Tural Abbaslı: \"O zaman özümüz Müsavat Partiyasından istefa verəcəyik\"

Tural Abbaslı müsahibələrinin birində bildirib ki, ola bilsin "Ağ Blok"u partiyaya çevirsinlər.

Buna cavab olaraq da Müsavat Partiyasının Mərkəzi Nəzarət-Təftiş Komissiyasının sədri Sevinc Hüseynova açıqlama verib ki, əgər Tural Abbaslı və ətrafındakı müsavatçılar partiya yaratsalar, Müsavat Partiyasından çıxarılacaqlar.

MNTK sədrinin fikrini Tural Abbaslı Ölkə.Az-a şərh edib:

"Mərkəzi Nəzarət-Təftiş Komissiyasının sədri Sevinc Hüseynova mətbuata çıxmaq üçün çox həvəslidir. Burada adi bir məntiq var. Biz nə vaxtsa "Ağ Blok"u siyasi partiyaya çevirsək, bu həm Azərbaycan qanunvericiliyində müəyyən olunub, həm də hər bir partiyanın nizamnaməsində var ki, bir şəxs ancaq bir partiyanın üzvü ola bilər. Biz elə bir addım atsaq, özümüz Müsavat Partiyasından istefa verəcəyik. Onların bizi çıxartmağına ehtiyac qalmayacaq. Dəfələrlə demişəm, partiya yaratmaq istəsək, özümüz istefa verəcəyik. Biz partiya yaradırıqsa, Müsavat Partiyasında niyə qalmalıyıq ki, bizi də oradan kimsə çıxarsın? Bu məntiqsizlikdir. Sadəcə olaraq gündəm yaratmaq üçün bilmirlər nə desinlər. Partiyanı bir ildir bərbad vəziyyətə qoyublar. Gündəmə partiyanın uğurları ilə gəlmək əvəzinə ancaq intriqalarla, "çıxartmaq", "qovmaq", "asmaq", "kəsmək"lə gəlirlər".

Qeyd edək ki, Tural Abbaslı və bir neçə müsavatçı ilə birgə 1 noyabr parlament seçkilərində Müsavat Partiyasından yox, "Ağ Blok"dan namizədliklərini vermişdi.

Səxavət Məmməd
Ölkə.Az