İrəvan təhlükəli oyunlar oynamaqdansa, “3+3” formatına üstünlük verməlidir - Keryan

Avropa İttifaqı Ermənistanı gözləyir ki, nəhayətində Ermənistan qlobal anti-Rusiya siyasi proseslərdə iştirak edəcək.  

Ölkə.Az xəbər verir ki, bunu erməni politoloq Qarik Keryan deyib .

“Qərbin dəstəyi Ermənistanı Rusiyanın təsir zonasından çıxarmağa yönəlib. Gürcüstan Qərbin təsir zonasını tədricən tərk etdikcə bu dəstək daha da güclənir. Belə olan halda Qərb üçün Cənubi Qafqazda Ermənistanın çəkisi artır.
Qərb üçün əsas məsələ Ermənistandan 102-ci hərbi bazanı və rus sərhədçilərini çıxarmaqdır. Bundan əlavə, Qərb Ermənistanın anti-Rusiya sanksiyalarından yan keçərək maliyyə-iqtisadi proseslərini dayandırmasını istəyir", - politoloq qeyd edib.

Onun sözlərinə görə, nəzərə almaq lazımdır ki, Avropa İttifaqına doğru hərəkət təkcə Rusiya tərəfindən deyil, digər qonşular, xüsusilə də Avropa İttifaqı və ABŞ-nin sanksiyaları altında olan və bir nömrəli anti-dövlət olan İran tərəfindən də mənfi qarşılana bilər. "Hansı ki İran bölgədə ABŞ və Aİ-nin sanksiyası altında olan bir nömrəli anti-Qərb dövlətdir. Tehran da öz növbəsində regiondankənar qüvvələrin bölgəyə daxil olmasını mənfi qarşılayacağını və bununla mübarizə aparacağını dəfələrlə bəyan edib", - o qeyd edib.

Politoloqun fikrincə, Rusiyanın Cənubi Qafqazda təsirinin mümkün zəifləməsi halında İran bizim təhlükəsizliyimizin ən yaxın qarantı ola bilər: "Bizim üçün yaxşı heç nə vəd etməyən təhlükəli proseslərə tələsməkdənsə, “3+3” formatının gücləndirilməsi üzərində işləmək daha düzgündür”, - Keryan qeyd edib.

Mürtəza
Ölkə.Az