"AKP-nin təkbaşına iqtidar olması müəyyən dönəm üçün əhəmiyyətlidir"

Türkiyədə hakim AKP yenidən təkbaşına hökumət qura biləcək sayda deputat yerinə sahib oldu.

Bundan əvvəlki seçkilərdə AKP-nin səs faizi bu partiyaya imkan vermədi ki, təkbaşına hökumət qursun, digər partiyalar da koalisiya məsələsində ortaq məxrəcə gələ bilmədiyi üçün təkrar seçkilər keçirildi və AKP yenidən tək hökumət qura biləcəyi sayda səsləri aldı.

Seçkinin nəticəsi elan olunan kimi MHP lideri Dövlət Bahçelinin istefa xəbəri yayıldı. Amma partiyadan verilən açıqlamada xəbər təkzib olundu. Bu dəfə parlamentə düşməsi gözlənilməyən HDP isə güclə parlamentə düşdü və bu dəfə MHP-ni deputat sayında geri qoyaraq Türkiyə Parlamentinin üçüncü böyük partiyasına çevrildi.

Türkiyədəki seçki prosesini politoloq Qabil Hüseynli Ölkə.Az-a şərh edib:

"İndiki şəraitdə koalision hökumət Türkiyəyə xeyir verə bilməzdi. Bir partiyanın təkbaşına iqtidar olmasının müəyyən dönəm üçün əhəmiyyəti var. Həm PKK-nı sıradan çıxarmaq, həm ölkənin iqtisadi yüksəlişini təmin etmək üçün tək partiyanın hakimiyyətə gəlməsi əsas şərtdir. Bunun mənfi cəhətləri də var. AKP mövcud siyasi sistemi dəyişdirmək, prezident üsul-idarəsinə keçmək istəyir. Bu isə həm Atatürkün siyasi sistemini sıradan çıxara bilər, həm də avtoritarizmə meydan aça bilər.

Seçkilərin kimlərsə tərəfindən tənzimləndiyi MHP-nin yığdığı səsdən görünür. AKP MHP-nin səslərinə bu və ya digər yollarla təsir göstərdi. HDP-nin parlamentə düşəcəyini heç kim gözləmirdi. Ancaq HDP nəinki parlamentə düşdü, hətta deputat sayını artırdı.

CHP lideri Kamal Kılıcdaroğlu kürd əsillidir. Eyni zamnda HDP-yə çox isti münasibət bəsləyir. Bu seçkilərin belə nəticələnməsində CHP-nin də rolu var. Türkiyədə seçkilər AKP hakimiyyətinin inzibati resursları hesabına tənzimləndi".

Qeyd edək ki, AKP artıq bu seçkini qazanmaqla üçüncü dəfədir ki, ardıcıl, təkbaşına hökumət qurmaq hüququ əldə etdi.

Səxavət Məmməd
Ölkə.Az