"Azərbaycan ordusu dünyanın ən güclü ordusundan birinə çevrilib"

“İyunun 26-da Azərbaycan ordusunun yaranmasından 106 il keçir. Azərbaycan 1991-ci ildə müstəqilliyini yenidən bərpa etdikdən sonra Ulu öndər Heydər Əliyevin liderliyi altında ordumuz yenidən formlaşıdırılmağa başladı. Müzəffər Ali Baş Komandan İlham Əliyevin liderliyi altında isə Azərbaycan ordusu dünyanın ən güclü ordusundan birinə çevrildi”.

Ölkə.Az xəbər verir ki, bunu Milli Məclis sədri Sahibə Qafarova parlamentin bu gün keçirilən növbədənkənar sessiyasında deyib.

Spiker qeyd edib ki, Azərbaycan ordusu istər 44 günlük müharibədə, istərsə də 2023-cü ilin sentyabrında keçirilən birgünlük antiterror əməliyyatı zamanı qarşıya qoyulan ən mürəkkəb əməliyyatların öhdəsində gəlməklə tarixə  qəhrəmanlıq salnaməsi yazdı. “Ordumuzun qarşıya qoyulan hədəflərə nail olmaqla əzəli torpaqlarımız Qarabağ və Şərqi Zəngəzuru düşmən işğalından azad edib. Bu yolda canından keçib şəhidlik zirvəsinə yüksələn şəhidlərimizi və qazilərimizin rolunu yaddan çıxara bilmərik”, - o qeyd edib. 

Spiker həmçinin əlavə edib ki, bu müddət ərzində Azərbaycanın müdafiə potensialı gücləndirilib. “Bu da bölgədə  sabitliyin təmin olunmasına xidmət edib və etməkdədir. Əminəm ki, müzəffər Ali Baş Komandan İlham Əliyevin liderliyi altında Azərbaycan Silahlı Qüvvələri qarşıda duran vəzifələrini layiqincə yerinə yetirmək üçün daha da inkişaf edəcək və  dünyanın ən güclü orduları sırasında layiqli yerini tutacaq. 

26 iyun Ordu Günü münasibətilə başda müzəffər Ali Baş Komandan İlham Əliyev olmaqla bütün əsgər və zabitlərimizi təbrik edirik. Bu şərəfli işdə ordumuza uğurlar arzulayırıq”, - spiker bildirib.

Mürtəza
Ölkə.Az