Nazirə töhmətli şeir, Rahidənin kartof kimi mahnısı, Nazəninin əri, Röyaya hörmətsizlik

Milli.Az jurnalist İntiqam Valehoğlunun müəllif layihəsi olan "Həftəbecər"i (51-ci say) təqdim edir.

Şouya keçməzdən əvvəl bir az daha ciddi məsələlərdən danışaq. Yəqin xəbəriniz oldu ki, Mədəniyyət və Turizm Nazirliyinin şöbə müdiri Vaqif Bəhmənli nazir Əbülfəs Qarayevə şeir yazıb. Camaat da sosial şəbəkədə bu şeirlə mırtlaşmağa başlayıb. Nazir də götürüb şöbə müdirinə töhmət verib. Camaat yenə başlayıb sosial şəbəkədə mırtlaşmağa. Axırda Vaqif Bəhmənli "Bəxt üzüyü" filmindəki rəis kimi qışqırıb ki, bəsdirin booy, bir səhvdi eləmişik də. Deyirəm, gör Əbülfəs Qarayev şöbə müdiri olsaydı və Vaqif Bəhmənliyə şeir yazsaydı, nə həngamələr qopardı ey. Bir şərtlə ki, Bəhmənli də nazir olaydı.

Tanınmış aktyor və şoumen Qorxmaz Əlili isə bir statusunda məcburi köçkünlərə, qaçqınlara həsəd apardığını açıq-aşkar büruzə verib. Bu haqda bir müəllif yazısı yazdım. Amma mövzuya yenidən toxunmağı özümə borc bilirəm. Öncə sitatı oxuyun:
"Qaçqınlara Bakı lazım idi, ona da nail oldular. Hökumət lazım idi, ona da nail oldular. Var-dövlət lazım idi, onu da aldılar. İyirmi faiz əsl qaçqınlıq həyatı sürdülər, o da reklama görə. Xaricdən gələn qonaqlara göstərmək üçün, yardım pulu almaq üçün. Aldılar, pulun dalına keçdilər, indi bizi bəyənmirlər".

İndi görün 57 yaşı olan bu adam düzgün danışırmı?..

Bir müğənni var idi ha, Rahidə Baxışova. Yenidən qayıdıb. Müsahibəsini oxuyub nə qədər gülmüşəmsə, hələ də böyrəklərim zoqquldayır. Rahidə xanım buyurur:

"Bir neçə bəstəkarla da danışmışam ki, mənə yaxşı hit mahnı yazsınlar". Dünyanın heç yerində belə məntiq yoxdur ha. Elə bil satıcıya deyirsən ki, Gədəbəy kartofunun yaxşısından iki kilo çək.

Elnarə Abdullayeva özünə yeni mənzil alıb, əməkdar artist adı alıb, sözün yaxşı mənasında, qazından bir az alıb. Məsələn, əvvəl deyirdi ki, kişi arvadı ayda bir dəfə döyməsə, ona kişi demərəm. İndi deyib ki, qadınları qısqanıram:

"Açığını deyim, mən qadınları qısqanıram. İstəmirəm ki, qadınlara güldən ağır söz deyilsin. Hər zaman xanımları qürurlu görmək istəyirəm. Düzdür, bu gün xanımlar çox əziyyət çəkir. Onlara bir tövsiyəm var, hər çətinlikdən keçirik. Amma çalışaq mənəviyyatımızı itirməyək. Bu, çox önəmlidir".

Bu şou-biznes əhli də müğənni Nazəninin əri Məhəbbət kişini bölüşdürüb qurtara bilmir də. Sənətçi həyat yoldaşı ilə bağlı yeni açıqlamalar verib. Deyib ki, Məhəbbət kişi onu 14 ildir sevir, Nazənin də Məhəbbət kişini səkkiz il ürəyində sevib. Gözləyin, bircə dəqiqə hesablayım... Hə, deməli, bəyin stajı xanımdan altı il çoxdur. Hələ sonrasına baxın. Məhəbbət müəllim Nazənin xanımı uzaqdan-uzağa sevibmiş. Elə bilin ki, mən Yasamalda oturub Las-Veqasdakı Rihannanı sevirəm. Nəysə, kişi görüb ki, Nazənindən bir hay çıxmır, başlayıb şou-biznes adamlarına "divan tutmağa". Biriylə gəzib, görüb ki, Nazənin qısqanmır, ikisiylə, üçüylə, görüb yenə Nazənindən səs çıxmır. Nəysə, axırda evləniblər, evlənəndən sonra yenə başlayıb şou-biznesdəki xalaların "soyqırımı" ilə məşğul olmağa. Kişi nətər ajıxlanıfsa, ər-arvad gediblər urisyetə, orada da xəyanət edib. Ardını Nazənin özü danışır:

"Bir dəfə onunla Rusiyaya sanatoriyaya getmişdik. Moskvada olanda Bakı nömrələrimizi bağladıq, başqa telefonlar işlətdik. Bir gün Bakı nömrəsini açanda çoxlu mesajlar gördüm. O qadın nömrənin açıq olduğunu görüb zəng elədi, telefona mən cavab verdim. Mənə "bacı" deyən o qadın, elə bildim, utanacaq. Əksinə, dedi ki, ver telefonu ona. Bir dəfə də başqa bir tanıdığım, mənə "bacı" deyən başqa bir qadın ona zəng edəndə telefona mən cavab verdim. Utandığından dedi ki, ərin mənə zəng edib. Bir də zəng eləsə, onu polisə verəcəm. O qadın gözümdə ucaldı, ona görə ki, mənim səsimi eşidib utanmışdı. Amma o birisi sənətçi qadın, əksinə mənə demişdi ki, ver telefonu ona. Bu xəyanətlər sevgimi nifrətə çevirirdi. Uşağımın atasıdır, həyat yoldaşımdır, onu yenə də sevirəm. Amma ürəyimi çox sındırıb, bunları heç vaxt unutmayacam. Hərdən məndən soruşur ki, etdiklərimə görə məni bağışlamağın üçün neyləyim?"

Allah xoşbəxt eləsin! Bircə o şou-biznesdə "soyqırıma" məruz qalmışların siyahısını əldə edə bilsəydim...

Təxminən beş gün əvvəl xəbər yayıldı ki, Röya Türkiyəyə gedəcək, orada "Bəyaz şou"nun qonağı olacaq. Xəbəri eşidən kimi şounun aparıcısı Bəyazit Ötürkün Eyyub Yaqubovla məzələnməyi yadıma düşdü və dərhal barmağımı dişlədim. Elə bu dəqiqə barmağımın birində "santavik" ola-ola yazıram. 
Deməli, nə baş verdi? Röyanı verilişin axırına 10-15 dəqiqə qalmış çağırdılar, bir mahnı oxudu. Sonra aparıcı nə dedisə, Röya başladı gülməyə. Axırda Bəyazit də dözmədi. Dedi ki, ay bala, axı mən gülməli bir şey demirəm, sən niyə gülürsən? Röya yenə başladı gülməyə...

İndi zarafatı qırağa qoyub reallıqları danışaq. Azərbaycanda hansı verilişdə Röyanı efirin sonuna 15 dəqiqə qalmış çağırıb bir mahnı oxutdursan qəbul edər? Təbii ki, heç bir verilişə.

Başa düşürəm, "Bəyaz şou"nun adı buralardan çox gurultulu səslənir. Amma inanın ki, bu şou Türkiyədə bizim Mikayılın "Sevimli şou"su kimi bir şeydir. Yəni əvvəlki şöhrəti qalmayıb. Hərçənd ki, hələ Mikayılın şousu burada daha reytinqlidir.

Sadəcə, bizə uzaqdır deyə, belə yekə görünür. Necə deyərlər, Yevlax Bakıdan uzaqdır, amma gəncəlilər üçün yarım saatlıq yoldur.

Ölkə.Az