Bu ölkədə şagirdlərə məktəbdə telefon işlətmək qadağan edilir

Fransada şagirdlərin məktəblərdə mobil telefonlardan istifadəsinə qadağa qoyulur.

Ölkə.Az xarici KİV-ə istinadla xəbər verir ki, bu ildən pilot olaraq tətbiq edilməsi nəzərdə tutulan qanun layihəsi 15 yaşadək şagirdləri əhatə edəcək. 

Ölkə üzrə 200-ə yaxın ümumtəhsil məktəbi sınaqda iştirak edəcək və şagirdlər məktəbə gələndə telefonlarını təhvil verməli olacaqlar.Təhsil naziri Nikol Belloubet açıqlamasında bildirib ki, bu qadağanın məqsədi gənclərə “rəqəmsal fasilə” verməkdir. Onun sözlərinə görə, sınaq uğurlu olarsa, qadağa yanvar ayından bütün məktəblərdə tətbiq olunacaq.

Qeyd edək ki, Fransada yaradılmış komissiya uşaqların ekrana həddindən artıq məruz qalmasının onların sağlamlığına və inkişafına mənfi təsir göstərməsindən narahatlığını ifadə etmişdi. Martda nəşr olunan 140 səhifəlik hesabatda rəqəmsal cihazların yuxu problemlərinə, fiziki fəaliyyətin olmamasına, həddindən artıq çəki artımına və görmə qabiliyyətinə mənfi təsirlərə səbəb olması ilə bağlı “çox aydın konsensus” olduğu qənaətinə gəlinmişdi. 
Hesabatda qeyd olunub ki, uşaqların mobil telefonlardan istifadəsi 3 mrhələdə nəzarətdə saxlanılmalıdır: 1)11 yaşa qədər telefon istifadəsinə icazə verilməsin, 2)11-13 yaş aralığında olanlar internetsiz mobil telefonlardan istifadə etsin, 3) 15 yaşına qədər isə internetə çıxışı olan, lakin sosial şəbəkələrə icazə verilməyən telefonlar işlətməyə icazə verilsin.

Billurə Yunus