Ekologiyanı pozan şəxslər məmurlardır - Telman Qasımov

"Bu gün Azərbaycanda ekologiyanı pozanlar kimlərdir? Hansısa evdə kimsə suyu bir az çox işlədəndə, kranı açıq qoyanda, bir uşaq butulkanı yerə atanda ekologiya pozulmur. Azərbaycanda ekologiyanı pozan şəxslər məmurlardır".

Ölkə.Az xəbər verir ki, bunu politoloq Telman Qasımov Sosial Tədqiqatlar Mərkəzi və AMEA Fəlsəfə və Sosiologiya İnstitutunun birgə təşkilatçılığı ilə keçirilən ekologiya ilə bağlı dəyirmi masada çıxışı zamanı deyib.

"Gedib Binəqədi rayonuna baxın görün, məmurlar orada nə qədər zavod açıblar. O zavodlar görün, ekologiyanı nə qədər korlayırlar. Zavodlarda dəmir, kabel əridirlər. O zavodların ətrafı bütünlüklə yaşayış evləridir. 
Binəqədidə doğulan uşaqların əksəriyyəti xəstədir, raxitdir. Bunu kim edir? Siz, biz gedib Binəqədidə ekologiyanı kobud şəkildə pozan bir sex, zavod aça bilərikmi? Mümkün deyil. Ona görə də hər şey başdan başlanmalıdır. Bir nümunə olmalıdır. Ondan sonra biz evdə uşaqlara başa salmalıyıq ki, məsələn, plastik butulkaları küçəyə atmaq olmaz və s", - deyə o əlavə edib.

T.Qasımlının fikrinə əlavə edən tədbirin moderatoru Əziz Əlibəyli deyib ki, bunun özü elmi araşdırmanın obyektidir:

"Çünki insan davranışı, idarəetmədə hər hansı qərarlara təsir göstrən bu cür faktlar var.

İkinci bir məsələ də odur ki, Azərbaycanda dövlət rəhbərliyinin, Birinci vitse-prezident Mehriban Əliyeva və (IDEA) təsisçisi və sədri Leyla Əliyevanın yaşıllaşma üzərindən başlatdığı hərəkat çox önəmlidir" - o söyləyib.

Ölkə.Az