Deputat: Məscidlər dövlət əleyhinə mübarizə meydanına çevrilməməlidir

"Azərbaycanda islami qüvvələrin nə hakimiyyətə gəlməsi mümkündür, nə də xalq onları bütövlükdə müdafiə edəcək"

Bir neçə gün öncə Gəncə şəhərində dindarlar aksiya keçirməyə cəhd etdi və bir neçə nəfər saxlanıldı. Dünən gecə isə dindarlar Bakının Bakıxanov qəsəbəsində etiraz aksiyası keçirib. Dindarların etiraz aksiyası keçirməsinə səbəb “Müsəlman birliyi hərəkatı”nın sədr müavini Elçin Qasımlının polis tərəfindən saxlanılması olub. Aksiya zamanı 20 nəfər polis tərəfindən saxlanılıb.

Ölkədə son zaman baş verən dini hərəkətliliyi Millət vəkili Zahid Oruc Ölkə.Az-a şərh edib:

"Bakıxanov qəsəbəsində, həmçinin Gəncədəki məsələlərdə məhz İran üzünün olması fikirlərini çox da dəqiq saymıram. Çünki bir sıra versiyalar bəzən əsl tərəfləri gizdətmək üçün yayılır. Bunların hansı dairələr vasitəsi ilə edildiyi də Azərbaycanın təhlükəsizlik orqanlarına bəllidir. Bununla bərabər bir məsələ faktdır ki, həqiqətən Azərbaycanı müstəqillik əldə edəndən sonra dünyəvilik modelindən çıxarmağa çalışan qüvvələr var. Bunu xarici qüvvələr vasitəsi ilə stimullaşdıranlar da həmişə meydandadırlar. Azərbaycanın lokal bir ərazisini, misal üçün Nardaranı bəzən İrandan gələn hansısa qüvələrlə əlaqələndirənlər mövcud olub. Təhsil dalınca gedən gənc hansısa bir qüvvənin idialoji, siyasi, dini cəhətdən yoluxdurulmuş və onların siyasi komikadzelərinə çevrilmiş şəxslər kimi dönüblər. Bunlar da danılmaz faktlardır.

Azərbaycanda dini inqilab qorxusu yoxdur. Bu ölkənin 3 fundament üzərində qurulduğunu yüz ilə yaxındır ki, söyləyirik. Burada müasirlik, avropaçılıq, türkçülük və din yanaşı qoyularaq bu dövlət təsis edilib. Bu fundamentdən birini laxladıb çıxaranda mütləq o dövlətin müvazinətinə təsir edəcək. Bütövlükdə bayrağımızı yaşıla boyamaq da, yaşıl inqilabı həyata keçirmək də, eyni dərəcədə təhlükələrə yol aça bilər. Azərbaycanda islami qüvvələrin nə hakimiyyətə gəlməsi mümkündür, nə də xalq onları bütövlükdə müdafiə edəcək".

- Ölkəmizdə məscid tələbləri nəyə görə məktəb tələbini üstələyib?

- Peyğəmbərə əlehisalamımız 15 əsr bundan əvvəl bu müqəddəs dinin yaradılmasını Allahdan gələn vəhlə buyurarkən bütün böyük insani xüsusiyyətləri ortaya qoyan dini kitabın, yəni, Quranın yaranması ilə bərabər orada o fikirlər də söylənilirdi ki, məktəb, məsciddən üstündür. Çünki elm Çində də olsa dalınca gedin sözlərinin mənası o idi ki, təhsilin, elmlənməyin, ziyalıya çevrilməyin işığı sadəcə məsciddə namaz qılmaqdan üstün tutulub. Bizim peyğəmbərimiz bunu buyurmuşdu. Özünü qatı dindar sayan qüvvələr də bunu unutmamalıdırlar. Məscidlər siyasi partiyalar evinə çevrilə bilməz. Məscidlər dövlət əleyhinə mübarizə meydanına çevrilməməlidir. Bu üzdən Azərbaycanda dindar şəxslərlə, etiqad edənlərlə dövlətin heç bir savaşı yoxdur. Məscidlərin, xüsusi dini yerlərin dövlət tərəfindən necə bərpa olunduğunu da görməkdəyik. Ancaq dövlətlə dinin dəqiq sərhədləri var. O sərhədlər bir-birinə qarışanda mütləq ictimai normalar pozulur.

Müxtəlif dindar şəxsləri ekstansiyalara məruz qoymaq, onları öz təsirinə salmaq, fundamentalizm cərəyanlarının yeminə çevirmək, onlardan sanki bütün ətraf aləmdən təcrid olunmuş varlıqlar kimi mücahid yetişdirmək niyyətində olan ərəb dünyasındakı qüvvələrdən fərqli olaraq bizdə bütövlükdə xalq daha çox mülki cəmiyyəti, moderini, qaydaların hüququ və qanunun əsaslara daha çox daşınmasını nəzərə alır, nəinki şəriət normalarından olmasını. Son hadisələr fonunda, hadisələrin arxasında dayanan qüvələr fikirlərindən daşınacaqlar.

Açıq şəkildə müşahidə etməkdəyəm ki, müxalif siyasi partiyalar daha da zəifləyəndə mütləq bütün hakimiyyət əleyhinə olan qüvvələrin önünə dindarları çıxarmaq istəyirlər. O missiyanı onların üzərinə qoyurlar. Doğurdanmı qərb dairələri istəyir ki, Azərbaycanda dini inqilab baş versin? Məsələn Azərbaycanda İrandakı kimi ayətullahlar, müştehidlər hakimiyyətə gəlsin? Qətiyyən. ABŞ da, Avropa dairələri də bunu istəmir. Rusiyanın özü dindarların Azərbaycanda və yaxud Şimali Qafqazda hakimiyyətə gəlməsini istəyər? Xeyir. Rusiya yaxşı bilir ki, ərazisində 22 milyonluq həmin modeldə dövlətlər qurula bilər. Son hadisələr, xüsusilə də gəncləri öz arxasınca aparmağa çalışmaq, onlarla dövlətin münasibətlərini zədələmək və bu vasitə ilə guya hakimiyyət orqanları kimlərinsə dini inancına mane olur, onlar azadlıq sevərdilər və bu ölkədə bunlardan başqa heç kəs demokratiyanı, fikir azadlıqlarını istəmir, yalnız bunlardır bunu istəyən. Ancaq gərəkəndə bunlar kiminsə əlini çox rahat öpə bilirlər. Ona görə də, əgər qul olmaqdan söhbət gedirsə Allahın və peyğəmbərin qulu olsunlar. Başqasının yox. Xidmət etmək anlamına gələndə öz dövlətinə, onun konstitusiyon normalarına əməl etmək dindarın da, ateistin də borcudur.

Səxavət Məmməd
Ölkə.Az