Baş mütəxəssis: “Keçən illərə nisbətən marşal qadınlarımızın sayı artıb”

“Formula 1 Qatar Airways Azərbaycan Qran Prisi 2024-ə hazırlıq çərçivəsində bu məkanda marşalların yanğınsöndürmə və xilasetmə üzrə təlimləri keçirilir. Bu təlimlərin məqsədi halqada baş verə biləcək yanğın hadisələrinin çevik və effektiv aradan qaldırılmasına yönəlib”.

Bunu APA-ya açıqlamasında Bakı Şəhər Halqası Əməliyyat Şirkətində İdman Departamentinin idman əməliyyatları üzrə baş mütəxəssisi Kamal Əliyarzadə deyib.
Onun bildirdiyinə görə, bu növ təlimlər artıq 5-ci dəfədir ki, keçirilir:

“Marşalların təlimi yarışdan 3 ay əvvəl başlayır. Onlar müxtəlif yaş qruplarından ibarətdir. 21 yaşından yuxarı insanlar marşal ola bilər. Marşalların 65 faizi kişilər, 35 faizi isə qadınlardan ibarətdir. Keçən illərə nisbətən marşal qadınlarımızın sayı artıb. Ötən mövsümün marşal heyətinin 80 faizi saxlanılıb. 2008 nəfərin marşal olmaq istəyini qeydə almışıq. Çatışmayan 20 faizi də bu müraciətlərə əsasən təmin etmişik”.