"Cavanşir" körpüsünün yerindəki yeni yoldan FOTOLAR

Xəbər verdiyimiz kimi, bu gün Xətai rayonu ərazisində “Cavanşir” körpüsünün yerində inşa olunmuş şəhər əhəmiyyətli yeni avtomobil yolunun açılışı baş tutub.

Ölkə.Az xəbər verir ki, Bakı şəhərində nəqliyyatın hərəkətinin tənzimlənməsi və tıxac probleminin nisbətən azaldılması məqsədilə salınan yol dörd hərəkət zolaqlıdır. 

Yolun uzunluğu 400 metr təşkil edir.

Qeyd edək ki, Xətai rayonu ərazisində Üzeyir Hacıbəyov küçəsində yerləşən və 1962-ci ildə istismara verilən “Cavanşir” körpüsü yükgötürmə qabiliyyətini itirdiyindən sökülüb. Həmin ərazidə dəmir yolu şəbəkəsinin ləğv edilməsi ilə körpünün əvvəlki əhəmiyyətini itirməsi, həmçinin yolötürücüsünün yükgötürmə qabiliyyətinin müasir normativ yük təsirinə cavab vermədiyi nəzərə alınaraq təhlükəsizlik baxımından bu qurğunun sökülməsi məqsədəuyğun hesab edilmişdi.

Uzunluğu 202 metr, eni 17,3 metr təşkil edən 12 aşırımlı “Cavanşir” körpüsü sökülərək, yerində şəhər əhəmiyyətli yeni avtomobil yolunun tikintisi işləri həyata keçirilib.
Yeni yol həm nəqliyyat vasitələrinin, həm də piyadaların ərazidə rahat və təhlükəsiz hərəkətini təmin etmək üçün yeni piyada səkiləri salınıb.