Tələbələrdən bunu tələb etmək qanunsuzdur, xəbərdarlıq edilməlidir

Universitetlərin tələbələrdən bunu tələb etməsi qanunsuzdur, xəbərdarlıq edilməlidir

"Bəzi universitetlər qeydiyyat üçün kəndirli qovluq, notarial təsdiqlər, DİM-dən və yaşayış yerindən arayış, "qonşudan arayış" və s. tələb edir".

Ölkə.Az xəbər verir ki, bunu Azərbaycan İnternet Forumunun prezidenti Osman Gündüz deyib. O, tələbə adını qazanan şəxslərdən əyani sənəd tələb edilməsini tənqid edib:

“Bu dərəcədə olacağını gözləmirdim. İnnovasiya və Rəqəmsal İnkişaf Agentliyi (İRİA) və Elm və Təhsil Nazirliyi (ETN) ETN bir neçə ay öncədən elan ediblər ki, universitetlərə qəbul olanlardan kağız sənədlər toplanmayacaq, paralel qediyyatlar olmayacaq, qeydiyyat yalnız portal.edu.az üzərindən olacaq.

Yəni tələbə sistemə daxil olanda özünün bütün sənədlərini (attestat, yaşayış yeri, DİM məlumatları, hərbi çağırışla bağlı məlumatlar, güzəşt hüququ verən sənədlər və s.) sistemdə görür və onları sadəcə təsdiqləyir. Bir daha təkrar edirik ki, tələbə heç bir sənədi sistemə yükləmir!

ETN universitetlərə də bu sənədlərə giriş imkanı yaradıb. Yəni universitetə tələbənin attestatı lazımdırsa, universitet öz giriş məlumatları ilə ETN sisteminə daxil olub onu görə bilir, bu məlumatların hamısını özünə çəkə bilir və s.

Bundan artıq nə olmalı idi? Yəni əsl rəqəmsal hökumət komponentləri bu qeydiyyat prosesində qurulub.

Qurumlar gecə-gündüz çalışıb rəqəmsal bir platforma qurublar. İndi görək real vəziyyət necədir? Ötən gündən başlayaraq biz bu prosesi monitorinq edirik.
Monitorinqin bəzi nəticələri çox düşündürücüdür və çox təəssüf doğurur”.

O.Gündüz əyani sənəd tələb edən ali təhsil müəssisələrinin adlarını da çəkib:

“Universitetlərin elanlarından görünür ki, yenə də portal.edu.az-dan kənar, paralel qeydiyyat aparanlar, kağız sənədlər tələb edənlər var:
1. BDU - heç bir sənəd və paralel qeydiyyat tələb etmir;
2. AzTU - heç bir sənəd və paralel qeydiyyat tələb etmir;
3. BMU - özü üçün kağız formada əlavə sənədlər tələb edir;
4. GDU - özü üçün "kəndirli qovluq" və digər çoxsalı sənədlər istəyir, köhnə Yevlax avtovağzalının yanında:
5. ATU - əlavə çoxsaylı kağız sənədlər tələb olunur;
6. ADPU - əlavə kağız sənədlər tələb olunur;

Ümid edirəm, ETN və İRİA da bunlardan xəbərdardır. Güman ki hökumət fərqindədir ki, dövlətin ayırdığı bu qədər resurslar "kəndirli qovluq" dövrünə qayıtmaq üçün nəzərdə tutulmayıb.

Anlamıram ki, bu tip absurd və qanuna zidd, tələbələrdə və valideynlərdə çaşqınlıq və narazılıq yaradan, hökumətin apardığı siyasətə sayğısızlıq nümayiş etdirən bu tip elanlarla universitetlər nə demək istəyirlər.

İnanıram ki, ETN və İRİA tez bir zamanda universitetlərə xəbərdarlıq edəcək və bu tip elanlar hər yerdən yığışdırılacaq”.

Billurə