Soruşanda ki, orada nə baş verir, müfəssəl cavab ala bilmirik - Emin Əmrullayev

"Kadr hazırlığı məsələsi olduqca önəmlidir. Kadr hazırlığına elə sahələr var ki, düşünürəm ki, dini sahə də buna oxşardır. Başqa sahələrdən nümunələr də gətirəcəyəm. Burada nüəyyən mənada həm ixtisasların özləri, həm də ayrı-ayrı bakalavr və magistratura üzrə ixtisasların müəyyənləşməsinə düşünürəm ki, böyük ehtiyac var". 

Ölkə.Az xəbər verir ki, bunu elm və təhsil naziri Emin Əmrullayev “Müasir dini təhsil modelləri ənənələr və qlobal çağırışlar kontekstində" mövzusunda elmi praktik konfransda çıxışı zamanı deyib. O bir sıra ixtisasların nə üçün həm bakalvr, həm də magistraturaya bölünməməsi gərəkdiyindən danışıb:

"Özünəməxsusuluğu ilə seçilən tibb təhsilini nümunə gətirə bilərəm. Məsələn, tibb təhsili ilə bağlı dünyanın heç bir yerində bakalavr və magistratura formasında verilmir. Əsas baza tibb təhsili olur, ondan sonra tibbi təhsilin müxtəlif formatları gəlir.
Heç də məcburiyyət yoxdur ki, biz bütün sahələri bakalavra və magistra bölək.
Bu, bizə görə çox ağrılı mövzudur. Musiqi və ya mədəniyyət sahəsində olan ixtisaslardan misal gətirsəm, fikrimi daha yaxşı başa düşəcəksiniz. Məsələn, tar ifaçısı bu uşaq 7-ci sinfə qədər tar ifaçılığını öyrənib. Sonra 10 illik məktəbdə öyrənib. Orta ixtisas təhsili alıb yenə tar ifaçısı olub, sonra bakalavr təhsili alıb yenə tar ifaçısı olub. Sonda magistr təhsili alıb yenə tar ifaçısı olub. Adamın elədiyi şey tar çalmaqdır, amma biz, ona müxtəlif növlərdə adlar qoymuşuq. Bu prosesin bir hissəsində təhsilverəndən də, təhsil alandan da soruşanda ki, orada nə baş verir, müfəssəl cavab ala bilmirik". 

Billurə Yunus