Boğaz əti hansı halda kəsilə bilər? - Həkimdən XƏBƏRDARLIQ

"Boğaz əti " - böyümüş badamcıqlar ilə bağlı bəzi fikirlərə aydınlıq gətirək. İlk onu deyim ki, uşağın yanında "bu uşağın boğazı kəsilməlidirmi?", " həm burnu kəsilsin, həm boğazı " kimi ifadələr işlətməyin. Eşidir və yəqin ki, qorxur.

Ölkə.Az xəbər verir ki, bunu pediatr Aytən İsmayılzadə deyib. O bildirib ki, bu tip suallarla əməliyyat edən lor (burun-boğaz-qulaq) həkiminə müraciət etməmək məsləhətlidir:

"Adətən onların əksəriyyəti "ikisini də edək, canı qurtarsın" "narkoz vermişkən boğazı da edək, onsuz da gələcəksiniz" " boğaz əti də mütləq götürülməlidir" deyib yalnış istiqamət verirlər. Ümumiyyətlə, məsləhətdir ki, bu tip əməliyyat üçün icbari tibbi sığorta xidmətindən istifadə edəsiniz.
Nə qədər olmasa da, pul şirin şeydir, cərrah əməliyyatın həcmini qazanc eşqinə də böyüdə bilər. Dəfələrlə bunun şahidi olmuşam".

Həkim hansı hallarda boğaz ətini kəsdirmək məsləhətlidir, hansı hallarda deyil bunu fotolarla izah edib:

"Birinci şəkil qətiyyən kəsilməyə göstəriş deyil. Əgər o badamcıqlar il ərzində 7-8 dəfə irinli angina olmursa, hətta olsa da, bioloji mualicəyə cavab vermirsə, əməliyyata göndəririk.
Badamcıqları görə bilərik. Yəni onlar böyüyə bilər, lakin nəfəs yolunu tutmursa, qida və hava rahat keçirsə, əməliyyat edilmir.

İkinci şəkildə olduğu kimi, bəzən uşaq yeməyi uda bilmir. Bu zaman ya hissəvi, ya da tam aradan götürülür.

Üçüncü şəkildə isə irinli angina görürük. Belə olanda əkilmə verib hansı mikrobun hər dəfə bunu törətdiyini bilməliyik. Ona qarşı izopatik müalicə aparırıq. Bir neçə dəfə edilən müaıicəyə baxmayaraq immunitet o mikrobu dəf edə bilmirsə və bu hal revmatizm riskini artırırsa, uşağın fiziki inkişafına mənfi təsir edirsə, əməliyyat göstəriş olur.

Dördüncü şəkildə isə badamcıqda tıxacları görürük. Onlar irin deyil, amma ağızdan pis qoxuya səbəb ola bilir. Qida qalığı badamcıqda yuvalarda yığılır, kalsinatlaşır, qidalı mühit kimi əlbəttə, çürümə də gedir və immuniteti yorur. Bu tıxaclar özü də lor həkim tərəfindən təmizlənə bilir. Buna görə isə müdafiə funksiyası daşıyan ,ilk qapılarımızdan olan badamcıqları kəsməyə dəyməz. Badamcıqların götürülməsi ilə uşağın həyati riski həmişə tərəziyə qoyulmalıdır. Yəni götürsək nə olar, götürməsək nə olar?"

Billurə Yunus