\"Bəşər Əsəd hələlik Rusiyaya sərf edir\"

Rusiya İŞİD-ə qarşı Suriyadan əlavə ölkə daxilində də əməliyyatlar keçirir.

Rusiya İŞİD-ə bağlı qruplaşmalarla yanaşı, islamçı Hizb-ut-Təhrir hərəkatı da daxil olmaqla başqa qruplaşmaları da zərərsizləşdirir. Xəbər verilir ki, həbs edilənlərdən 14-ü islamçı Hizb ut-Təhrir hərəkatının üzvləridir.

Bundan əlavə Rusiya Suriyada hava əməliyyatlarına davam edir. Bir müddət öncə Sergey Lavrov müxalif Suriya Azadlıq Ordusuna yardım edə biləcəklərini açıqlamışdı. Ancaq Suriya Azadlıq Ordusunun rəhbərliyi bu məsələyə sərt cavab verib. Suriya Azadlıq Ordusunun sözçüsü bildirib ki, Rusiyanın köməyinə ehtiyacları yoxdur. Rusiyanın bizə kömək edəcəyinə inanmırıq. Rusiyanın səmimiyyətinə inanmırıq.

Rusiyanın atdığı son addımları politoloq Adıgözəl Məmmədov Ölkə.Az-a şərh edib:

"Bu məsələlər mövcud vəziyyətin, dünyadakı geosiyasi ziddiyyətin kontekstində baş verir. İstənilən halda ya Rusiya olsun, ya da Rusiyanın yerinə hər hansısa bir dövlət olsun, bunların əsas məqsədi budur ki, öz siyasətlərini həyata keçirmək üçün özünə mümkün qədər tərəfkeş yığsınlar. Bu, Rusiya xarici siyasətinin oturuşmuş, yoxlanılmış, hesablanmış siyasətinin təzahürüdür.

Rusiya istəyir ki, Suriyada onun maraqlarına uyğun olan durum formalaşsın. Ona görə də bu vəziyyətə mane ola biləcək qüvvələri neytrallaşdırmağa çalışır. Rusiya Suriyadakı vəziyyəti öz xeyrinə dəyişmək üçün Suriya Azadlıq Ordusuna da dəstək verməlidir. Rusiya Bəşər Əsəd rejiminin əleyhinə olan qüvvələrlə də danışıqlar aparmalıdır. Rusiya Suriyaya Bəşər Əsəd kontekstindən baxmır. Regiona öz dövlətinin mövqeyindən və maraqlarından baxır. Bugünkü vəziyyətdə Rusiya maraqlarını təmin edən qüvvə Bəşər Əsəd rejimidirsə, onunla işləyəcəklər. Əgər sabah Rusiyanın maraqlarına müxalif düşərgə uyğun gəlsə, Rusiya onlarla işləyəcək.

Suriya Azadlıq Ordusunun rəhbəri bildirib ki, Rusiyanın səmimiyyətinə inamırıq. Ancaq bir müddət öncə həmin müxalif qüvvələrin təmsilçiləri Moskvada görüşlər keçirirdi. Suriya Azadlıq Ordusunun bir fərdi belə danışırsa, bu o demək deyil ki, bütün Suriya müxalifəti Rusiya haqqında o cür düşünür. 2 ay öncə Rusiya Bəşər Əsədə qarşı olan müxaliflərlə görüşlər aparırdı. Rusiya bu məsələyə dövlət maraqları çərçivəsindən yanaşır və bu təbii bir şeydir. Böyük dövlətlər hərtərəfli oynamalıdır.

Rusiyanın daxildə radikal islamçılara qarşı apardığı əməliyyatları gözlənilən idi. Rusiya İŞİD-in Suriyadakı bazalarını, alt yapılarını məhv edir. Qarşı tərəf də cavab vermək üçün hər hansısa bir addımlar atmaq istəyə bilər. Rusiya öz ərazisində hər hansısa bir təxribatın, terror hərəkətinin qarşısını almaq üçün bu addımları atmalıdır. Rusiya öz daxilində apardığı əməliyyatlarla həm də özünü sığortalayır. Ciddi dövlətlərin ciddi addımları da belə olmalıdır".

Qeyd edək ki, Rusiya sentyabrın 30-dan Suriyada hava əməliyyatları keçirir.

Səxavət Məmməd
Ölkə.Az