Vəkillər Kollegiyasının rəhbərliyi İran səfirliyinin nümayəndə heyəti ilə görüşüb

Vəkillər Kollegiyasında İranın Azərbaycandakı səfirinin vəzifələrini icra edən - müvəqqəti işlər vəkili Seyid Cəfər Ağayinin başçılıq etdiyi nümayəndə heyəti ilə görüş keçirilib.

“Ölkə.az” xəbər verir ki, bu barədə Vəkillər Kollegiyasından bildirilib.

Qeyd olunub ki, görüş çərçivəsində hər iki ölkə arasında qarşılıqlı və keyfiyyətli hüquqi yardımların təşkil edilməsinə dair ilkin müzakirələr aparılıb və gələcək əməkdaşlıqla bağlı təkliflər səsləndirilib.

Görüşdə çıxış edən Vəkillər Kollegiyasının sədri Anar Bağırov Azərbaycan və İran xalqları arasında dərin tarixə malik dostluq münasibətlərindən bəhs edib, rəhbəri olduğu qurumda görülən işlər barədə ətraflı məlumat verib.

Seyid Cəfər Ağayi baş tutan görüşdən məmnun olduqlarını və Kollegiyanın bu sahədə atdığı addımları yüksək qiymətləndirdiklərini vurğulayıb. O, hər iki ölkənin Vəkillər kollegiyaları arasında gələcək münasibətlərin daha da genişlənməsinin, habelə İran və Azərbaycan vəkilləri arasında sıx fərdi əlaqələrin yaranmasının vacibliyini söyləyib.

Sonda İran səfirliyinin heyətinə Vəkillər Kollegiyasının dəstəyi ilə nəşr edilmiş “Nizami Gəncəvi: nəsihətləri, kəlamları, hikmət və aforizmləri” kitabı və qurumun rəsmi emblemi hədiyyə edilib.