Ermənilərin yaraladığı çavuşun 11 min manatını kim mənimsəyib?

Silahlı Qüvvələrin müddətdən artıq həqiqi hərbi xidmət keçən, ötən ay cəbhə xəttində düşmənin açdığı atəşlə yaralanan kiçik çavuşu Samir Mirkazım oğlu Qəhrəmanov biganəlikdən şikayətçidir.

Kiçik çavuşun sözlərinə görə, o, Tərtər rayonunun N saylı hərbi hissəsində, düşmənlə ən yaxın - 17 metr məsafədə olan postda xidmət edib. Lakin sentyabrın səkkizində ermənilərin atdığı minomyotun qəlpələri onun bud hissəsini parçalayır. Əsgər Gəncə şəhəri 230 saylı xəstəxanaya yerləşdirildiyini və orada qaldığı 43 gün ərzində Müdafiə Nazirliyindən heç kimin onunla maraqlanmadığını bildirir.

Bu azmış kimi yaralandığı gündən bu günə kimi, ayın hər günü əsgərin maaş kartından 11 manat 15 qəpik tutulur. Bu hesabla Samir Qəhrəmanovun maaşından hər ay 350 manata yaxın pul çıxarılır.

Üstəlik, əsgər sığorta pulundan ona çatmalı olacaq 11 000 manatı da əldə edə bilmədiyini deyir. Əsanın ümidinə qalan Qəhrəmanov bildirir ki, qəlpələr sinirlərini və damarlarını zədələyib, vəziyyəti isə gündən-günə pisləşir, lakin müalicə almaq üçün pulu yoxdur.

Hərbi xidmətə yaramayan 1981-ci il təvəllüdlü əsgər ən azından əlillik dərəcəsi alaraq pensiyaya çıxmaq üçün ona köməklik göstərilməsini istəyir. (Qafqazinfo)

Ölkə.Az