Aygünün bəstəkar Kamala yaxınlaşmağı
İntiqam VALEHOĞLU
Bu yazı 3-4 gün əvvəl yazılmalıydı. Çox düşünüb-daşındım ki, bəlkə yazmayım. Çünki adamın sənəti var, ölkənin əməkdar artistidir, tanınmış müğənnidir.
Amma olmadı...
...ATV-də "Yenə o bağ olaydı" adlı bir veriliş efirə gedir. Hətta bildiyimə görə çəkilişlər artıq dayandırılıb. Verilişin adının plagiat olmasında işim yox, dekorasiyadan "bağ" düzəltməklərinə də göz yummaq olar, lap verilişin aparıcısı Aygün Bəylərin qonaqlara danışmağa imkan verməməsini də problem hesab etməmək mümkündür. Amma çağırdığın müğənnilər oxuduğu yerdə araya girib bir ağız cikkə çəkməyin heç yeri yoxdur.
Axırıncı dəfə verilişin qonağı Özbəkistanın xalq artisti, Azərbaycanda da hər kəsin yaxşı tanıdığı Nəsibə Abdullayeva idi. Veriliş başlayandan Aygün Bəylər danışır, Nəsibə susur, Nəsibə danışmaq istəyəndə Aygün yenə başlayır danışmağa. Sonra Nəsibə oxumağa başlayır, Aygün "reski" girir ortaya.
Bəllidir ki, Nəsibə Abdullayevanı Azərbaycan tamaşaçısına tanıtdıran mahnı bir çox sənətçilərimizin də oxuduğu "Nigaranam"dır. O da məlumdur ki, bəstənin müəllifi bəstəkar Kamaldır. Yəni Azərbaycanın maddi baxımdan ən zəngin adamlarından biri.
...Efirin sonlarıdır, Nəsibə Abdullayeva "Nigaranam"ı oxuyur. Aygün yenə qəfil mahnının ortasında zil səslə peyda olur. Mimikalardan hiss olunur ki, güclü yenilik elədiyini, musiqiçilərin dili ilə desək, tutuzdurduğunu zənn edir. Abdullayeva isə açıq-aşkar bu durumdan narazıdır, sadəcə təcrübəsi və abır-həyası hesabına vəziyyətdən çıxır.
Verilişin son dəqiqələri gedir. Aygün Bəylər kişi ifaçılara məsləhət verir ki, bəs qadınlar üçün yazılmış mahnıları oxumayın. Elə bu an adamın yadına əməkdar aritstin kepkalı vaxtları düşür. Yəni xanımlığı qəbul eləmədiyi dönəmlər. Təbii ki, bu da onun öz seçimidir. Lakin həmkarlara "məsləhət" vermək, ifaçının vizit kartı hesab olunan bəstənin ortasında reyd keçirmək, sanki özünün daha güclü səsə sahib olduğunu isbatlamaq şəxsi seçim ola bilməz və bu birbaşa etika məsələsidir.
Adama deyərlər ki, bəstəkar Kamal səni Nəsibədən daha əvvəl tanıyıb, sən bu ölkədəsən, Nəsibə isə Özbəkistanda, lap tutaq ki, səsin də ondan daha zildir. Deməli, sənin bu mahnını oxumağın məsləhət olmayıb ki, oxumamısan. Daha bu qədər "kitayski" şirinlik eləməyə nə hacət?
P.S. İndicə aldığım məlumata görə, Aygün Bəylər də bu mahnının oxuyubmuş. Amma görünür uğurlu olmadığından yadda qalmayıb. Bəstəkardan icazə alıb-almamağı isə şəxsən mənə məlum deyil.
Ölkə.az
