Böyük Britaniya İŞİD-ə zərbələr endirəcək?

Böyük Britaniya qanunvericiləri Suriyada İŞİD-lə mübarizədə hava qüvvələrinin əlayhinədirlər.

Ölkə.Az "The Times"a istinadən xəbər verir ki, Böyük Britaniyanın baş naziri Devid Kemeron Suriyada İŞİD terror təşkilatı mövqelərinin bombardman edilməsi məsələsini parlamentdə səsverməyə çıxarmayacaq.

Məlumata görə, Kemeron bu məsələdə Leyboristlər partiyasından kifayət qədər deputatı inandıra bilməyib. Digər səbəblərdən biri kimi Rusiyanın Suriyada hərbi əməliyyat aparması göstərilir. Bildirilir ki, Böyük Britaniyaa Rusiya hərbi-hava qüvvələri ilə toqquşmadan qorxur.

Qanunvericilərin fikrincə, Suriyada vətəndaş müharibəsinin sonuna çatmaq üçün razılaşdırılmış beynəlxalq strategiyanın olması vacibdir. Parlament komitəsi bəyan edib ki, hökumət təklif edilən hava zərbələri ilə bağlı fundamental suallara cavab verməlidir.

Komitə Böyük Britaniyanın Suriyada hərbi iştirak məsələsini İcmalar Palatasına müzakirəyə çıxarmamağı tövsiyə edib.

Xatırladaq ki, 30 sentyabrda Rusiyanın Suriyada ilk hava zərbələrindən sonra Pentaqon İraq və Suriyada İŞİD-i bombalamağa davam edəcəyini bəyan etmişdi.

Rəşid Mustafazadə

Ölkə.Az