Azərbaycan vətəndaşının villasına basqın
Moskva ətrafında xüsusi təyinatl polis qüvvələri (“Spesnaz”) hələlik adı açıqlanmayan zəngin Azərbaycan vətəndaşının malikanəsinə basqın edib.
Ortada şok cinayət hadisəsi var.
57 yaşlı həmin Azərbaycan vətəndaşı Moskva Dövlət Beynəlxalq Münasibətlər İnstitutunun (MQİMO) 24 yaşlı azərbaycanlı tələbəsinin qətlini sifariş verməkdə ittiham olunur. Həmin tələbə azərbaycanlı zənginin qohumu ilə nikahdankənar münasibətlərdə olub.
Rusiya hüquq-mühafizə orqanlarındakı mənbə bildirib ki, Moskvada qisas zəminində sifarişli qətl cəhdinin üstü açılıb.
Məlumata görə 2013-cü ilin dekabrında 57 yaşlı Moskva sakini, Azərbaycan vətəndaşı iki tanışı ilə MQİMO-nun 24 yaşlı azərbaycanlı tələbəsini qətlə yetirmək məsələsində anlaşıb.
Cinayətin motivi tələbənin həmin azərbaycanlının yaxın qohumu olan qızla nikahdankənar münasibətləri olub.
Şübhəlilər qətli həyata keçirmək üçün öz aralarında rolları bölüşdürüblər və 2014-cü il fevralın 3-də cinayətin 30 yaşlı təşkilatçısı potensial qurbanla görüş barədə razılaşıb, bu yolla onu küçəyə çıxarıb. Cinayətin icraçısı tələbəni Moskvanın şəqindəki Pervomaysk küçəsində gözləyib və ona yaxınlaşaraq atəş açmaq istəyib. Bu zaman tələbə ilə killer arasında əlbəyaxa süpürləşmə olub, killer tapançadan beş dəfə atəş açaraq tələbəni əlindən, qarnından yaralayıb. Bundan sonra qaçaraq gizlənməli olub.
Bu sui-qəsdlə bağlı cinayət işi qaldırılıb. Moskva polisinin cinayət-axtarış bölməsinin əməkdaşları və müstəntiqlər tezliklə cinayətin təşkilatçısının və sifarişçisinin izinə düşə biliblər. Oktyabrın 7-də cinayətin təşkilatçısı və sifarişçisi Moskvanın Domodedovo rayonunda və Moskva ətrafındakı Lyubertsada xüsusi təyinatlıların köməyi ilə saxlanılıb. Bildirilir ki, Lyubertsada, zənginlərin yaşadığı Yar qəsəbəsində iki oğlu ilə birlikdə malikanədə yaşayan sifarişçi xüsusi təyinatlılara silahlı müqavimət göstərib
Əməliyyatçılar xüsusi təyinatlıların dəstəyi ilə səhər tezdən onun yaşadığı malikanəni mühasirəyə alıblar. Lakin şübhəlinin qohumlarından biri malikanənin pəncərəsindən avtomatik karabindən polislərə rast gələ atəş açmağa başlayıb. Xüsusi təyinatlılar bundan sonra ildırım sürəti ilə malikanəyə basqın edərək şübhəliləri zərərsizləşdiriblər. Əməliyyat zamanı evdəkilərdən və polislərdən xəsarət alan olmayıb. Qalmaqallı cinayət işi və onun fiqurantları barədə əlavə məlumatlar əldə etməyə çalışırıq. Saytımızı izləyin. (virtualaz.org)
Ölkə.az
