Trampı öldürməyə çalışan şəxsin cəsədi yoxa çıxdı - FOTO

ABŞ-də keçiriləcək prezident seçkilərində Respublikaçılar Partiyasından prezidentliyə namizədə Donald Trampa sui-qəsd təşkil edən şəxsin cəsədi yoxa çıxıb.

Ölkə.Az xarici KİV-ə istinadla xəbər verir ki, bu barədə ABŞ konqresinin üzvü Klay Hiqqins danışıb.

O, Trampa sui-qəsd cəhdi edən Tomas Metyu Kruksun cəsədinin “yoxa çıxması”na görə Federal təhqiqatlar Bürosunu (FBİ) ittiham edib. 
Konqresmen bildirib ki, o, avqustun 5-də Kruksun cəsədini görmək istəsə də, FBİ ona cəsədi kremasiya üçün ailəsinə verildiyini bildiriblər.

Hiqqins yerli hakimiyyət orqanlarının və tibbi ekspertizanın bundan xəbəri olmadığını deyib. Onun sözlərinə görə, FBİ belə bir qərar versə də, həkimin hələ də cəsəd üzərində qanuni səlahiyyəti var.

Konqres üzvü FBİ-ın niyə heç bir nəzarət olmadan cəsədi ailəyə qaytardığını soruşub və bunun gələcək istintaq səylərinə mane ola biləcəyini ifadə edib.

FBİ-ın bu hərəkətlərini "çox narahatedici" adlandıran konqresmen hesab edir ki, Amerika xalqı Trampa qarşı sui-qəsd cəhdi ilə bağlı tam həqiqəti bilməlidir.

Xatırladaq ki, 13 iyulda ABŞ-nin Pensilvaniya ştatında Respublikaçılar Partiyasının builki prezident seçkilərində namizədi Donald Trampın mitinqi zamanı atəş açılıb, siyasətçi xəsarət alıb.

Billurə