Bu əlamətlər dəri xərçəngindən xəbər verir

Qeyri-adi xalları həkimə göstərmək lazımdır. Həmçinin xalların formasında, rəngində, ölçüsündə və toxumasında dəyişiklikləri izləmək vacibdir. Hər hansı dəyişiklik dəri xərçənginə işarə edə bilər.

"Ölkə.az" oxu.az-a istinadən xəbər verir ki, bu barədə Gazeta.ru-ya onkoloq, dermatoloq İqor Sinelnikov danışıb.

"Melanoma dəri xərçənginin əsas təhlükəsi erkən metastaz vermək, yəni digər toxuma və orqanlara yayılmaq qabiliyyətidir. Xərçəng vaxtında aşkar edilərsə, onu asanlıqla müalicə etmək olar. Erkən mərhələlərdə melanoma adi xala bənzəyir. Buna görə də bu törəmələrin vəziyyətini izləmək hamı üçün vacibdir, xüsusilə də onlar çoxdursa, qeyri-adi xallar varsa və ya qohumlar dəri xərçəngindən əziyyət çəkiblərsə. Asimmetrik xallar, kənarları qeyri-bərabər və ya qeyri-bircins rəngli törəmələr narahatlıq doğurmalıdır. Xalın toxumasının dəyişməsi və ya qanaxmanın meydana çıxması bədxassəli transformasiyaya işarə edə bilər. 5 mm-dən böyük xal və ya ölçüdə dinamika dermatoloqa və ya onkoloqa müraciət etmək üçün səbəbdir", - deyə həkim bildirib.

Dəri xərçənginin diaqnostikası üçün dermatoskop metodu - xərçəngin əlamətlərini görmək imkanı verən böyüdücü cihaz istifadə olunur. Əlavə olaraq, kompüter dermatoskopiyası halında xalların təhlili üçün süni intellekt istifadə edilə bilər. Həmçinin xalların şəkillərinə əsasən zamanla dəyişiklikləri izləmək üçün mobil tətbiqlər mövcuddur. Sinelnikov vurğulayıb ki, bunlar həkimlə üz-üzə məsləhətləşmənin vacibliyini aradan qaldırmır. Melanomanın təsdiqlənməsinin etalon metodu eksizion (total) biopsiyadır.