FIFA prezidentliyə namizədləri təsdiqləyib

Yeni rəhbər gələn il fevral ayının 26-da seçiləcək

Ölkə.Az xəbər verir ki, FİFA prezidentliyinə namizədlərin siyahısı rəsmi şəkildə açıqlanıb.

Ali futbol qurumu 7 şəxsin namizədliyini təsdiqləyib. Həmin namizədlər arasında UEFA prezidenti Mişel Platini, baş katib Canni İnfantino, Liberiya Futbol Federasiyasının prezidenti Musa Biliti, FİFA-nın sabiq baş katib köməkçisi Jerom Kampanye, İordaniya şahzadəsi Əli-Bin Əl-Hüseyin, Asiya Futbol Konfederasiyasının prezidenti Şeyx Salman bin İbrahim Əl-Xəlifə, Cənubi Afrikanın məşhur iş adamı Tokyo Sexvale var.

Qeyd edək ki, FİFA-ya yeni rəhbər gələn il fevral ayının 26-da seçiləcək.

Bir müddət öncə Futbol Federasiyasının baş katibinin keçmiş müavini Jerom Şampan və Asiya Futbol Konfederasiyasının başçısı şeyx Salman Bin İbrahim Əl-Xəlifə FIFA prezidenti olmaq üçün namizəd olublar.

Şeyx Salman FIFA prezidentinin səlahiyyətlərini icra edən Afrika Futbol Konfederasiyası başçısı İssa Xayatu ilə danışıqlardan sonra bu qərara gəlib. O, əvvəllər DÇ-2018-in seçim turuna nəzarət bürosuna rəhbər təyin edilib.

Xatırladaq ki, ali futbol qurumunun etika komitəsi tərəfindən 90 gün postundan kənarlaşdırılan Yozef Blatteri İssa Xayatu əvəzləyib.

Hayatu 90 gün ərzində FIFA-ya rəhbərlik edəcək. Kamerunlu futbol adamı FIFA-nın İcraiyyə Komitəsinin vitse-prezidentidir. FIFA prezidenti Yozef Blatter, baş katib Jerom Valke və UEFA prezidenti Mişel Platini bütün vəzifələrindən 90 gün müddətinə kənarlaşdırılıb.

Qeyd edək ki, Blatter 1998-ci ildən FİFA-ya başçılıq edir. Bu ilin may ayının 29-da isə Blatter 5-ci dəfə FİFA prezidenti postuna seçilib. Ancaq 2 iyunda Yozef vəzifəsindən getdiyini bildirib. Yeni prezidentin seçiləcəyi konqres isə 2016-cı ilin fevralın 26-da Sürix şəhərində baş tutacaq.

Rəşid Mustafazadə

Ölkə.Az