"Güneyli soydaşlarımızın yanındayıq!"

İran telekanallarından birində Azərbaycan türklərinin təhqir olunması etirazlara səbəb olub.

Azərbaycan türklərinin təhqir olunmasına etiraz olaraq İranın bir neçə şəhərində kütləvi etiraz aksiyaları keçirilib.

Bununla bağlı Azərbaycanda da etirazlar başlayıb. Millətçi gənclər İranın Azərbaycandakı səfirliyinin qarşısında aksiya keçirmək istəyiblər, ancaq polis aksiyanın qarşısını alıb.

İranda baş verən proseslərə Ana Vətən Partiyasının sədri Fəzail Ağamalı və "D18" hərəkatının sədri Ruslan İzzətli Ölkə.Az-da münasibət bildiriblər.

Fəzail Ağamalı: "Azərbaycan dövlətinin bu məsələyə qarışması doğru olmaz. Çünki İran dərhal bundan istifadə edərək Azərbaycana qarşı içində çölündə daşıdığı xoşagəlməz məqamları ortaya qoya bilər. Cəmiyyət olaraq, xalq olaraq təbii ki, güneydəki soydaşlarımızın yanında olmalıyıq. Onların müdafiəsinə qalxmalıyıq. Onların haqq işlərini müdafiə etməliyik. Çünki onların ünvanına söylənən təhqirlər eyni zamanda bizim ünvanımıza söylənilib. Bu təhqirləri fars şovinizmi illərdən bəridir ki, sərgiləməkdədir. İran əhalisinin əksəriyyətinin Azərbaycan türkləri olmasına baxmayaraq hakimiyyətdə olan farslar hər zaman Azərbaycan türklərini aşağılamağa çalışıblar, diskriminasiya siyasətini həyata keçiriblər, milli şüurun inkişafına, milli mədəniyyətin inkişafına imkan vermirlər. Məktəblər yoxdur. Azərbaycan türkcəsi məişət səviyyəsində bir dilə çevrilib. Bütün bunların hamısı yolverilməzdir. Öz haqları uğrundan mübarizə aparan quzeyli soydaşlarımız zaman-zaman bunlara qarşı öz iradələrini ortaya qoyublar.

Bir müddət öncə də soydaşlarımız təhqirlərə məruz qalanda üzr istədilər, bununla da məsələni bitmiş hesab etdilər. İndiki təhqir ciddi etiraza səbəb olandan sonra üzr istənilsə də, düşünürəm ki, bunlar yetərli deyil. İran rejimi Azərbaycan türklərinə qarşı münasibəti kökündən dəyişməlidir. Birmənalı olaraq onların milli hüquqları tanınmalıdır. Farslarla bərabər formalaşmasına imkanlar yaradılmalıdır. Molla rejimi başa düşməlidir ki, İrandakı bütün inqilablar, bütün dəyişikliklər quzeyli soydaşlarımızın birbaşa fəaliyyəti ilə bağlı olub.

Son hadisələr onu göstərdi ki, İran rejimi nə qədər sərt mövqe ortalığa qoysa da adi bir qığılcım soydaşlarımızın geniş hərəkatına gətirib çıxara bilər. Azərbaycan türklərinin etdiyi etirazın yanındayam. Onlarla bərabərəm. Bu məsələ ilə bağlı partiya olaraq bəyanat yayacağıq. Daim güneyli sodaşlarımızla bərabərik".

Ruslan İzzətli: "İran dövləti demokratik dəyərlərə, insan hüquqları və beynlxalq konvensiyaya əməl etmir. İran hər zaman öz ölkəsində yaşayan böyük toplumlar arasında ayrıseçkilik edir. Çox təəssüf ki, İranda bu hal ilk deyil. 2006-c ildə də İranın bir telekanalı Azərbaycan türklərini təhqir etmişdi.

D18 hərəkatı olaraq düşünürük ki, heç bir toplum təhqir olunmamalıdır. Onların haqları var, o haqlar qorunmalıdır. Beynəlxalq təşkilatlar, BMT bu məsələdə həssas olmalıdır. Bizim üçün qonşu ölkələrin demokratik olması çox önəmlidir. İranın da demokratikləşməsi Azərbaycana öz təsirini göstərəcək. Ancaq çox təəssüf ki, bu məsələdə əksini görürük. Azərbaycan dövləti də bu məsələyə həssas yanaşmalıdır. Dünyanın harasında olursa olsun, bir azərbaycanlının haqqı pozulursa Azərbaycan dövləti onun yanında olmalıdır. Necə olur ki, Bakıda iki dindar tutulur, İranın ən yüksək təbəqəsindən Azərbaycana təhdid gəlir, ancaq Təbrizdə, Urmiyada insanlar haqlı olaraq ayağa qalxır, ancaq Diaspora Komitəsi və XİN hələ də susur. Müxalif və iqtidar hər kəs bu məsələyə diqqət ayırmalıdır. Demokratiya heç bir ölkənin sərhəd məsələsi deyil".

Səxavət Məmməd
Ölkə.Az