marafonda “Finish” xəttinə sağlam çatmalıyıq.”

İctimai və sosial mövzularda məqalələri ilə tanınan Elşən Gəncəvi, 1 noyabr 2015-ci il tarixində keçiriləcək seçkilərdə Milli Məclisə 120 saylı Cəbrayıl-Qubadlı seçki dairəsindən namizəd Nəcəfov Elşən Hökumət oğlunun müsahibəsini təqim edirik

Özünüzü təqdim edin.

1 noyabr 2015-ci il tarixində keçiriləcək seçkilərdə Milli Məclisə 120 saylı Cəbrayıl-Qubadlı seçki dairəsindən namizəd Nəcəfov Elşən Hökumət oğlu.

“Gəncəvi” təxəllüsünü niyə götürmüsünüz?

Hər bir insanın formalaşmasının əsasında bir və ya bir neçə tarixi şəxsiyyət nümunəsi olur. Mənim isə özümə bildiyim nümunə dahi şair, müdrik filosof Nizami Gəncəvidir. Gəncəvi ləqəbini Nizami Gəncəvini və onun öz əsərlərində insanlara çatdırmaq istədiyi fikirləri həyatda və dünyada yaşatmaq üçün götürmüşəm. 2003-cü ildə universitetə daxil olduqdan sonra istədim ki, məni tanıyan insanlar Gəncəvi olaraq tanısınlar. Nə qədərinə nail olduğumu isə gələcək göstərəcək. Azərbaycan cəmiyyətində mən məhz internet vasitəsi ilə Gəncəvi kimi tanındım, dünyada da nail oldum. Xarici təhsil aldığım zaman və ya konfranslarda iştirak etdiyim zaman bir çoxları məndən bu sualı soruşur, Gəncəvi təxəllüsünü araşdırırdı. Bir növ ictimai əlaqələrə işləyən mexanizmdir. Xarici vətəndaşlara Nizami Gəncəvi və onun irsi haqqında məlumat vermək bir qürur hissidir. “Gəncəvi 870” məqaləni hazırlayanda isə, Gəncəvi təxəllüsünə sahibləndiyimi anladım. Bu günümüzdə Gəncəvi təxəllüsü ilə bir çox mövzularda məqalə yazmağım mənim şəxsi  tanıtımımda böyük bir rol oynayır.

Təhsiliniz haqqında məlumat verərdiniz.

Mən 2007-ci ildə Azərbaycan Dövlət İqtisad Universitetinin “Beynəlxalq iqtisadi münasibətlər” fakültəsini balakavr dərəcəsində bitirdim. Daha sonra, 2013-cü ildə Rumıniya Respublikasının Timişoara şəhərində Timişoara Qərb Universitetinin “Siyasi elmlər” fakültəsində magistr elmi dərəcəsinə yüksəldim. İxtisasım isə “İctimai-siyasi vəkillik” sahəsidir. Həmçinin, beynəlxalq konfranslarda və müxtəlif mövzular master-klaslarda iştirak etmişəm.

Niyə namizədliyinizi irəli sürdünüz?  

Mən Cəbrayıl rayonunun Suleymanlı kəndində anadan olmuşam. Qərara gəldim ki, bir cəbrayıllı olaraq Cəbrayıllılara millət vəkili kimi xidmət etmək üçün namizədliyimi irəli sürüm. Bizim ailə Cəbrayıllılar arasında tanınır və xüsusən də yüksək təhsilə sahib, elmli və ziyalı insanlar çoxdur. Mən də bir gənc ziyalı kimi enerjimi, şəxsi bilik və bacarıqlarımı sərf edərək Cəbrayıl rayonunu və cəbrayıllıları Azərbaycanın Ali Qanunverici orqanında təmsil etmək istəyirəm. Bir məsələni xüsusi ilə qeyd edim ki, XXI  əsr Azərbaycanında bütün sahələrdə gəncləşmə prosesi baş verir. Müxtəlif orqanlarda gənclərin aktivliyi, yeni metodları və texnologiyaları asanlıqla qavrayıb tətbiq etmək bacarıqlarına malik olduqları üçün, yaşlı nəsildən fərqlənir və  təbii olaraq daha çox uğurlara sahib olurlar. Azərbaycan vətəndaşları da bunu çox gözəl bilir və gənclərə etimad etməyə başlayır. Mən də bir gənc kimi öz potensialımdan maksimum istifadə edib bu uğurlara imza atmaq istəyirəm.

Ümumiyyətlə, seçki prosesini necə qiymətləndirirsiz?

Etiraf etməliyik ki, internet şəbəkəsi böyük bir gücdür. Kim internet vasitəsi ilə yeni texnologiyalardan sivil qaydalarla seçki təbliğat prosesini maraqlı edirsə, yadda qalan o olur. Çünki, artıq bir faktdır ki, insanların çox hissəsi sosial şəbəkələrdən asanlıqla istifadə edirlər. Seçki kampaniyaları haqqında məlumatı internet vasitəsi ilə əldə edirlər. Əlbəttə ki, hər bir namizədin seçki təbliğatı maraqlı və yadda qalan olmalıdır. Kimisə təşkil etdiyi görüşləri ilə, kimisə müsahibəsi ilə, kimisə posteri ilə, kimisə də təbliğat videoları ilə yadda qalır. Seçki zamanı hər bir uğurlu yenilik yadda qalır və gələcək seçkilərdə digərləri tərəfindən istifadə edilir. Seçdiyim şüar “Təhsil Seçim Edir!” vasitəsilə həm də, cəmiyyətə bir ictimai mesaj veririk. Yeni əsrin yeni qaydaları təhsil üzərində köklənib. Biz cəmiyyətimizin maariflənməsində və dövlətimizin maraqlarının müdafiəsində təhsil siqnalı veririk. İstənilən addım gələcəyə hesablanıb və gələcək üçün vacibdir. 

Şanslarınızı necə qiymətləndirirsiniz?

Şansım seçicilərin səsindən asılıdır. Əgər, seçicilərimiz bir gəncin manifestini yazmaq istəyirlərsə, nəticə bizim istədiyimiz kimi olacaq. Hər şey səsdən və səsin verəcəyi nəticə ilə qiymətləndiriləcək. Azərbaycan vətəndaşları gənclərə inam və etimad göstərir. Mən, buna inanıram!

Rəqibləriniz haqqında nə düşünürsüz? Onlarla necə mübarizə aparırsınız?

Mən hər bir rəqib namizədə hörmət bəsləyirəm. Seçkilərdə isə, ən gözəl və sivil mübarizə namizədin seçicilərə şəxsi keyfiyyətlərini, uğurlarını, bilik və bacarıqlarını təqdim etməklə, onların inamını qazanmaqdır. Biz məhz bu yolu əsas götürərək, seçki təbliğat-təşviqat prosesində iştirak edirik. Seçki bir marafondur və biz, bu marafonda “Finish” xəttinə sağlam çatmalıyıq.

İctimai və sosial məqalələrinizdə daha çox gəncləri hədəfə almısınız. Niyə?

Çünki, gözəl bir faktdır ki, bu gün gənclər Azərbaycan vətəndaşlarının əksər hissəsini təşkil edir və Azərbaycanımızın gələcəyi məhz gənclərin əlindədir. Hədəfə deyil, sadəcə olaraq, gənclərin perspektivinin daha çox olduğunu ifadə etməkdir. Gənclərdən təhsilli, bacarıqlı, yaradıcı və ölkəmiz üçün uğurlu olmasını istəyirəm. Bunun üçündə, bəzən şikayətçi, bəzən isə maarifləndirici yazılar təqdim edirəm. Onlar mənim həmyaşıdım olduğu üçün, bütün yazdıqlarım daha səmimi şəkildə qarşılanır.

Vətənpərvərlik anlayışı sizin üçün hansı mənadadır?

Vətənpərvərlik anlayışı mənim üçün bir dəyər daşımaqdır. Yaxşı işlər görüb, gələcək nəsilə təhvil verməkdir. Biz bu vətənin hissələriyik. Ona görədə, edəcəyimiz hər bir işin məsuliyyətini daşıyırıq.

Gələcək planlarınızda nələr var?

Gələcək, yaxın tarixdə 1 noyabr 2015-ci il tarixində reallaşacaq. Nəticənin nə olacağından asılı olmayaraq, yaxşı işlər görməyə davam edəcəm. Seçkidə qalib olacağıma inanıram! Kifayət qədər, bunun üçün səbəblər var. Təbliğat-təşviqat işləri gedir. Namizədi olduğum 120 saylı Cəbrayıl-Qubadlı seçki dairəsinin vətəndaşları ilə fərdi qaydada görüşlər, mobil qruplarla işlərimiz davam edir. Bütün vasitə və imkanlardan yararlanmağa çalışıram ki, hər kəslə ünsiyyətdə ola bilim.

Seçkidə qalib gələcəyiniz təqdirdə ilk atacağınız addım hansıdır?

İlk olaraq qeyd edim ki, bildiyiniz kimi Cəbrayıl və Qubadlı rayonlarının ərazisi bu günə qədər işğal altındadır və doğma vətəndaşlar məcburi köçkün statusu altında yaşayırlar. Bu isə o deməkdir ki, onların sosial və iqtisadi problemləri daha çox qabarıq şəkildədir. Fəaliyyətimin ilk günündən çalışacam ki, sosial-iqtisadi problemləri millət vəkili səlahiyyətləri vasitəsi ilə aradan qaldırmaq olacaq. Hər bir vətəndaşın vəkili və sözünü Milli Məclisdə ifadə edəcəm. Problemlərin həlli istiqamətində real addımlar atmaq üçün var gücümlə çalışacam. Sözümüz Sözdür!

Əgər seçkidə qalib olmasanız, verəcəyiniz qərar nə olacaq?

Qalib gələn yeni millət vəkilini təbrik edəcəm və işlərində uğurlar arzu edəcəm. 

Ölkə.Az