Mehriban Zeynalova: “Qadını xoşbəxt və güclü olan bir ölkənin millət vəkili olmaq istəyirəm”

Müsahibimiz 32 saylı Suraxanı 3-cü Seçki Dairəsindən deputatlığa namizəd Zeynalova Mehriban Heydərəli qızıdır.

Ölkə.Az Mehriban Zeynalova ilə müsahibəni sizə təqdim edir:

-Mehriban xanım, seçki kampaniyası, təbliğat-təşviqat necə keçdi?

-Mən bu kampaniyanı xalqla əsl təmas adlandırardım. Bəlkə ilk dəfə idi ki, Suraxanı sakinləri ərazidən deputat seçilmək istəyən namizədlə bu qədər yaxından təmas qurmaq imkanı əldə edirdilər. Əslində onlar özləri də bunu hər səfərində etiraf edirlər. Bəzən sakinlərə çox təəccüblü gəlirdi. Namizəd də qapı-qapı gəzib sakinlərlə görüşərmi? Onların suallarını dinləyib cavablandırarmı? Onlar üçün seçki demək yerinə yetirilməyən vədlər demək idi. Bəlkə elə buna görə də ilk görüşlərdə bizə şəxsi problemləri ilə müraciət edənlərin sayı çox olurdu. Amma mən və komandam hər dəfəsində seçicilərə bildirirdik ki, millət vəkili olmaq bir neçə küçəyə asfalt çəkmək, yaxud kiminsə dam örtüyünü təmir etdirmək demək deyil. Bunun üçün cavabdeh olan, dövlət büdcəsindən maliyyələşən qurumlar var. Millət vəkili demək ərazinin problemlərini ümumiləşdirib, bütün ölkə səviyyəsində bu problemlərin mövcudluğunu araşdırıb, insanların sosial rifahının yaxşılaşdırılması, problemlərin köklü həlli üçün qanunvericilik təşəbbüsü ilə çıxış etməkdir. Deyəsən, biz seçicilərimizi də buna inandıra bildik ki, onların qarşılaşdıqları bəzi problemlər köklü həll edilməlidir. 22 nümayəndə ilə kampaniya çərçivəsində 10 000-ə yaxın evin sakinləri ilə görüşüb, onların problemləri, tələb və təklifləri ilə bağlı söhbətlər apardıq. Ümumilikdə təbliğat və görüşlər 20 000-dən çox sakini əhatə edib. Bül-Bülə, Əmircan, Yeni Suraxanıda yerləşən 120 küçəni əhatə etmişik. Qərargahda 2 hüquq müdafiəçisi və 3 nümayəndə sakinlərin problemləri ilə maraqlanıb. Problemlər hamısı ümumiləşdirilib. Daha sonra bu problemlər əlaqədar qurumlara təqdim ediləcək. Yerlərdə 72-dən çox görüş keçirilib.

-Bu görüşlərdə nələrə nail oldunuz?

-İlk növbədə insanların seçkiyə olan münasibətinin dəyişdiyini hiss etdim. Biz bu münasibəti dəyişə bildik və mən bunu şəxsən özümün ən böyük uğurum hesab edirəm. Seçici inandı ki, onun rəyi əsas olmalıdır, o, istədiyi namizədə səs verməlidir. Elə ilk görüşlərdə hiss edirdik ki, insanlar onların səsinin həlledici ola biləcəyinə inanmır. Seçkiyə ümidsiz yanaşırlar. Biz onların bu fikrində müəyyən qədər dəyişiklik etməyə nail olduqsa, bu, böyük uğurdur. Seçiciləri problemlərin öyrənilməsi və birgə həllinin vacibliyinə inandırmaq lazımdır. Seçici biləndə ki, o, öz səsi ilə həm də ölkəmiqyaslı hansısa problemin həllinə yardımçı ola bilər, bu zaman münasibəti tamamilə dəyişir. Digər tərəfdən bizim üçün vacib olanı seçicilərin millət vəkili haqqında anlayışının dəyişməsi oldu. Bu, olduqca mühüm amildir. İnsanlar bu gün də millət vəkilinə əlçatmaz kimi baxırlar, halbuki deputat seçildiyi ərazinin ən xırda probleminə qədər bilməli, maraqlanmalıdır. Seçici millət vəkilini hər zaman yanında görməlidir. Təəssüf ki, bizdə bu vəziyyət çox başqadır. Elə insanlarla görüşlərdə də ilk düşüncə bu idi ki, seçiləndən sonra heç kəsin üzünü görmürük. Hətta seçilənə qədər də kimsəni görməməkdən şikayət edənlər vardı. Ona görə də bir çoxlarına namizədin öz komandası ilə evləri gəzməsi, problemlərlə, təkliflərlə yerində tanış olması qəribə gəlirdi. Seçicinin özünü həlledici hiss etməsi üçün düşünürəm ki, bu görüşlərin çox böyük əhəmiyyəti oldu. Ən azından onları bir çox məsələlərlə bağlı məlumatlandırdıq, əhalinin məlumatlılıq səviyyəsini artıra bildik. Seçicilər dövlət proqram və layihələrindən xəbər tutdular, hansı problemin həlli üçün hansı quruma müraciət edəcəkləri ilə bağlı məlumatlandılar. Bu mənim rəhbərlik etdiyim “Təmiz dünya” Qadınlara Yardım İctimai Birliyinin gündəlik vəzifəsidir. Ancaq mən seçiləcəyim təqdirdə təkcə qadınların səsi olmayacağam. Mən qadını xoşbəxt və güclü olan bir ölkənin millət vəkili olmaq istəyirəm. Bu, mənim ən böyük arzumdur. Azərbaycan qadının xoşbəxt görmək.

- Necə düşünürsüz, seçiciləri inandıra bildinizmi?

- Bunu qəti söyləmək çətindir, amma gün ərzində qərargaha çoxsaylı ziyarətləri nəzərə alsaq insanların münasibətinin olduqca isti olduğunu söyləyə bilərəm. Axşam saatlarına qədər qərargaha gələnlər vardı. Çox sadə qəsəbə adamları idilər, onları öz namizədləri maraqlandırırdı. İlk dəfə idi ki, bunu yaşadıqlarını deyirdilər. Namizədin qərargahına gəlmək, onu öz küçələrindəki hansısa problemlə tanış olmaq üçün aparmaq-bunlar bizim seçicilər üçün ilk idi və maraqlı gəlirdi. Buna dayanaraq seçicilərimin mənə dəstək verəcəyini əminliklə söyləyə bilərəm. İctimai rəyə də nəzər salanda bizim təbliğat-təşviqat kampaniyasını uğurlarını qeyd etməyə bilmirəm. Bu, təvazökarlıqdan uzaq kimi görünə bilər, amma həqiqəti başqası etiraf etməyəndə onu gərək özün dilə gətirəsən. Müəyyən qurumlar müxtəlif səsvermə kampaniyaları təşkil edir, virtual səsvermə, ictimai rəyin öyrənilməsi kimi müxətlif layihələr var. Bu layihələrdə də namizəd kimi adımın hər zaman öndə olması tutduğumuz yolda, apardığımız kampaniyanın uğurlu olmasından xəbər verir. Mane olmağa çalışanlar da az olmadı, onları bəlkə də qadın həmrəyliyi narahat edirdi, qorxudurdu. Amma onlar da doğruları görürlər, etiraf etməsələr belə. Mənə isə ancaq bu fəallığın seçki günü bir daha təkrarlanması üçün seçicilərimə müraciət etmək qalır.

-Əziz seçicilərim! Biz sizinlə güclüyük, mən sizin səsiniz olacağam. Qoy bu seçkilərdə sizin etimadınıza layiq olan qazansın!