Azərbaycan seçki tarixində İLK

Ölkə.Az-a daxil olan məlumata görə, bu gün Vətəndaş və İnkişaf Partiyasının Mərkəzi qərargahında 15 saylı Yasamal birinci Seçki Dairəsi üzrə qeydə alınmış 8 deputatlığa namizədlərdən 5 nəfəri - Əli Əliyev (VİP sədri, “Azadlıq-2015” seçki bloku), Garay Əsədov (bitərəf), Nişat Mehdiyev (bitərəf), Vəfa Rüstəm (bitərəf) və Ramil Rüstəmovun (bitərəf) görüşü keçirilib.

Deputatlığa namizədlər mübarizə apardıqları 15 saylı Yasamal Birinci seçki Dairəsi üzrə baş verən kobud qanun pozuntularını müzakirə ediblər.

Görüşün nəticəsi olaraq, hər 5 namizədin imzası ilə Mərkəzi Seçki Komissiyasına şikayət göndərilib. Müzakirə iştirakçılarının dörd tərəfi birgə bəyanat qəbul etmək haqda razılığa gəliblər.

Aparılan müzakirələrin növbəti addımı kimi namizədlərinin iştirakı ilə sabah (28 oktyabr 2015) Vətəndaş və İnkişaf Partiyasının qərargahında ( Fuad İbrahimbəyov küçəsi 14, Nizami metrosunun yaxınlığında) mətbuat konfransının keçirilməsi haqqında qərar qəbul olunub: 

01 noyabr 2015-ci il tarixdə keçiriləcək Parlament seçkilərində 15 saylı Yasamal birinci Dairə Seçki Komissiyası tərəfindən namizədliyi qeydə alınmış deputatlığa namizədlər- Əli Nadir oğlu Əliyev, Ramil Litvin oğlu Rüstəmov, Garay Xəlil oğlu Əsədov, Nişat Əhməd oğlu Mehdiyevin birgə

BƏYANATI

Dövlətimiz yeni Parlament seçkiləri ərəfəsindədir. Artıq seçkinin baş tutmasına bir neçə gün qalır. Ölkənin müstəqil hakimiyyət qollarından biri kimi Konstitusiyada təsbit olunmuş Milli Məclis, xalqımızın müqəddəratında daha 5 il müstəsna rola malik olacaq. Parlamentin işgüzarlığı, məqsədyönlü fəaliyyəti orada yer alacaq insanların şəxsi keyfiyyətlərindən çox asılı olacaq.

Təəssüf olsun ki, kampaniyanın ilk günündən həmkarımız ola biləcək iddiaçılardan biri- Ülvi Zahid oğlu Quliyev- ardıcıl və sistemli olaraq seçkinin dairə miqyasında ovqatına haram və qanunsuzluq qatmaqdadır. Beləki, adı çəkilən şəxs seçiciləri ələ almaq məqsədilə ət və yağ paylamaq, yola asfalt döşəmək, ehsan mərasimləri keçirmək və digər bu kimi qanuna və mənəviyyata zidd hərəkətlər etməkdədir. Təşviqatla bağlı işlərin icrası zamanı isə ümumiyyətcə, yolverilən qüsurların hər biri istənilən orta statistik namizədin qeydiyyatına xitam verilməsinə səbəb ola biləcəyi halda, Quliyevin topdan səhvləri nəzərə alınmır, hətta rəsmi qurum olan müvafiq DSK tərəfindən gizlədilir, rəsmi şikayət ərizələri rədd edilir.

Quliyev fəaliyyətində aşkar sezilən qabalığı təkcə opponentlərinə və qanunlara qarşı nümayiş etdirmir. Bu şəxs onu populyalaşdırmış, sıravi idmançıdan biznesmen-deputat statusuna yüksəltmiş hakim partiya- Yeni Azərbaycan partiyasına açıq sayğısızlıq nümayiş etdirir. Hörmətli Quliyev seçki şüarında “ Sağlam gələcək, Ülvi ilə gələcək” deməklə, YAP-ın siyasi fəaliyyətinin “faktiki”nəticələrini qeyri-sağlam adlandırmaq “cəsarəti” nümayiş etdirir. Bundan əlavə bu “cəsarət”in miqyası da aşkar şəkildə dairə miqyaslı olmadığı “gözə girir”.

Biz, adları çəkilən 15 saylı Yasamal birinci Seçki Dairəsi üzrə deputatlığa namizədlər, seçkinin ilk günündən üzləşdiyimiz qanun pozuntularını nəzərə alaraq, bəzi səlahiyyətli şəxslərin, o cümlədən bəzi DSK üzvlərinin qanunsuz müdaxilələrini əsas götürərək, ədalətli, qanuni və bərabər seçkilərin keçirilməsi zərurətinin milli maraqlarına uyğun olduğuna söykənərək aşağıdakıları bəyan edirik:

-15 saylı Yasamal birinci Seçki Dairəsində demokratik seçkilərin keçirilməsi üçün səylərimizi birləşdirək və gələcək fəaliyyətimizi qarşılıqlı şəkildə koordinasiya edək;

-seçki dövründə üzləşdiyimiz pozuntu və haqsızlıqları müvafiq instansiyalarda birgə müdafiə edək;

-ölkənin siyasi rəhbərliyinin və seçkini idarə edən qurumların , habelə ictimaiyyətin nəzərini birgə hərəkətlərimizlə seçki dairəsinə yönəltməyə nail olaq;

-qanunsuzluğa yol vermiş namizəd- Ülvi Zahid oğlu Quliyevin namizədliyinin ləğv olunması istiqamətində sistemli mübarizə aparaq;

-seçki prosesinin gedişində, səsvermədə, onun nəticələrinin rəsmiləşməsində birgə fəaliyyət göstərmək kimi öhdəlikləri üzərimizə çəkək.

Ölkə.Az