Deputat: \"MTN məsələsi ilə Əli Abbasovun işdən azad edilməsi...\"

MTN şefindən sonra Rabitə və Yüksək Texnologiyalar naziri də işdən azad edildi.

"MTN işi" ilə bağlı öncə MTN-in Monitorinq Mərkəzinin (telefonların dinlənilməsi idarəsinin) əməkdaşları həbs edilmişdi. Daha sonra isə Rabitə və Yüksək Texnologiyalar Nazirliyinin aparat rəhbəri həbs olundu. Bu, BTRİB-in rəhbəri Beytulla Hüseynovdan sonra Əli Abbasovun həbs edilən ikinci işçisidir.

Rabitə və Yüksək Texnologiyalar naziri Əli Abbasovun işdən azad edilməsini də məhz MTN məsələsi ilə bağlayırlar.

Bu məsələni deputat Zahid Oruc Ölkə.Az-a şərh edib:

"Bunlar sırf əməliyyat məlumatlarıdır. Onlar haqqında siyasi fikir söyləmək çox çətindir. Ötən dəfə sırf təhlükəsizlik baxımından danışmışdıq. İndiki halda dinləmə qurğuları, kommunikasiya vasitələrindən istifadə etməklə işin görülməsi, elektron cəsusluq kimi məsələlər professionalların işidir.

Əli Abbasovu kifayət qədər müsbət, dövlətçilik yönündə çox işlər görən biri kimi tanımışıq. Ancaq bunun qarşılığında eyni zamanda onun tabeçiliyində olan adamlar vətəndaş üzərində, xüsusilə dövlətin elitasına daxil olan, öz fəaliyyətləri ilə uzlaşmayan məlumatlar toplamaq üçün işlər görüblərsə, onun qiymətləndirilməsi bizlər tərəfindən deyil, ölkə rəhbərliyi, güc orqanları tərəfindən olmalıdır. MTN məsələsi ilə Əli Abbasovun işdən azad edilməsindəki bağlılığı söyləmək indiki halda çox çətindir".

Qeyd edək ki, Əli Abbasovdan öncə MTN şefi Eldar Mahmudov vəzifəsindən kənarlaşdırılıb.

Səxavət Məmməd
Ölkə.Az