İran İsrailə zərbə endirməyi təxirə saldı – Səbəb
İran HƏMAS Siyasi Bürosunun rəhbəri İsmayıl Haniyənin Tehranda öldürülməsinə görə İsrailə cavab tədbirlərini təxirə salmaq qərarına gəlib. Məqsəd vasitəçilərə Qəzza zolağında atəşkəs əldə etmək üçün işləməyə mane olmamaqdır.
"Ölkə.az" xəbər verir ki, bu barədə “Nyu York Tayms” Amerika, İran və İsrail rəsmilərinə istinadla yazıb.
İran rəsmiləri nəşrə bildirib ki, danışıqların birinci günü başa çatdıqdan sonra (Dohada baş tutan 15-16 avqust danışıqları – red.) Qətərin Baş naziri Məhəmməd bin Əbdülrəhman əs-Sani İranın xarici işlər naziri vəzifəsini icra edən Əli Bagiri Kaniyə zəng edib və danışıqların getdiyi bir vaxtda hər hansı gərginlikdən çəkinməyə çağırıb.
Söhbət zamanı onlar regionda sakitliyin və gərginliyin azaldılmasının zəruriliyini vurğulayıblar. Eyni zamanda, Bagiri Kani qeyd edib ki, Qətərin baş naziri münaqişənin sona çatması ilə bağlı danışıqların “həssas” mərhələdə olduğunu bildirib.
Qeyd edək ki, ABŞ, Misir, Qətər və İsrailin iştirak etdiyi danışıqlar 21 avqustda Qahirədə davam edəcək.(Axar.az)