Əsəd: \"Fransanın yaşadıqları Suriyada 5 ildir davam edir\"

Əsəd baş verənlərlə Suriyadakı vəziyyəti paralel şəkildə müqayisə edib

Ölkə.Az xəbər verir ki, Suriya prezidenti Bəşər Əsəd bu gün səhər saatlarında Nikolya Sarkozunun "Respublikaçılar" partiyasından olan fransalı parlamentarilərlə görüş zamanı Parisdəki terror aktı ilə bağlı başsağlığını ifadə edib.

Üçgünlük Suriya səfərini yekunlaşdıran parlamentarilər Bəşər Əsədlə görüşüblər. Fransalı siyasətçilər İŞİD terror təşkilatı ilə mübarizədə qazanılan uğurları qeyd etmək üçün Suriyaya yola düşüblər. Onların fikrincə, bu işdə terrorçuların mövqelərinə hava zərbələri endirən Rusiyanın rolu danılmazdır.

Suriya prezidenti isə dünən axşam baş verənlərlə Suriyadakı vəziyyəti paralel şəkildə müqayisə edib.

"Dünən Fransa Suriyanın 5 il ərzində yaşadıqları ilə tanış oldu", - deyə Suriya prezidenti terroru nəzərdə tutub.

Qeyd edək ki, Fransa prezidenti Fransua Olland Parisdəki terror hadisəsi ilə bağlı canlı yayımda çıxış edərək terror hadisəsinin arxasında İŞİD terror təşkilatının olduğunu bildirib.

Fransanın paytaxtı Parisdə törədilən terror aktları nəticəsində 153 nəfər ölüb, azı 200 nəfər yaralanıb.

Rəşid Mustafazadə

Ölkə.Az