Həftənin icmalı
Azərbaycanda daha çox kimlər ipoteka ilə mənzil alırlar?
09.11.2015
Azərbaycanda ipoteka kreditlərinə görə, daha çox bank və sığorta şirkətlərinin əməkdaşları müraciət edirlər.
Bu barədə Azərbaycan Mərkəzi Bankı (AMB) yanında Azərbaycan İpoteka Fondunun (AİF) hesabatında deyilir.
Hesabata əsasən, 2015-ci ilin III rübünün yekunları üzrə ipoteka kreditlərinin təqribən 22 faizi onların payına düşüb.
Siyahıda sonrakı yerləri hərbçilər (20,7 faiz), enerji sahəsinin (13,1 faiz) və hüquq-mühafizə orqanları əməkdaşları (9,2 faiz) tuturlar.
Kreditlərin qalan hissəsi rabitə, nəqliyyat, səhiyyə, təhsil, tikinti və digər sahələrin əməkdaşlarının payına düşür.
Ən sağlam insanlar hansı ölkələrdə yaşayırlar?
09.11.2015
Azərbaycan dünyanın ən sağlam ölkələri siyahısında 145 dövlət arasında 87-ci olub.
Ölkə.Az Report-a istinadən xəbər verir ki, bu barədə “Bloomberg”in BMT-nin məlumatları əsasında apardığı tədqiqatının nəticələrində bildirilir.
Siyahıda MDB ölkələrindən Gürcüstan 71, Ermənistan 79, Tacikistan 84, Özbəkistan 85, Belarus 91, Rusiya 97, Ukrayna 99, Qırğızıstan 101 və Türkmənistan 104-cü yerdə qərarlaşıb.
Tədqiqat zamanı son beş il ərzində səhiyyə məlumatları təhlil edilib. Araşdırma zamanı əsas gözlənilən uzunömürlülük, körpə ölümü, ölüm səbəbləri, üç yaş qrupu üzrə ölüm faizi (ən azı 14 yaş, 15-dən 64-ə, 65-dən yuxarı) və başqa amillər nəzərə alınıb.
Risk faktorları növbəti göstəricilər üzrə qiymətləndirilib: 15 yaşdan yuxarı siqaret çəkənlərin faizi, adambaşı spitrli içki qəbulu litri, fiziki qeyri-fəal vətəndaşların sayı, xolestrinin səviyyəsi, arterial təzyiq, HİV-ə yoluxma sayı və s.
Reytinqdə ən yüksək pilləni sinqapurlular tutublar. Burada sağlamlıq səviyyəsi 89,45% qiymətləndirilib.
İlk onluğa İtaliya, Avstriya, İsveçrə, Yaponiya, İsrail, İspaniya, Hollandiya, İsveç və Almaniya daxil olub.
Qoşunların təmas xəttində Ermənistan vətəndaşı saxlanıldı
09.11.2015
Qoşunların təmas xəttində Ermənistan vətəndaşı saxlanılıb.
Müdafiə Nazirliyinin mətbuat xidmətindən Ölkə.Az-a verilən məlumata görə, noyabrın 8-də Azərbaycan-Ermənistan dövlət sərhədini Qazax rayonu istiqamətində pozan Ermənistanın Noyemberyan rayonunun Şavarşavan kənd sakini, ilkin ehtimala görə 1942-ci il təvəllüdlü Lusine Qukasovna Abovyan müdafiənin ön xəttində yerləşən Silahlı Qüvvələrimizin bölmələri tərəfindən saxlanılıb.
Saxlanılan Ermənistan vətəndaşına qarşı beynəlxalq hüquq normaları tərəfindən təsbit edilmiş qaydalar çərçivəsində davranılır.
Müdafiə Nazirliyi: Rusiyaya məxsus yük maşınını atəşə tutulmayıb
09.11.2015
Azərbaycan tərəfinin Rusiyaya məxsus yük maşınını atəşə tutması barədə məlumatlar düşmənin növbəti uğursuz təxribat cəhdidir.
Bu barədə Ölkə.Az-ın sorğusuna cavab olaraq, Müdafiə Nazirliyinin mətbuat xidmətindən bildiriblər.
Qeyd olunub ki, Ermənistanın bəzi kütləvi informasiya vasitələri dövlət sərhədində Rusiyaya məxsus yük maşınının guya atəşə tutulması barədə gülünc, cəfəng məlumat tirajlayıblar:
“Görünür ki, son vaxtlar iflasa uğrayan erməni hərbi və təbliğat sistemi Azərbaycan və Rusiya münasibətlərinin mehriban dost, qonşu, tərəfdaşlıq çərçivəsində olmasından və ikitərəfli əlaqələrimizin yüksələn xətlə inkişaf etməsindən həmişə olduğu kimi, yenə də narahatdır”.
Ramil Usubov daha bir məmur oğluna vəzifə verdi
10.11.2015
Məlum olduğu kimi, Daxili işlər naziri, general-polkovnik Ramil Usubov Bakı şəhər Baş Polis İdarəsinin Dövlət Yol Polisi İdarəsində kadr dəyişiklikləri edib.
Ölkə.Az AzNews.az-a istinadən xəbər verir ki, dəyişikliklərdən biri də Baş nazirin birinci müavini Yaqub Eyyubovun oğlu Fərhad Eyyubovun vəzifəsinin yüksəldilməsi olub.
Nazirin imzaladığı müvafiq əmrə əsasən, İdarədə şöbə rəisi kimi çalışan polkovnik-leytenant F.Eyyubov bundan sonra rəisin ikinci müavini kimi fəaliyyət göstərəcək.
Hacıbala Abutalıbov Bakıda reklamları sökdürür
10.11.2015
Bakıda ticarət obyektlərinin üzərinə vurulan xarici dildə yazılmış reklam lövhələri sökülür.
Ölkə.Az AzVision.az-a istinadən xəbər verir ki, söküntü işləri “28 May” metrosu yaxınlığında yerləşən obyektlərdə aparılır.
Bakı Şəhər İcra Hakimiyyətinin əməkdaşları obyekt sahiblərinə tövsiyə edib ki, reklam lövhələri yalnız Azərbaycan dilində olmalıdır.
“Bizə bildirdilər ki, bu barədə Hacıbala Abutalıbov ciddi tapşırıq verib və buna görə şəhərdəki bütün xarici dildə olan reklamlar söküləcək”, - deyə obyekt sahibləri bildirib.
Qeyd edək ki, Reklam haqqında Azərbaycan Respublikasının Qanununa görə, reklamda dövlət dili işlənilir və bu, dövlət dilinin normalarına uyğun olaraq tətbiq edilməlidir. Zəruri hallarda reklamda dövlət dili ilə yanaşı, digər dillər də istifadə oluna bilər.
Paytaxt dayanacaqlarında Wi-Fi!
10.11.2015
Huawei və Bakcell şirkətlərinin birgə kampaniyası olan “Huawei & Bakcell LTE Campaign” çərçivəsində, paytaxtımızın bir çox avtobus dayanacaqlarında Wi-Fi modemləri quraşdırılıb.
Ölkə.Az xəbər verir ki, bakılılar və şəhərin qonaqları artıq aksiyadan yararlanaraq, bu ictimai nəqliyyat dayanacaqlarında öz elektron poçtlarını yoxlaya və ya sosial şəbəkələrə daxil ola biləcəklər.
Artıq, avtobus gözləyərkən keçirdiyiniz darıxdırıcı vaxtı daha səmərəli istifadə edəcəksiniz və zamanın necə keçdiyinin fərqinə varmayacaqsınız.
Aşağıdakı dayanacaqlarda pulsuz internetdən həzz alın!
Azərbaycan prospekti (Şahmat məktəbi)
Təbriz küçəsi (Təfəkkür universiteti)
Haqverdiyev küçəsi (İncəsənət universiteti)
Azadlıq prospekti (Baku Elektronics)
Səməd Vurğun küçəsi (Təzə bazar)
Şərifzadə küçəsi (İnşaatçılar metrosu)
Atatürk prospekti (Gənclik metrosu)
Parlament prospekti (Milli Məclis)
Z.Əhmədbəyov küçəsi (Nizami metrosu)
Məmməd Araz küçəsi (Atatürk pr.)
Vyetnam Azərbaycanla vizasız rejim tətbiq edir
10.11.2015
Azərbaycan vətəndaşları 2016-ci ildən başlayaraq viza olmadan Vyetnama turist kimi səfər edə biləcəklər.
Bu barədə Vyetnamın milli turizm administrasiyasının Departament rəhbəri Nquyen Qay (Nguyen Phuong Quy) deyib.
Onun sözlərinə görə, Vyetnamın baş naziri bazar ertəsi fərman imzalayıb. Fərmana əsasən 2016-ci ildən başlayaraq Vyetnama viza almadan səfər etmək mümkün olacaq.
Bu fərman bütün ölkələrin turistlərinə aid edilir.
Azərbaycanda Facebook profilləri nəzarətə götürüldü
10.11.2015
Azərbaycanda sosial şəbəkələrin getdikcə daha çox populyarlaşması və insanların həyatında mühüm yer tutması biznes sektorunda da özünü göstərib. Artıq iri şirkətlər və banklarda işçilərin «Facebook»dakı davranışına da nəzarət edilir, onların nə paylaşdıqları, eləcə də ayrı-ayrı məsələlərə münasibəti izlənilir.
Bu barədə fins.az-a ölkənin aparıcı banklarından və sığorta şirkətlərindən bildirilib. Qeyd edək ki, «Facebook» nəzarəti geniş kütlələrlə işləyən qurumlarda xüsusilə ciddidir. Belə ki, hər hansı əməkdaş şirkət rəhbərliyini qane etməyən status paylaşarsa ona dərhal xəbərdarlıq edilir. Söhbət əsasən rəqib şirkətin hər hansı məhsulunun və yaxud yeni xidmətinin reklam edilməsindən, rəqiblərin yenilikləri barədə xəbər saytlarından keçidlərin paylaşılmasından gedir.
Saytın əməkdaşı ötən gün təsadüfən «Facebook»da belə halın şahidi olub. Bank əməkdaşlarından biri başqa banka məxsus yeniliyi bölüşərkən, yəni «reklam edərkən» öz iş yoldaşının «qəzəbinə gəlib». Bankda daha yüksək vəzifə tutduğu hiss olunan istifadəçi dərhal iş yoldaşına irad tutub, onu rəqib bankın məhsulunu reklam etməkdə günahlandırıb, hətta «söhbəti sabah işdə davam etdirəcəklərini» bildirib. Vəziyyəti belə görən əməkdaş dərhal «reklam» statusunu silməli olub.
"Çudo-peçka"lar bağlanır
10.11.2015
Bakıda "Çudo-peçka" restoranlar şəbəkəsinin işi xeyli dərəcədə zəifləyib.
Ölkə.Az axar.az-a istinadən xəbər verir ki, restoranlar şəbəkəsinin bir-birinin ardınca bağlanacağı gözlənilir.
Şəhərin 3-cü mikrorayon dairəsində yerləşən məntəqənin dəyişdirilməsindən sonra növbə digər filiallara da çatıb.
Paytaxtın "Sahil" və "Neftçilər" metrostansiyaları yaxınlığındakı məntəqələrinin də işinə xitam veriləcəyi istisna olunmur. Çünki "Çudo-peçka" rəqabətdə açıq-aşkar uduzmaqdadır.
Qeyd edək ki, müğənni Röyanın keçmiş qaynatası Çingiz Cəlilovdan "Çudo-peçka"nın alınması ilə uzun müddətdir bu müəssisələrin işində geriləmə müşahidə olunur. Bu durğunluq KFC restoranlarının açılması ilə daha da dərinləşib.
Urmiyada azərbaycanlı aksiya iştirakçısı öldürüldü
10.11.2015
Bir neçəsi ictimai fəal olmaqla onlarla aksiya iştirakçısı saxlanılıb
İranda baş verən aksiyalarda bir azərbaycanlı öldürülüb.
Yerli mənbələrdən APA TV-yə daxil olan məlumata görə, Əli Əkbər Murtaza oğlunun Qərbi Azərbaycan vilayətinin Urmiya şəhərində öldürüldüyü bildirilir.
Əli Əkbər aksiyada iştirak etdiyi vaxt polis və təhlükəsizlik qüvvələri etirazçılara hücum edib. O, yaranan qarşıdurma zamanı aldığı zərbədən həyatını itirib.
Qeyd edək ki, ötən gün İranda Azərbaycan türkləri izdihamlı etiraz aksiyaları keçirib. Aksiya iştirakçıları noyabrın 6-da İranın “Kanal 2” telekanalında yayımlanmış proqramda azərbaycanlıların təhqir edilməsinə etirazlarını bildiriblər. Etirazlar Təbriz, Urmiya, Ərdəbil, Zəncan, Meşkin şəhərlərində və paytaxt Tehranda baş tutub.
Bakıda İran hadisələrinə — ETİRAZ
10.11.2015
Gənclər təşkilatı İran dövlətini Azərbaycan türklərinə qarşı təqib və təzyiq siyasətinə son qoymağa çağırdı
Bu gün bir qrup gənc, İran İslam Respublikasının Azərbaycandakı səfirliyinin qarşısında etiraz aksiyası keçirməyə cəhd ediblər. Buna səbəb 6 noyabr 2015-ci il tarixdə İranın dövlət kanalı olan “Kanal 2”-nin “2 Fitilə” adlı proqramında azərbaycanlı türklərin təhqir edilməsi olub.
Polis aksiyaçıların səfirliyin binasına yaxınlaşmasına maneə olub. Aksiyaçılar polislə qarşıdurmaya getməyərək onlara qarşı bir şərt irəli sürüblər. Şərt, Milliyətçi Gənclər Təşkilatının etiraz bəyənatının səfirliyə təqdim olunmasına icazənin verilməsi olub. Bəyənat səfirliyə təqdim olunub.
Bəyanatda İran dövlətinin Azərbaycan türklərinə qarşı təqib və təzyiq siyasətinə son qoyulması ilə bağlı çağrışı yer alıb.
Eldar Mahmudovu istintaqa çağırırlar
10.11.2015
Avstriya məhkəməsi sabiq MTN naziri Eldar Mahmudovun məhkəməyə çağırılması və sorğu-sual edilməsi ilə bağlı sorğu göndərib.
Sorğu hələ keçən il göndərilib, lakin bu günədək cavabsız qalıb.
Eldar Mahmudovun adı manat əsginasların çapı ilə məşğul olan Avstriyanın OeBS şəirkətinin işində hallanır. İttiham tərəfinin iddiasına görə, Mərkəzi Bankın bir qrup məmuru şirkətlə bağlanmış müqavilənin 20%-nii rüşvət şəklində geri alıb.
Qalmaqallı məhkəmə prosesi zamanı OeBS-in ittiham olunan yüksək vəzifəli əməkdaşlarından birinin vəkili o dövrdə MTN naziri vəzifəsini tutan Eldar Mahmudovun məhkəmədə ifadə verməsini tələb etmişdi.
Səhiyyə Nazirliyi narkomanların sayını açıqladı
10.11.2015
Azərbaycanda narkomaniya və toksikomaniyadan əziyyət çəkən xəstələrin statistikası açıqlanıb.
Səhiyyə Nazirliyindən Ölkə.Az-a verilən məlumata görə, hazırda ölkədə 28 min 656 narkoman var.
Onlardan 23 min 42 nəfəri dispanser qeydiyyatındadırlar. 5614 nəfərin müalicəsi isə profilaktik qeydiyyata götürülüb. Anonim narkomanların sayı isə 666 nəfərdir.
Narkotik asılılığı olan qadınların sayı da heç də az deyil. Belə ki, 554 qadın narkotik alüdəçisi var ki, onlardan 399 nəfəri dispanser, 155 nəfəri isə profilaktik müalicə alır. Ümumlikdə inyeksion narkotik istifadəçilərinin sayı 20 276 nəfər təşkil edir ki, onlardan 409 nəfəri məhz qadındır.
2 mindən çox əcnəbi Azərbaycanın qanunlarını pozdu
10.11.2015
Azərbaycanda oktyabr ayı ərzində 2297 əcnəbi tərəfindən ölkədə olma, habelə müvəqqəti və daimi yaşama qaydalarına əməl etmədən inzibati qanunvericiliyin tələblərinin pozulması halları müəyyən edilib.
Bu barədə Dövlət Miqrasiya Xidmətindən Ölkə.Az-a bildirilib.
“Onlardan 19-nun Azərbaycan ərazisində müvəqqəti və ya daimi yaşamaq üçün əsas verən sənədləri itirildiyindən yenisi ilə əvəz olunub, 191 nəfərin ölkə ərazisində yaşamaları leqallaşdırılıb, 1570 əcnəbinin ölkə ərazisini 48 saat ərzində tərk etmələri, 517 əcnəbinin isə inzibati qaydada ölkə hüdudlarından kənara çıxarılmaları barədə qərarlar qəbul edilib.
Mahmudovun 20 milyonluq obyektinə əl qoyuldu
11.11.2015
Bakının Qaradağ rayonunda “Sədərək” və “Binə” ticarət mərkəzlərinin yaxınlığında yerləşən “Karvansaray” ticarət mərkəzi də MTN-dəki çete tərəfindən yağmalanan ünvanlardandır.
Ölkə.Az “Yeni Müsavat”a istinadən xəbər verir ki, 2012-ci ilə kimi ticarət mərkəzində payı olmuş Elşən Kərəm oğlunun sözlərinə görə həmin il davamlı təzyiqlərdən sonra əmlaklarını təhvil vermək məcburiyyətində qalıb: ““Karvansaray” MMC-ni biz 20-yə yaxın sahibkar 2010-cu ildən tikdirməyə başladıq. Ora ümumilikdə 20 milyon manata yaxın vəsait qoyulmuşdu. 2012-ci ilin əvvəllərində MTN generalı Nizaməddin Həmidov “Karvansaray” MMC-nin rəhbərindən 20-dən artıq dükan istədi. Demişdi ki, dükanları Eldar Mahmudov üçün tələb edir. MMC rəhbəri bizimlə məsləhət etdi, dedik ki, mağazaları verə bilmərik. Qiyamət bundan sonra başladı. Başımıza açmadıqları oyun qalmadı. Ticarət mərkəzini tikən podratçı şirkətin rəhbərliyi bizdən MTN-ə şikayət yazdı. Guya onları işlədib pullarını ödəməmişik. Şikayəti MTN yoxladı. Səlim adlı bir işçiləri 2 ay ticarət mərkəzinə gəlib-getdi. Sonda kompleksi tikənlərə 4 milyon manat borclu olduğumuzu dedilər. Yalançı borc yaratdılar. Borcun əvəzinə 40 mağaza alıb verdilər tikintini aparan briqadaya".
Sərhəddə axtarışda olan 328 nəfər tutuldu
11.11.2015
Dövlət Sərhəd Xidməti (DSX) tərəfindən 2015-ci ilin oktyabr ayı ərzində dövlət sərhədini pozduqları üçün 34 halda 35 nəfər saxlanılıb.
DSX-nin mətbuat mərkəzindən Ölkə.Az-a verilən məlumata görə, onların 27 nəfəri Azərbaycan, 3 nəfəri Nigeriya, 2 nəfəri İran İslam Respublikası, hər ölkədən 1 nəfər olmaqla Türkiyə, Kamerun və Kot-Divuar vətəndaşıdır.
Sərhəd rejim qaydalarını pozarkən yaşıl sərhəddə 2 halda 2 nəfər, Xəzər dənizində 14 halda 26 nəfər saxlanılaraq barələrində müvafiq tədbir görülüb.
Cinayətkarlığa qarşı mübarizə tədbirləri nəticəsində Azərbaycanın hüquq-mühafizə orqanları tərəfindən axtarışda olan 328 nəfər aşkarlanaraq aidiyyəti orqanlara təhvil verilib.
Azərbaycanda çalışan əcnəbilərin sayı 30 minə yaxınlaşır
11.11.2015
2015-ci ilin noyabrın 1-i tarixinə olan statistikaya əsasən, cari ilin əvvəli ilə müqayisədə Dövlət Sosial Müdafiə Fondunun (DSMF) fərdi uçot sistemində qeydiyyata alınan əcnəbilərin sayı 19,75% artıb. Oktyabr ayı ərzində əlavə olaraq 472 nəfər əcnəbi vətəndaş qeydiyyata alınıb və nəticədə fərdi uçot sistemindəki əcnəbilərin sayı 26 972 nəfərə yüksəlib.
Bu barədə DSMF-dan Ölkə.Az-a bildirilib.
Fonddan verilən məlumata görə, dövlət sosial sığorta sistemində fərdi şəxsi hesabı olan əcnəbilərin 88,2%-ni (23 779 nəfər) kişilər, 11,8%-ni (3 193 nəfər) isə qadınlar təşkil edir.
“Ümumilikdə 115 ölkənin vətəndaşlarını əhatə edən əcnəbilər arasında ən yüksək say göstəricisi Тürkiyə vətəndaşları (13 583 nəfər) üzrə müşahidə olunur. Fərdi uçot sistemində qeydiyyata alınan əcnəbilərin sayına görə ikinci yerdə gələn Gürcüstan vətəndaşlarının sayı 2 949 nəfərə, üçüncü yerdə gələn Rusiya Federasiyasının vətəndaşlarının sayı isə 1 617 nəfərə çatıb.
Sonrakı yerlərdə, Hindistan (966), İran İslam Respublikası (960), Çin Xalq Respublikası (844), Böyük Britaniya və Şimali İrlandiya Krallığı (548), Pakistan İslam Respublikası (531), Ukrayna (422), Banqladeş Xalq Respublikası (375), Özbəkistan (269), Almaniya Federativ Respublikası (247), Filippin Respublikası (235), ABŞ (230), Qazaxıstan Respublikası (211), Türkmənistan Respublikası (209), Koreya (189), İtaliya Respublikası (187) və s. ölkələr qərarlaşıb”, - deyə Fonddan qeyd edilib.
Bakı məhkəməsində təqsirləndirilən şəxs özünü yandırdı
11.11.2015
Nəsimi Rayon Məhkəməsində təqsirləndirilən şəxs özünü yandırıb.
Ölkə.Az xəbər verir ki, Virtualaz.org saytının əldə etdiyi xəbərə görə, 34 yaşlı Samir Əliyev özünə od vuraraq yandırıb.
Qeyd edək ki, Samir Əliyev iyulun 8-dən həbsdədir. Bu gün istintaq müddətinin uzadılması ilə əlaqədar onu Nəsimi Rayon Məhkəməsinə gətiriblər.
Məhbusun həyat yoldaşı Zəminə Əliyeva ərinin qışqırıq səsini eşidib zala keçmək istədiyini, amma ona imkan vermədiklərini deyib:
“Qapıda gözləyirdim, gördüm qışqırıq gəlir, icəri qaçdım, vəkillər çıxıb dedilər ki, özünü yandırıb”.
İran səfirinin müavini Bakıda qəzaya düşdü
11.11.2015
İran İslam Respublikasının Azərbaycan Respublikasındakı səfirliyinin vəzifəli əməkdaşı Bakıda avtomobil qəzasına düşüb.
Ölkə.Az “Report”-a istinadən xəbər verir ki, hadisə Xətai rayonunda baş verib.
Belə ki, Nobel prospektində Bakı şəhər sakini 1990-cı il təvəllüdlü İlkin Abdullayev idarə etdiyi “KİA” markalı avtomobillə İran səfirinin müavini, səfirliyin mədəniyyət müşaviri, 1974-cü il təvəllüdlü Əlirza Behbudinin idarə etdiyi səfirliyə məxsus “Peugeot Pars” markalı avtomobili arxadan vurub.
Nəticədə səfir müavininin idarə etdiyi avtomobil qarşıda hərəkət edən 1981-ci il təvəllüdlü Əsədulla Səmədovun sürdüyü BMW markalı avtomobilə dəyib. Qəza nəticəsində hər üç avtomobil əzilib, ağır xəsarət alan olmayıb.
ABŞ səfirliyi Bakıda 500 dollara maşın satacaq
11.11.2015
ABŞ-ın Azərbaycandakı səfirliyi Bakıda işlənmiş avtomobillərin satışı məqsədi ilə hərrac keçirəcək.
Ölkə.Az xəbər verir ki, ABŞ-ın Azərbaycandakı səfirliyinin sosial şəbəkədə yaydığı məlumata əsasən, hərrac noyabrın 13-də Məmmədşərif Həmidov küçəsi, 51 ünvanında keçiriləcək.
Avtomobillərin baxışı həmin gün saat 9:00-dan 11:00-a qədər mümkündür. Alıcı mütləq şəxsiyyətini təsdiq edən şəkilli sənədi təqdim etməlidir. Alınan malların dəyəri dərhal ödənilməlidir.
Avtomobillərin ilkin qiyməti 500 dollardır.
SOCAR-ın bu səlahiyyəti "Asan xidmət"ə verildi
11.11.2015
Cari ilin noyabr ayının əvvəlindən başlayaraq fərdi yaşayış evlərinin (mənzillərin) və qeyri-yaşayış sahələrinin (obyektlərin) qazlaşdırılmasında layihə-smeta sənədlərinin hazırlanması məqsədilə verilən texniki şərtlərdə qoyulan mövcud şəbəkənin gücləndirilməsi tələbi və həmin işlərin icrası üçün nəzərdə tutulan müvafiq ödənişlər ləğv olunub.
“Azəriqaz” İstehsalat Birliyinin İctimaiyyətlə əlaqələr şöbəsindən verilən məlumata görə, eyni zamanda 2016-cı ilin yanvar ayının 1-dən başlayaraq texniki şərtlərin veriliməsi Azərbaycan Respublikası Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi – “ASAN xidmət” mərkəzlərində həyata keçiriləcək. Bu məqsədlə hazırda Birliyin müvafiq şöbələri ilə “ASAN xidmət” tərəfindən artıq lazımi işlərin görülməsinə başlanılıb.
Bu gün Azərbaycanda Konstitusiya Günüdür
12.11.2015
Bu gün Azərbaycanda Konstitusiya Günü qeyd olunur.
Azərbaycan Respublikasının 1995-ci ildə qəbul olunmuş Konstitusiyası müstəqil Azərbaycanın ilk Konstitusiyasıdır.
1918-1920-ci illərdə 23 ay mövcud olmuş Azərbaycan Xalq Cümhuriyyəti dövlətin əsas Qanununu qəbul edə bilməmişdi. Beləliklə, Azərbaycan Respublikasının Konstitusiya quruluşunun tarixi əsasən SSRİ-nin tərkibində olduğu dövrə düşür.
Azərbaycanın birinci Konstitusiyası 1921-ci il mayın 19-da I Ümumazərbaycan Sovetlər Qurultayında qəbul edilib. Azərbaycan SSR Konstitusiyasının 1921-ci il SSRİ Konstitusiyasına uyğunlaşdırılmış yeni redaksiyası 1925-ci il martın 14-də IV Ümumazərbaycan Sovetlər Qurultayında qəbul edilib. Azərbaycan SSR-nin 1978-ci il aprelin 21-də qəbul edilmiş son Konstitusiyası da əvvəlki konstitusiyalar kimi SSRİ Konstitusiyasına uyğunlaşdırılmış şəkildə idi.
Eldar Mahmudov ev dustağıdır — sensasion səbəb
12.11.2015
Sabiq milli təhlükəsizlik naziri Eldar Mahmudov ev dustağıdır. Bu sensasion məlumatı "Yeni Musavat"a verən mənbənin sözlərinə görə, bununla bağlı qərar oktyabrın 17-də verilib.
Qeyd edək ki, Cinayət Məcəllənin 154.2.1-154.2.9-cu maddələrində nəzərdə tutulmuş qətimkan tədbirləri sırasında ev dustaqlığı da var. Mənbənin iddiasını rəsmi mənbələrdən dəqiqləşdirmək mümkün olmasa da, ortaya daha maraqlı məqam çıxıb.
Çünki ev dustaqlığı həbsə alternativ qətimkan tədbiri olduğundan şəxsin həbsə alınması barədə məhkəmənin qərarı alındıqdan sonra onun əvəzinə seçilə bilər. Yəni bu o deməkdir ki, oktyabrın 17-də işdən çıxarılan E.Mahmudov barədə həbs sanksiyası verilib, amma bu, ev dustaqlığı ilə əvəz olunub. Mənbə onu da dəqiqləşdirib ki, sabiq nazirin nəzarət altında saxlanılması barədə mediadakı xəbərlər hüquqi baxımdan mümkün deyil. “Çünki Cinayət Məcəlləsində Prosessual Məcburiyyət Tədbirləri haqda fəsildə aydın yazılır ki, nəzarət altında saxlama yalnız yetkinlik yaşına çatmayan şəxsin barəsində seçilə bilər. Komandanlığın müşahidəsi altına vermə isə yalnız hərbi qulluqçu və ya hərbi toplantıda təlim keçdiyi müddətdə hərbi mükəlləfiyyətli şəxs barəsində seçilir” deyə, bildirib.
Azərbaycan erməni qadını geri qaytardı
12.11.2015
Beynəlxalq sərhəddi 8 noyabr 2015-ci il tarixdə keçən mülki erməni vətəndaşı bu gün, Beynəlxalq Qızıl Xaç Komitəsinin (BQXK) himayəsi altında keçirilən əməliyyat zamanı geri qaytarılıb.
BQXK-nin Azərbaycan nümayəndəliyindən verilən məlumata görə, bugünkü təhvilvermə Azərbaycanın Qazax şəhəri ilə Ermənistanın İcevan şəhəri arasında yerləşən yolda, beynəlxalq sərhəddə gerçəkləşdirilib.
Arif Yunus həbsdən azad edildi
12.11.2015
Bakı Apelyasiya Məhkəməsi Arif Yunus barəsində həbs qətimkan tədbirinin aradan qaldırılmasına qərar verib.
Belə ki, Arif Yunusun vəziyyəti oktyabrın 30-da yenidən ağırlaşıb və onu Penitensiar Xidmətin müalicə müəssisəsinə köçürüblər. Müalicə müəssisəsindən Apelyasiya Məhkəməsinə Arif Yunusun müalicəsinin bu şəraitdə mümkün olmadığına dair müraciət daxil olub.
Apelyasiya Məhkəməsi də bu müraciəti nəzərə alaraq Arif Yunus barəsində qətimkan tədbirinin dəyişdirilməsinə qərar verib.
Əli Abbasov vəzifəsindən azad edildi
12.11.2015
Prezident İlham Əliyev Əli Abbasovun Azərbaycanın rabitə və yüksək texnologiyalar naziri vəzifəsindən azad edilməsi haqqında sərəncam imzalayıb.
Dövlət başçısı Azərbaycan Respublikası Konstitusiyasının 109-cu maddəsinin 5-ci bəndini rəhbər tutaraq qərara alıb ki, Əli Məmməd oğlu Abbasov Azərbaycan Respublikasının rabitə və yüksək texnologiyalar naziri vəzifəsindən azad edilsin.
Əli Abbasov niyə işdən çıxarıldı?
12.11.2015
MTN ətrafındakı qalmaqalın səngimək bilmədiyi bir dövrdə növbəti nazirin işdən azad olunması xəbəri yenidən ölkə mediasının gündəmini alt-üst etdi.
Eldar Mahmudovun işdən azad olunmasından sonra MTN-nin yüksək vəzifəli zabitlərinin, idarə rəislərinin işdən qovulması və həbs olunmaları ilə paralel Rabitə və Yüksək Texnologiyalar Nazirliyinin də bir neçə vəzifəli işçisi də tutduqları vəzifədən azad edildilər.
Keçən həftə RYTN-nın Bakı Telefon Rabitə İstehsalat Birliyinin rəhbəri Beytulla Hüseynovun saxlanılması, sonra isə nazirliyin aparat rəhbəri Vidadi Zeynalovun həbsi Əli Abbasovun başı üzərində "qara buludları" sıxlaşdırmışdı. Baş verənlər onun rəhbərlik etdiyi nazirlikdə baş verən prosseslərdən xəbərsiz olduğu təsəvvürünü yaradır.
Bir müddət bundan öncə isə rəsmi mənbələrdə Rabitə və Yüksək Texnologiyalar Nazirliyinin (RYTN) aparat rəhbəri Vidadi Zeynalovun həbs olunduğu xəbəri yayıldı.
Ölkə.Az-ın verdiyi xəbərə görə, Səbail Rayon Məhkəməsinin qərarı ilə V. Zeynalov barəsində 3 ay müddətinə həbs qətimkan tədbiri seçilib.
Qeyd edək ki, V. Zeynalovun həbsinin sabiq milli təhlükəsizlik naziri Eldar Mahmudovun yaxın qohumu, Bakı Telefon Rabitəsi İstehsalat Birliyinin rəhbəri Beytulla Hüseynovun fəaliyyəti ilə əlaqəli olduğu bildirilir. Məlumatlara görə, Beytulla Hüseynov Eldar Mahmudovun yaxın qohumudur və MTN-dəki cinayətkar qruplaşma ilə sıx əlaqədə olub.
Avstraliya parlamenti Ermənistanı işğal olunmuş torpaqları azad etməyə çağırdı
12.11.2015
Ermənistan silahlı qüvvələri tərəfindən işğal olunmuş Azərbaycan əraziləri azad edilməlidir.
Bunu Avstraliya-Azərbaycan Parlament Dostluq Qrupunun sədri, deputat Lyuk Simpkins ölkəsinin parlamentində çıxışı zamanı deyib.
Deputat qeyd edib ki, 1992 və 1993-cü illərdə Ermənistan qanunsuz olaraq Azərbaycan ərazilərini işğal edib: "Bu əraziyə Dağlıq Qarabağ regionu və ətraf 7 rayon daxildir. Ermənistanın təcavüzkar siyasəti nəticəsində 350,000 min etnik azərbaycanlı Ermənistandan qovulub. Ermənistan silahlı qüvvələrinin Dağlıq Qarabağı və ətraf 7 rayonu işğal etməsi nəticəsində 750,000 mindən çox azərbaycanlı məcburi köçkün olub. 1 milyondan çox azərbaycanlı 20 ildən artıqdır ki, öz torpaqlarından, əmlaklarından və öz əcdadlarının məzarlarından ayrı düşüblər".
Bakıda 100 qəzalı bina söküləcək
12.11.2015
Sabunçu rayonunda qəzalı olan 4 binanın sakinləri köçürüləcək.
Ölkə.Az xəbər verir ki, bunu Trend-ə açıqlamasında Sabunçu Rayon İcra Hakimiyyəti başçısının Ramana qəsəbəsi üzrə nümayəndəsi Şamil Aliyev deyib.
Onun sözlərinə görə, artıq Ramana qəsəbəsi, D.Bünyadzadə küçəsi 23 ünvanında yerləşən 31 mənzilli qəzalı binanın sakinləri köçürülüb: "Bina sökülüb. Binanın sakinləri hələlik kirayə evlərdə yerləşdirilib. Həmin binada 30 ailə yaşayırdı. Hər bir ailəyə kirayə evlərdə məskunlaşmaları üçün hər ay 200 manat pul ödənilir. Bina kəskin qəza vəziyyətində olduğundan hər an uçmaq təhlükəsində idi. Hazırda binanın fundamenti qazılır. 2 mərtəbəli binanın yerində bir bloklu 10 mərtəbəli binanın tikilməsi nəzərdə tutulur. Çox güman ki, 9 aya bina tikilib istifadəyə veriləcək”.
Azərbaycan sülhməramlılarının bir qrupu vətənə dönüb
12.11.2015
NATO-nun 2015-ci ilin yanvar ayından Əfqanıstan İslam Respublikasında həyata keçirdiyi yeni “Qətiyyətli Dəstək” qeyri-döyüş missiyasının tərkibində fəaliyyət göstərən Azərbaycan Respublikası Silahlı Qüvvələrinin 21 nəfərdən ibarət qrupu plana uyğun olaraq rotasiya qaydasında Bakıya qayıdıb.
Bu barədə Ölkə.Az-a Müdafiə Nazirliyindən məlumat verilib.
Azərbaycan Respublikası Silahlı Qüvvələrinin Əfqanıstandakı sülhməramlı missiyası 20 noyabr 2002-ci il tarixdən başlayıb.
Hazırda Azərbaycan Respublikası Silahlı Qüvvələrinin 94 nəfərdən ibarət hərbi qulluqçusu, 2 hərbi həkimi və 2 mühəndis-istehkam ixtisası üzrə zabiti Əfqanıstandakı missiyada iştirak edir.
ANS-in yayımı bir aylıq dayandırıla bilər
12.11.2015
Bakı Apellyasiya Məhkəməsində ANS Yayım və Media Şirkətinin Milli Televiziya və Radio Şurasına (MTRŞ) qarşı qaldırdığı iddia üzrə keçirilən prosesdə MTRŞ nümayəndəsi “Salam, Azərbaycan” verilişinin bir ay müddətinə bağlanmasının səbəblərini açıqlayıb.
Ölkə.Az-ın Report-a istinadən məlumatına görə, MTRŞ-nın hüquq şöbəsinin müdiri Nemət Cavadov bildirib ki, həmin verilişdə reklam müddəti ilə bağlı müvafiq qanunvericiliyin tələbləri pozulub.
Bundan başqa, N.Cavadov “Salam, Azərbaycan” proqramının yayımı zamanı “TV-lərdə Nuşirəvan rep oxuyur bayquşa” cümləsi işlədilən mahnının efirə getməsinə də irad bildirib. O, “Salam, Azərbaycan” proqramında digər bir sıra qanun pozuntularının olduğunu da əlavə edib.
Kəlbəcər girovlarının məsələsi BMT-də
13.11.2015
Noyabrın 11-12-də Cenevrə şəhərində BMT-nin İşgəncələrə qarşı Komitəsinin 56-cı sessiyası çərçivəsində İşgəncə və digər qəddar, qeyri-insani və ya ləyaqəti alçaldan rəftar və ya cəza əleyhinə Konvensiya üzrə Azərbaycan Respublikasının dördüncü dövri məruzəsinə baxılıb.
Xarici İşlər Nazirliyinin mətbuat xidmətindən Ölkə.Az-a verilən məlumata görə, sessiyada Azərbaycanı xarici işlər nazirinin müavini Xələf Xələfovun rəhbərlik etdiyi nümayəndə heyəti təmsil edib.
X. Xələfov Azərbaycanın dördüncü dövri hesabatını təqdim edib. O, çıxışı zamanı ölkəmizin BMT-nin müqavilə orqanları ilə əməkdaşlığa önəm verdiyini bildirib, Azərbaycanda insan hüquqlarının müdafiəsi üzrə Milli Fəaliyyət Planı, insan alveri ilə mübarizə üzrə Fəaliyyət Planı və “Azərbaycan 2020 Gələcəyə Baxış” İnkişaf Konsepsiyasının qəbul edilməsi və həyata keçirilməsi ilə bağlı məlumatları diqqətə çatdırıb.
Əli Abbasovun yerinə müvəqqəti nazir təyin edildi
13.11.2015
Rabitə və yüksək texnologiyalar nazirinin səlahiyyətlərini müvəqqəti olaraq nazirin birinci müavini İltimas Məmmədov icra edəcək.
Ölkə.Az xəbər verir ki, bunu Trend-ə rabitə və yüksək texnologiyalar nazirinin müşaviri Müşfiq Əmirov deyib.
Leyla Əliyevadan yeni bir layihə
13.11.2015
Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyevanın təşəbbüsü ilə ölkəmizdə ilk dəfə olaraq “Baku Corner” adlı xeyriyyə məqsədi daşıyan ədalətli ticarət konsepsiyası təsis edilib. Noyabrın 13-dən etibarən yeni layihə - “Baku Corner” (www.bakucorner.az) ictimaiyyətin istifadəsinə təqdim olunur.
IDEA İctimai Birliyindən bildiriblər ki, konsepsiyanın mahiyyəti yerli və xarici sənətkarlar tərəfindən hazırlanmış ənənəvi əl işlərinin satışı üçün platforma yaratmaq və bu sənət əsərlərini geniş ictimaiyyətə çatdırmaqdır. “Baku Corner” insanlara öz yaradıcılığının həm estetik, həm də maddi baxımdan qiymətləndirilməsinə yardım edəcək bir layihədir. Belə ki, xalq sənətkarları “Baku Corner”in internet səhifəsi vasitəsilə müştəri bazarına birbaşa çıxış əldə etməklə, əməklərinin bəhrəsini götürmək imkanı qazanmış olacaqlar.
Əli Abbasov dindirilir — Saatlardır Prokurorluqdadır
13.11.2015
Dünən prezidentin sərəncamı ilə vəzifəsindən azad edilən rabitə və yüksək texnologiyalar naziri Əli Abbasov bu gün yenidən Baş Prokuror yanında Korrupsiyaya Qarşı Mübarizə İdarəsinə çağırılıb.
Ölkə.Az xəbər verir ki, bu barədə virtualaz.org saytına hüquq-mühafizə orqanlarındakı mənbə məlumat verib.
Mənbənin verdiyi məlumata görə, sabiq nazirin istintaqı artıq 4 saatdan çoxdur davam edir.
Qeyd edək ki, Əli Abbasov istintaqa ilk dəfə deyil çağırılır. Onu bundan əvvəl də ifadə verməyə çağırmışdılar. Səbəb nazirliyin həbs olunmuş aparat rəhbəri Vidadi Zeynalovun sabiq nazirin əleyhinə ifadə verməsi idi.
Milli təhlükəsizlik nazirinin müavini işdən çıxarıldı
13.11.2015
Milli təhlükəsizlik nazirinin müavini, general-mayor Elçin Arsalan oğlu Əliyev bu gün Azərbaycan prezidentinin sərəncamı ilə vəzifəsindən azad olunub.
Ölkə.Az-ın məlumatına görə, bu barədə virtualaz.org saytına hüquq-mühafizə orqanlarındakı rəsmi mənbələrdən məlumat verilib.
Məlumata görə, MTN sistemindəki kadr islahatları davam etməkdədir. Milli təhlükəsizlik nazirinin vəzifəsini icra edən şəxsin bu gün imzaladığı əmrlə MTN-in İsmayıllı və Daşkəsən rayon şöbələrinin rəisləri də tutduqları vəzifələrdən azad ediliblər. Bundan bir neçə gün öncə isə MTN-in Nərimanov rayon şöbəsinin rəisi işdən azad olunub.
Bütövlükdə isə MTN-in keçmiş rəhbərliyinin işdən azad olunmasından və ifşa edilməsindən sonra nazirliyin 120 əməkdaşı bu sistemdən xaric edilib. Onların 80 nəfəri sabiq nazir Eldar Mahmudovun yaxın qohumları və dostları olub.
İlham Əliyev Ollanda başsağlığı verdi
14.11.2015
Azərbaycan Prezidenti İlham Əliyev Fransa Prezidenti Fransua Ollanda başsağlığı verib.
Ölkə.Az-ın məlumatına görə, başsağlığında deyilir:
“Paris şəhərində törədilmiş amansız terror aktları nəticəsində çoxsaylı insan tələfatı və yaralananlar barədə xəbər bizi olduqca sarsıtdı.
Biz bu dəhşətli hadisədən son dərəcə hiddətlənir, terrorizmi qətiyyətlə pisləyir, onun bütün təzahürlərinə qarşı mübarizəni hər cür dəstəkləyirik.
Bu ağır anlarda biz Fransa xalqı ilə, Sizinləyik.
Baş vermiş bu faciə ilə əlaqədar Sizə, həlak olanların ailələrinə və yaxınlarına, bütün Fransa xalqına öz adımdan və Azərbaycan xalqı adından dərin hüznlə başsağlığı verir, yaralananlara şəfa diləyirəm”.
Ölkə.az
