Xəqani Məmmədovdan qalmaqallı video haqqında açıqlama:

“Bu videonun yayılması haqqında hələ 6 ay əvvəl məlumatlı idik. Anar Salmanov özü demişdi ki, şantaj edəcəm, Xaqani Məmmədovu ləkələmək üçün hər yola əl atacam”.

Ölkə.az xəbər verir ki, bu sözləri apasport.az saytına AFFA Hakimlər Komitəsinin sədri Xaqani Məmmədov deyib.

2001-ci ildə UEFA kubokunun seçmə mərhələsi çərçivəsində Xorvatiyada baş tutan “Osiek” – “Dinaburq” görüşü ilə bağlı video yayılıb. Videoda o vaxt 4-cü hakim funksiyasını yerinə yetirən Xaqani Məmmədovun baş hakim Asim Xudiyevə “qonaqlar heç-heçə üçün 15 dənə verirlər” dediyi eşidilir.

Komitə sədri isə bunun montaj olduğunu bildirib: “Bu, 14-15 il əvvəl olan bir şeydi. Mən həmin videoya heç baxmamışam, baxmaq da istəmirəm. Belə bir hadisənin olması heç yadıma düşmür. Bilirik ki, bu, Anar Salmanovun məhsuludu. Maraqlıdır ki, bizdən əvvəl “Qəbələ”nin baş məşqçisi Roman Qriqorçukdan müsahibə alıblar. Qriqorçuk həmin vaxt qonaq komandanın baş məşqçisi idi. O deyir ki, belə bir şey olmayıb, bundan söhbət gedə bilməz. İkincisi, belə bir təklif var idisə, həmin komandanın qapısına niyə penalti təyin olundu? Üstəlik, qonaqlar o görüşdə məğlub olmuşdular. Əgər bizim onlara kömək etmək məqsədimiz olsaydı, komanda qələbə qazanardı da, uduzmazdı ki. Yəni, belə bir şey olmayıb. Bunu ustalıqla montaj ediblər. Çünki 6 ay əvvəl eşitmişdik ki, belə bir video hazırlanır”.

Məmmədovun fikrincə, FİFA dərəcəli hakim Əliyar Ağayevin Avrokubokun qrup mərhələsinə təyinat alması Anar Salmanovda qısqanclıq yaradıb: “Əgər bu məsələ 6 ay əvvəl gündəmə gəlibsə, video niyə məhz indi üzə çıxır? Məhz bizim hakimimiz Əliyar Ağayev Avrokubokun qrup mərhələsinə təyinat aldıqdan sonra video yayılır. Bu uğur onların gözünə sancı kimi daxil olur, gözləri götürmür. Anar Salmanov orda-burda danışmasın ki, mənim xəbərim yoxdur. Mətbuata ötürür, sonra da deyir ki, xəbərsizəm”.

Sabiq FİFA referisi AFFA-da bu video ilə bağlı komissiya yaradılmasını da normal qarşılayıb: “Onsuz da, araşdırılacaq”.

Qeyd edək ki, sözügedən oyunda “Osiek” öz meydançasında 1:0 hesabı ilə qələbə qazanaraq, növbəti mərhələyə vəsiqə qazanmışdı.

Ölkə.az