Nazirlik 21 milyon manatlıq tender elan etdi
İqtisadiyyat Nazirliyi nəhəng bir İT layihəni tenderə çıxarıb. Layihə Milli Məkan Məlumatları İnformasiya Sisteminin yaradılmasını nəzərdə tutur.
Ölkə.Az xəbər verir ki, bunu Azərbaycan İnternet Forumunun prezidenti Osman Gündüz qeyd edib. O bildirib ki, tenderin ehtimal olunan qiyməti 21 milyon 881 min 253 manatdır.
“Anlaşıqlı desək, bu layihə ölkə miqyasında coğrafi məlumatların toplanması, saxlanması, emal edilməsi və istifadəsi üçün nəzərdə tutulan bir informasiya sistemini yaratmağı hədəfləyib.
Layihədə çoxsaylı məlumatların (topoqrafik, geoloji, ekoloji, şəhər yolları, su şəbəkələri, elektrik xətləri , su hövzələri, meşə sahələri və ya çirklənmiş bölgələr, şəhərsalma planları, fərdi torpaq mülkiyyətlərinin qeydiyyatı və kadastr məlumatları və s.) inteqrasiya olunduğu rəqəmsal xəritənin yaradılması nəzərdə tutulub.
Bu tip sistemin yaradılmasında əsas məqsəd məkan məlumatlarını effektiv və birgə şəkildə idarə etməklə dövlət və özəl sektor üçün, vətəndaş üçün daha effektiv qərar qəbuletmə proseslərini dəstəkləməkdir”.
O.Gündüz xatırladıb ki, bir neçə il öncə qəbul edilən qanunvericilikdə Milli Məkan Məlumatları İnformasiya Sisteminin yaradılması nəzərdə tutulsa da, indiyədək bunu reallaşdırmaq mümkün olmayıb:
“Hiss olunurdu ki, bu məsələdə müxtəlif qruplar arasında maraq toqquşmaları var.
İndi bu nəhəng İT layihəsi üzrə tenderə kim qatılacaq, kim qalib olacaq, bunu demək çətindir. Cəmi bir-iki İT şirkətimiz var ki, buna iddia edə bilər.
Bilmək olmaz, bəlkə də bu layihəni İsrail, yaxud Türkiyə şirkətlərinə həvalə edə bilərlər. Milli təhlükəsizlik baxımından bu, elə də uğurlu variant olmaya bilər.
Tenderin qalibi 16 noyabrda bilinəcək”.
Billurə Yunus
