Zelenski Kurskda tələyə düşdü: Putin vəziyyəti dəyişdi
Kiyev Kursk əməliyyatını keçirməklə ən azından bir neçə məsələdə hansısa ciddi strateji uğurlar əldə etmək planını nəzərdə tuturdu. Planlardan biri rus ordusunun diqqətini işğal etdiyi Donetsk bölgəsindən yayındıraraq Kurska yönəltmək idi. Amma düşünüldüyünün əksi baş verdi. Belə ki, rus ordusu diqqətini Kurska deyil, Donetskə yönəltməklə Kiyevin oyununu pozmaq taktikasını seçdi. Rus ordusu Donetskdə bir sıra strateji məntəqləri ələ keçirmək üçün hücum əməliyyatlarını aktivləşdirdi və buna da nail olmaqdadır. Hazırda rus ordusu ukraynalılar üçün strateji əhəmiyyət kəsb edən və Donetskdə Ukrayna ordusunun nəzarətində olan Pokrovsk şəhər istiqamətində əməliyyatlarını aktivləşdirib. Rus ordusu şəhərin yaxınlığınadək irəliləyib və bir neçə gündür ki, şəhər uğrunda qızğın döyüşlər gedir. Ukrayna ordusu rus ordusunun qarşısını almaqda ciddi çətinliklərlə üzləşməkdədir. Artıq Ukrayna ordusu Pokrovsk şəhərini itirmək təhlükəsi ilə üz-üzədir. Əgər Ukrayna ordusu Pokrovsk şəhərini itirərsə, o zaman rus ordusu nəinki Donetskə tam nəzarəti ələ keçirməyə və digər əyalətlərin inzibati ərazisinə çıxaraq həmin vilayətləri təhdid altında saxlamaq imkanı əldə edəcək.
Ukraynalı hərbi ekspert Oleq Jdanov “Kommersant”a müsahibəsində deyib ki, Pokrovsk Ukrayna üçün mühüm yerdir, çünki bu, mahiyyətcə Donetsk vilayəti ilə inzibati sərhədə gedən yolda sonuncu aqlomerasiyadır.
“Pokrovskdan Kramatorski mühasirəyə almaq üçün şimala, cənuba isə Zaporojye vilayətinə sərhəd boyunca irəliləmək üçün imkanlar yaradır”, - ekspert bildirib.
Yaranmış vəziyyətin Kiyev üçün ciddi təhlükə olduğunu həm ukraynalı, həm də beynəlxalq hərbi ekspertlər açıq şəkildə qeyd edərək uğursuz və hesablanmamış nəticəyə görə Zelenskini tənqid atəşinə tutmaqdadırlar. Bu səbəbdən də Ukrayna ordusunun Kursk əməliyyatının Kiyevin, o cümlədən prezident Zelenskinin ziyanına işlədiyini bildirirlər.
"Financial Times"in Zelenskinin Kursk əməliyyatının uğursuz olduğu barədə məqaləsində qeyd olunub ki, bu avantüranın Moskvanı resursları yeni cəbhəyə yönləndirməyə və müharibənin tempini Ukraynanın xeyrinə dəyişməyə məcbur edəcəyinə ümid edirdi: “Lakin bu həftə strateji Donetsk bölgəsində cəbhə xəttində əldə edilən irəliləyiş Kiyev rəhbərliyinə qarşı reaksiyaya səbəb oldu və tənqidçilər Kursk əməliyyatından əvvəl döyüşlərdə sərtləşmiş minlərlə Ukrayna hərbçisinin yenidən yerləşdirilməsi ilə Ukraynanın mövqeyinin zəiflədiyini iddia etdilər”.
Rusiya qoşunları strateji əhəmiyyətə malik Pokrovsk şəhərinə yaxınlaşaraq, bu həftə yaxınlıqdakı bir neçə yaşayış məntəqəsini işğal etməklə Ukraynanın komplektləşdirilməmiş hərbi birliklərini müdafiə mövqelərindən geri çəkilməyə məcbur edib.
Ukraynanın “Frontelligence Insight” analitik qrupunun fikrincə, Pokrovsk Donetsk vilayətinin iki əsas dəmir yolu və avtomobil qovşağından biridir və onun itirilməsi bütün regionda Ukrayna ordusunun maddi-texniki təchizatını təhdid edəcək.
Finlandiyanın "Black Bird Group"unun açıq mənbəli tədqiqatçıları tərəfindən peyk şəkillərini təhlil edərkən rus qoşunlarının Pokrovskdan cəmi 8 km aralıda yerləşdiyini qeyd ediblər. Buna cavab olaraq yerli hakimiyyət bölgə sakinlərinin təxliyə edilməsinə göstəriş verib.
Kiyevin “İnformasiya Müqaviməti” qrupunun hərbi analitiki Aleksandr Kovalenko Pokrovskın şərq kənarındakı vəziyyəti “tam müdafiə uğursuzluğu” adlandırıb.
Bölgədəki bir neçə hərbçi Pokrovsk ətrafındakı müdafiə ilə bağlı narahatlığını bildirib.
Baxmut döyüşündə iştirak edən Mexanikləşdirilmiş Briqadanın hərbçiləri də Pokrovskda vəziyyətin sürətlə pisləşdiyini bildiriblər, hərbi komandanlığı döyüş şəraitinə qeyri-adekvat reaksiyalara və uğursuzluğa görə tənqid edib.
Ukraynalı döyüşçülər deyiblər ki, Pokrovsk Baxmutdan qat-qat tez düşmənə təslim olacaq.
Hətta prezident Zelenski keçirdiyi mətbuat konfransında Pokrovsk yaxınlığındakı cəbhə xəttindəki vəziyyətin "son dərəcə çətin" olduğunu etiraf edib.
Yaranmış durum onu deməyə əsas verir ki, Moskva mövcud vəziyyətdən faydalanaraq Ukrayna ərazisində hərbi əməliyyatları sürətləndirərək hücuma keçib yeni əraziləri işğal etməklə Kiyevi Kurskdan geri çəkməyi planlaşdırır. Çünki Kiyev Kurskdə ələ keçirdiyi əraziləri uzun müddət nəzarətində saxlamaq üçün əsas hərbi gücü bu istiqamətə yönəldib. Putin də Kiyevin planına adekvat cavab kimi Ukrayna ərazisində hərbi əməliyyat keçirməklə Ukrayna ordusunu Kursk istiqamətindən geri çəkilməsinə və bununla da cəbhə xəttinin zəifləməsinə nail olmaqla vəziyyəti öz xeyrinə dəyişmək istəyir.
Proseslər hansı istiqamətdə inkişaf edəcək bu barədə də hansısa proqnoz vermək çətindir. Amma hazırkı mərhələdə baş verənlər göstərir ki, Zelenski Kursk oyununun girovuna çevrilib. Çünki bu əməliyyatın sonunun necə bitəcəyini özü də bilmir. İş orasındadır ki, Kiyevə dəstək verən Qərb də çıxılmaz bu şəraitdə çıxılmaz vəziyyətə düşüb. Ona görə də təsadüfən demirlər ki, siyasətdə və hərbdə nəticəsi hesablanmayan əməliyyatların, planların bədəli ağır olur. Kursk əməliyyatı istənilən nəticəsini verməzsə, bu Zelenskinin nəinki ölkə daxilində beynəlxalq miqyasda da reputasiyasına və reytinqinə ciddi təsir göstərəcək.
Mürtəza
Ölkə.Az
