Arif Hacılının rəqibləri Müsavatın seçkidən çəkilməsindən danışdı

 

Ruslan İzzətli: "Bu addımı atanlar ictimai yükdən qurtulmaq istəyiblər"; Üzeyir Cəfərov: "Seçkiyə qatılanda Arif Hacılını özümə əsas rəqib kimi sayırdım"

Müsavat Partiyasının seçkidən imtina etməsi əsas müzakirə mövzusuna çevrilib.

Parlament seçkilərində ən çətin dairələrdən biri 33 saylı Xətai dairəsi sayılır. Dairədə Hüseynbala Mirələmovun, Üzeyir Cəfərovun, Ruslan İzzətlinin və Arif Hacılının namizəd olması rəqabəti ən üst səviyyəyə gətirib çıxarmışdır. Ancaq dünən Müsavat Partiyasının seçkilərdən imtina etməsi heç şübhəsiz digər namizədlərin işinə yarayacaq.

Arif Hacılının rəqibləri D18 hərəkatının sədri Ruslan İzzətli və hərbi ekspert Üzeyir Cəfərov Müsavat Partiyasının seçkidən çəkilməsini Ölkə.Az-a şərh edib.

Ruslan İzzətli: "Hər bir partiyanın seçkidə iştirak edib etməmək hüququ var. Müsavat Partiyasının seçkiyə 4 gün qalmış seçkidən imtina etməsi öz hüquqlarıdır. Bəlkə də haqlıdırlar, bəlkə də haqsızdırlar. 33 saylı Xətai dairəsinə qaldıqda əsas rəqibim Arif Hacılı yox, Hüseynbala Mirələmovdur. Kampaniya dönəmində də, məhəllə görüşlərində də bildirmişik ki, əsas rəqibimiz YAP-ın namizədidir və biz onun üzərində kampaniya qurmuşduq. Arif Hacılı dəyərli bir insandır. MSK onlara bildirdi ki, istəsələr seçkidə iştirak edə bilərlər, onların adı seçki bulletinində olacaq.

Seçkiyə 4 gün qalmış seçkidən imtina etməyi düzgün hesab etmirəm. Müsavatın seçkidən çəkilməsinin hüquqi tərəfi yoxdur, bu ictimai yükdən imtina etmək deməkdir. Baykot qərarı ya seçkidən əvvəl, ya da seçkiyə 10 gün qalmış verilməlidir. Seçkiyə 4 gün qalmış baykotun heç bir hüquqi əsası yoxdur. Bu addımı atanlar ictimai yükdən qurtulmaq istəyiblər".

Üzeyir Cəfərov: "Çox təəssüflənirəm ki, Müsavat Partiyası seçkidən imtina etdi. Yaxşı olardı ki, Müsavat Partiyası axıra kimi seçkidə iştirak edərdi. Dairədə çox rahat təbliğat-təşviqat aparmışıq. Əsas rəqiblərimdən biri kimi Hüseynbala Mirələmov görünsə də, onu rəqib saymıram. Hüseynbala Mirələmovun komandası bizə təbliğat-təşviqatda xeyli maneələr etdilər. Seçki plakatlarının cırılması, şəkillərin qopardılması. Bununla bağlı Xətai Rayon Polis İdarəsinə və MSK-ya məlumat vermişdik.

Seçkiyə qatılanda Arif Hacılını özümə əsas rəqib kimi sayırdım. Ona görə ki, Arif Hacılı Azərbaycanın ana müxalifət partiyalarından birinin başqanıdır. Ancaq Arif Hacılının komandası təbliğat-təşviqatın başa çatmasına bir neçə gün qalmış işə başladılar. Arif Hacılı dairə üzrə heç bir görüş keçirməyib. Bundan sonra seçkinin nəticələrini tanımamaq kimi bir fikirləri olsa yalnış olacaq".

Səxavət Məmməd
Ölkə.Az