ANS-də ixtisarlar başladı

ANS telekanalında işçilərin ixtisarına başlanılıb.

Ölkə.az-ın əldə etdiyi məlumata görə, son günlərdə şirkətin 6 operatoru, 2 sürücüsü və bir neçə mühafizəçisi işdən çıxarılıb. Şirkətdəki mənbə bildirir ki, işdən çıxarılanlar arasında müxbirlər də var.

Qeyd olunur ki, buna səbəb ANS-in hər il təşkil etdiyi jurnalistika məktəbini bitirən gənclərin işə qəbul olunmasıdır:

"Hər il ANS-də jurnalistika akademiyasından iyirmidən çox məzun çıxır və stajçı kimi işə başlayır. Üç aydan sonra təcrübə müddəti bitir və hamısı leqal olaraq işləyirlər. Bu vaxt bütün departamentlərdə işçi çoxluğundan "Ərəb baharı" başlayır. Rəhbərlik də birbaşa heç birini işdən çıxara bilmir. Başlayırlar çıxarmaq istədikləri işçiləri sıxışdırmağa. Kiminin maaşını kəsirlər, kiminə material vermirlər və s. Bu halda çoxu məcburən işdən çıxır, yaxud çıxarılırlar. Bu hal adətən aprel və oktyabr aylarında baş verir".

Şirkətin rəhbərinin müşaviri Mais Məmmədov bununla bağlı Ölkə.az-a açıqamasında bildirib ki, səhhəti ilə əlaqədar dörd gündür işə çıxmır:

"Mən işdə olduğum müddətdə belə bir şey olmayıb. Son dörd gündə şirkətdə nə baş verdiyindən isə xəbərsizəm".

Ölkə.az