Əflatun Amaşov təşəkkür etdi

Ölkə.Az xəbər verir ki, Azərbaycan Mətbuat Şurasının sədri, 2015-ci il Milli Məclisə Saatlı rayonundan deputat seçilmiş Əflatun Amaşov ona etimad göstərənlərə təşəkkür edib.

Bu haqda sosial şəbəkədəki profilində status da yazan Mətbuat Şurasının sədri hər kəsə dönə-dönə minnətdar olduğunu bildirib.

"Parlament seçkisi hər bir şəxsin xalqı üçün çalışmaq əzminin böyük nümayiş meydanı, özünütəsdiq şansıdır.

Mən də bu şansdan yararlanmaq, daha geniş toplum üçün faydalı olmaq niyyətindəyəm”. Dönə-dönə təkrarlayacağım, məsuliyyətini daha həssaslıqla hiss edəcəyim bu fikirləri deputatlığa namizədliyimi irəli sürdüyüm zaman bildirmişdim. Əzmimi görən, insanlar üçün faydalı ola biləcəyimə inanan, özümü təsdiqləməm üçün mənə güvənən hər kəsə MİNNƏTDARAM!

Oktyabrın 13-dən başlanmış seçki kampaniyam çərçivəsindəki görüşlərdə barəmdə səsləndirdikləri xoş sözlərlə məni sözün yaxşı mənasında utandıran, eyni zamanda seçicilər qarşısında məsuliyyətimi təkrar-təkrar xatırladan dostlarımın, sosial şəbəkələrdə dəstəkləyən həmkarlarımın, adicə telefon zəngilə qələbəyə ruhlandıran əzizlərimin hər birinə dərin təşəkkürümü bildirirəm.

Dəyərli seçicilərim, əziz dostlarım, etimadınız güvənim, inamınız səsimdir - demişdim. Seçki kampaniyasına etimadınıza güvənərək, səslərinizin ölkəmizin daha da çiçəklənməsinə aparan yola əks-səda olduğuna inanaraq çıxmışdım. Bu yolda məni görməyiniz həyatımın, varlığımın ən böyük UĞURU-dur.

Mənə Azərbaycan Respublikasının Milli Məclisi kimi mötəbər tribunada təmsilçilik sevincini yaşatdığınız, bu sevincə layiq olduğuma inandığınız üçün VAR OLUN! Hər birinizə uğurlar, möhkəm cansağlığı arzulayıram. Uca Yaradan bizləri və torpağında nəfəs alıb Vətən dediyimiz müstəqil Azərbaycan Respublikasını qorusun!"

Ölkə.Az