Erməni lobbisi və əlaltılarının bu canfəşanlığı faydasızdır

"Azərbaycan qlobal miqyasda ən mühüm hadisələrdən biri hesab edilən BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasına (COP29) ciddi hazırlaşır. Hazırlıq işləri isə ən yüksək səviyyədə həyata keçirilməkdədir. Azərbaycanın məqsədi COP29 vasitəsilə qlobal iqlim dəyişikliyinə qarşı mübarizəni bir həmrəylik tədbirinə çevirməklə problemin aradan qaldırılmasına nail olmaqdır.

Digər tərəfdən isə COP29 qlobal miqyasda ən mühüm hadisələrdən biri olaraq ilk dəfədir ki, postsovet məkanında keçirilir. Bu da Azərbaycanın beynəlxalq miqyasda nüfuzunun və rolunun artmasına, eyni zamanda ən yüksək liqaya daxil olmağımız üçün misilsiz bir şansdır. Təbii ki, Azərbaycanın bu nailiyyətləri erməni lobbisinin və onun nəzarətində olanları, ölkəmizi gözü götürməyənləri çox ciddi narahat etməkdədir. Bu qüvvələr Azərbaycanın uğurlarını həzm edə bilmədiklərindən hər vasitə ilə bunlara kölgə salmağa çalışırlar. COP29-un Azərbaycan keçirilməsi barədə qərar verildiyi ilk gündən anti-Azəraycan qüvvələrin, erməni lobbisi və onun əlaltılarının ölkəmizə qarşı çirkin kampaniya aparacağı gözlənilən idi. Həmin bədxah qüvvələr ilk gündən COP29-la bağlı davamlı olaraq qarayaxma kampaniyasını aparıblar. Toplantının vaxtı yaxınlaşdıqca isə bu bədxah qüvvələr daha aktiv formada Azərbaycana qarşı çirkin, iyrənc formada qarayaxma kampaniyasına başlayıblar".

Bunu Ölkə.Az-a açıqlamasında deputat Aydın Hüseynov deyib

O deyib ki, bu bədxah qüvvələr COP29-u Azərbaycana qarşı təzyiq alətinə çevirməyə çalışırlar: "Ölkəmizə qarşı bu çirkin kampaniyada daha çox erməni lobbisinin əlində alət olan fransız deputatlar, siyasətçilər çıxış etməkdədir. Bunlardan biri də hər zaman ermənipərəst mövqeyi ilə tanınan Avropa Parlamentinin yeni seçilmiş vitse-prezidenti, fransız diplomatı və siyasətçisi Natali Luazodur. Luazo hər zaman olduğu kimi, bu dəfə də öz xislətinə sadiqlik nümayiş etdirərək Azərbaycana qarşı iftira və qarayaxma kampaniyasına başlayıb. Biz onun və onun kimilərin indiyədək bu cür dırnaqrası fəaliyyəti ilə yaxından tanışıq. Əksinə, onlar bu cür "fəaliyyəti"nin bədələni müdafiəsinə qalxdıqları Ermənistan ödəyib. Bu cür "fəaliyyətlə" kimsə Azərbaycanı indiydək öz yolundan döndərə bilməyib və buundan sonra da döndərə bilməyəcək. Ona görə də Luazo kimlərin ölkəmizə qarşı bu qarayaxma kampaniyası hər zaman olduğu kimi yenə də iflasa uğrayacaq. Bu yerdə Prezident İlham Əliyevin oktyabrın 10-da Pre-COP29 tədbirinin iştirakçılarına müraciətindən iqtibas gətirmək yerinə düşər: “Burada Azərbaycanın imicini ləkələmək məqsədi daşıyan qarayaxma kampaniyasına toxunmaya bilmərəm. Bu cəhdlər əbəsdir və bizi iqlim dəyişmələrinin mənfi təsirləri ilə mübarizə aparmaq üçün nəcib missiyamızı həyata keçirməkdən çəkindirə bilməz”.

Ümumiyyətlə, iqlim dəyişikliyi qərbli siyasətçilər tərəfindən çox tez-tez siyasi təzyiq aləti kimi istifadə olunur. Bu, onların klassik taktikasıdır. Hər il növbəti COP konfransı öncəsi Qərb bu tədbirin sədri olan dövlətə təzyiqi artırır. Biz bunu 2022-ci ildə Şarm-əl Şeyxdə keçirilən COP27 öncəsi, ötən il Dubayda keçirilən COP28 tərəflərin konfransı zamanı da görmüşük. İndi də uydurulmuş bəhanə altında COP29-un sədr dövləti Azərbaycana təzyiqin artırıldığını müşahidə edirik. Amma bu dairələr birdəfəlik anlamalıdırlar ki, Azərbaycana təzyiq göstərmək istiqamətindəki canfəşanlığı faydasızdır".

Mürtəza
Ölkə.Az