38 il o fotonu saxladı və ...

Amanda Skarpinati hazırda Nyu-Yorkda yaşayan, çoxlu dostları olan gənc və gözəl qadındır. Lakin heç kim 38 il əvvəl onunla nə baş verdiyini bilmirdi.

1977-ci ildə Amanda 3 yaşında olanda valideynləri onu otaqda bir neçə dəqiqəlik tək qoyublar. Onlar qızcığazın qışqırtısına qayıdıblar. Amanda yaxınlıqdakı qaynar suyun üstünə yuvarlanıb. Ağır yanıq xəsarətləri ilə xəstəxanaya çatdırılan uşaq orada müalicə olunmağa başlayıb.

Xəstəxanda körpə ömrü boyu ürəyində qalacaq biri ilə tanış olur. Tibb bacısı Syuzen Berqer Amandaya çox həssas və yaxın davranır, səmimi qayğı və fədəkarlıqla ona qulluq edir, onu daim əllərində gəzdirir, ağlayanda isə sakitləşdirir, güldürür.

Əməliyyatdan isə Karl Hovard tibb bacısı ilə üzü sıx sarğılı olan Amandanın fotosunu çəkir. Gələcəkdə isə bu foto qızcığaz üçün əsl dayağa çevrilir.

Xəstəxanadan çıxdıqdan sonra Amanda üçün çətin günlər başlayır. O, məktəbə getməyə başlayanda hər kəs ona çapıqlarına görə lağ edir, ələ salır. Evə ağlayaraq gələn qız hər gün adını bilmədiyi tibb bacısının fotosunu çıxarıb onunla danışmağa başlayır:

"Mən ona baxırdım, danışırdım. Dərhal sakitləşirdim. Mənim qayğıma qaldığını, məni sevdiyini hiss edirdim".

Bir neçə cərrahiyyə əməliyyatından sonra üzündəki çapıqlardan qurtulan Amanda uşaqlığındakı "mələy"ini axtarmağa qərar verir. "Facebook"da fotonu paylaşdıqdan sonra Syuzenin rəfiqələrindən biri onu tanıyaraq xəbər verir. Beləliklə, iki qadın 38 il sonra görüşür. Syuzen öz kiçik pasientini unutmadığını deyib. Amandanın bu illər ərzində fotonu saxlaması və onu tapmasından kövrələn tibb bacısı göz yaşlarını saxlaya bilməyib.

Amanda jurnalistlərin "bundan sonra dostluğunuz davam edəcək" sualına belə cavab verib:

"Biz indiyə kimi də dost idik. Sadəcə, o, bilmirdi". (axsam.az)