Azərbaycan Misir münasibətləri - Afrikaya açılan qapı
Azərbaycan Prezidenti İlham Əliyevin Misirə səfərini təkcə iki ölkə arasında deyil, bütövlükdə Ərəb dünyası və Afrika qitəsi ilə əlaqələrin inkişafının növbəti bir mərhələsi kimi dəyərləndirmək lazımdır.
Bunu Ölkə.Az-a açıqlamasında deputat İltizam Yusifov deyib.
Onun sözlərinə görə, ərəb ölkələri və Afrika ölkələri ilə əlaqələrin inkişafı Azərbaycanın yürütdüyü xarici siyasətin prioritetini təşkil edir. "Son illərdə, xüsusən də İkinci Qarabağ savaşından sonra Ərəb dünyası ilə Azərbaycan arasındakı əlaqələrin inkişafı yeni bir inkişaf mərhələsinə qədəm qoyub. Cənab Prezidentin və ölkəmizin yüksək rütbəli rəsmilərinin davamlı olaraq ərəb ölkələrinə səfərləri həyata keçirilir. Eyni zamanda ərəb ölkələrindən də Azərbaycana çoxsaylı səfərlərin şahidi oluruq. Bu səfərlər səfər xatirinə deyil konkret nəticələrə xidmət edir. Bunu son illərdə ərəb ölkələrinin Azərbaycan arasında imzalanan saziş və müqavilələr, ölkə iqtisadiyyatına yatırılan sərmayələr, həyata keçirilən və davam edən birgə layihələr sübut edir. Əməkdaşlıq münasibətləri getdikcə daha da dərinləşməkdə və genişlənməkdədir. Cənab Prezidentinin iyunun 7-də Misirə rəsmi səfəri də ikitərəfli münasibətlərin inkişafı ilə yanaşı, regional əməkdaşlığın inkişafı, beynəlxalq münasibətlərə sistemində əməkdaşlığın yeni bir mərhələyə qədəm qoyması baxımdan mühüm əhəmiyyət kəsb edir. Səfər çərçivəsində aparılan müzakirələr, imzalanan sənədlər və verilən bəyanatlar bunun bariz nümunəsidir", - o qeyd edib.
Deputat əlavə edib ki, bu səfər Azərbaycanın Ərəb və İslam dünyasında, həmçinin beynəlxalq müstəvidəki proseslərdə daha aktiv rol oynaması ilə nəticələnəcək. "Çünki Azərbaycan son illərdə beynəlxalq aləmdə çox ciddi aktor roluna malik olan ölkə kimi tanınır. Səfər zamanı Misir prezidenti Əbdülfəttah əs-Sisi də verdiyi bəyanatda Prezident İlham Əliyevin dünyada gedən proseslərdə oynadığı xüsusi rolu qeyd edərək bildirib ki, səfər region ölkələrinin və xalqlarının inkişafına töhfə verəcək.
Dövlət başçısı verdiyi bəyanatda da İslam aləmində, xüsusən günümüzdə ən aktual problem olan Qəzza məsələsində də Azərbaycanın qətiyyətli mövqeyini ortaya qoydu. Bildirdi ki, Fələstin dövləti yaradılmalıdır və paytaxtı da Şərqi Qüds olmalıdır. Rəsmi Bakının Fələstinlə bağlı mövqeyi onsuz da bəlli idi və indiyədək Azərbaycan Fələstinə yetərincə dəstək verib. Qahirədə də verilən bəyanat növbəti dəfə rəsmi Bakının məsələ ilə bağlı aydın şəkildə mövqeyinin beynəlxalq aləmə çatdırması idi. Bu səfəri, həm də region ölkələrinin və xalqlarının inkişafına töhfə verəcəyini qeyd etmək olar.
İkitərəfli münasibətlərə gəldikdə, ticarət həcminin artırılması təbii ki, müsbət haldır. Əgər statistik rəqəmlərə baxsaq, görərik ki, ticarət dövriyyəsi bir neçə dəfə artıb. Ancaq mütləq rəqəmlər hələ bizi qane etmir və bu gün imzalanmış sənədlər, əldə edilmiş razılaşmalar əminəm ki, bu istiqamətdə də bizə kömək edəcək. Əminəm ki, ilk növbədə energetika, bərpaolunan enerji növlərinin istehsalı, neft sənayesi, əczaçılıq, alüminium sənayesi sahələrində və digər sahələrdə yaxşı nəticələr əldə etmək mümkün olacaq.
Azərbaycanla Misir arasında əlaqələrin inkişafı həm də Azərbaycanın Afrika ölkələri arasında yeni bir mərhələnin başlanğıcı hesab etmək olar. Prezident İlham Əliyevin də bəyan etdiyi kimi Qahirədə keçirilən görüşdə yeni nəqliyyat dəhlizləri və onun imkanlaır da müzakirə olunub. Bu gün Şərq- Qərbi və Şimal -Cənub nəqliyyat dəhlizlərinin qovşağında yerləşən Azərbaycan yükdaşımada Misir və Afrika ölkələri üçün də ən sərfəli variantlardan ola bilər. Misir bu yolun imkanlarından istifadə etməklə təkcə Şimaldan və Orta Asiya ilə daha rahat əlaqə qurmaqla yanaşı həm də Afrika ölkələrinə, o cümlədən əks istiqamədə yükdaşımada bir qovşaq rolunu oynayıb yetərincə faydalana bilər. Bakı və Qahirə arasında əlaqələrin inkişafı nəqliyyat-logistika sahəsində əməkdaşlıq üçün çox gözəl imkanlar açar. Bununla da iki ölkə arasındakı əməkdaşlığın inkişafı isə nəticə etibarilə regional əməkdaşlıqla yanaşı, Cənubi Qafqazda dayanıqlı sülhə, sabitliyə, inkişafa və sıx əməkdaşlığa öz töhfəsini vermiş olacaq".
Mürtəza
Ölkə.Az
