Müsavatçı: \"Partiyanın qəbul etdiyi qərarın mənə heç bir aidiyyatı yoxdur\"

Müsavat Divanı bu gün parlament seçkilərini boykot etdiyini açıqlayıb

Müsavat Partiyasından bildirilib ki, partiya seçkilərdən imtina edir və parlament seçkilərinin təxirə salınaraq 4 ay sonraya təyin edilməsini tələb edir.

Müsavat Partiyasının seçkilərə qatılmaq haqında qərar qəbul edib, seçkiyə bir neçə gün qalmış belə bir addım atması hər kəsi təəccübləndirib.

Müsavat Partiyasının aldığı qərarı Müsavat Gənclər Təşkilatının keçmiş sədri Tural Abbaslı Ölkə.Az-da sərt tənqid edib:

"İndiki vəziyyətdə müxalifət o gücdə deyil ki, hakimiyyətdən 4 ay sonra seçki keçirmək tələb etsin. Bu təklif xatirinə təklifdir. Əvvəl seçkilərə qatılmaq haqqında qərar qəbul etdilər. İnsanlar gedib imzalar yığdılar, vədlər verildi, insanların qarşısında öhtəlik götürüldü, şəkillər çıxarıldı, 60 dairədən namizəd verildi və onun 25 nəfəri qeydiyyatdan keçir və sonra seçkiyə bir neçə gün qalmış deyirsən ki, bu səhv addım imiş. Bunlar indi ayıldı? Kim deyirdi ki, hər şey biz istəyən kimi olacaq? Əgər partiya rəhbərliyi 1 ay sonranı görə bilmirsə, başqa nə demək olar?

Hər cür boykotun əleyhinəyəm. İstər partiyamızın iştirak etdiyi və yaxud etmədiyi bütün boykotların əleyhinə olmuşam. Boykotun heç bir təsir imkanları olmur. Partiyanın rəhbərliyi qərar verib, ancaq bu qərarı öz adıma düzgün qəbul etmirəm.

Partiyanın qəbul etdiyi qərarın mənə heç bir aidiyyatı yoxdur. Partiyadan yox, "Ağ Blok"dan namizədliyimi irəli sürmüşəm. Demirəm deputat seçiləcəm, ona görə də, bu qərarı pisləyirəm. Qətiyyən elə bir şey yoxdur. Siyasətçi stabil olmalıdır, analiz etməlidir və verdiyi qərarların arxasında sona qədər durmalıdır. Bir qərar vermişik, arxasında da duracağıq, nəticəsinin nə olub olmayacağını da zaman göstərəcək. Hər cür nəticəyə hazırıq".

Qeyd edək ki, Tural Abbaslı Müsavat Partiyasının üzvü olsa da namizədliyini təsisçilərindən biri olduuğu "Ağ Blok"dan verib.

Onu da xatırladaq ki, oktyabr ayının 25-də Müsavat Partiyası parlament seçkiləri ilə bağlı "Məhsul" stadionunda mitinq də keçirib.

Səxavət Məmməd
Ölkə.Az