"Bu gün müəllimlərin işə qəbulunda hansısa neqativ hallar yoxdu" - Emin Əmrullayev
"Bizim imtahanlar qəbul prosesində çox uzun müddət ərzində mövcud olan neqativ praktikaların həlli üçün yaradılmış alətdir. Oxşar məsələni Müəllimlərin İşə Qəbul (MİQ) imtahanı ilə bağlı da demək olar".
Ölkə.Az xəbər verir ki, bunu elm və təhsil naziri Emin Əmrullayev Təhsildə Yeni Çağırışlar V Beynəlxalq Forumunda çıxışı zamanı deyib.
"MİQ şəffaf olmayan prosedurların aradan qaldırılması üçün düşünülüb. Bu bir problemi həll edib, yəni bu gün müəllimlərin işə qəbulunda hansısa neqativ hallar yoxdur. Amma bu dərmana oxşayır. Sonradan yan effekti yaranır.
Biz müəyyən etməliyik ki, müəllimlərin biliyə əsaslanan seçimi bizi hara gətirib çıxara bilər, bunun təhlükələri nədir.
Biz geri qayıdıb müəllimləri fərqli formatda seçə bilərikmi? Bu həqiqətən də vicdan məsələsidir" - o bildirib.
Nazir sonda bütün müəllimləri 5 oktyabr Beynəlxalq Müəllimlər Günü münasibətilə təbrik edib:
"Beynəlxalq Müəllimlər Günündə hər bir müəllimimiz özünə sual verməlidir ki, o müəllim adını niyə daşıyır. Müəllim adını daşımasının arxasında duran məsuliyyəti bir daha dərk etməlidir. Bu məsuliyyəti düşünməlidir. "Necə edə bilər ki, gələcək nəsil daha yaxşı böyüsün?" sualına verdiyi cavabla özünü təbrik etməlidir. Çünki bu sualın cavabı həmişə müsbət olur. Bir daha bayramınızı təbrik edirəm və forumun işində uğurlar arzulayıram".
Billurə Yunus
