Azərbaycan onları xəyal qırıqlığına uğradacaq - Açıqlama
"Anti-Azərbaycan qüvvələrin və erməni lobbisinin əlində alət olan dairələrin Azərbaycanın təkcə əldə etdiyi qələbələri deyil, eyni zamanda qlobal və regional səviyyədə sülhün, sabitliyin, əməkdaşlığın təmin olunması, o cümlədən qlobal problemlərin həllinə töhfə vermək istiqamətindəki həyata keçirdiyi uğurlu siyasətə qarşı davamlı olaraq qərəzli münasibət bəsləyib kölgə salamaq niyyətinin çox şahidi olmuşuq. Son vaxtlarda isə həmin qüvvələrin ölkəmizin qlobal iqlim dəyişikliyinə töhfə verməsi istiqamətində həyata keçirdiyi uğurlu siyasətə və bu məqsədlə COP29 tədbirinə ev sahibliyi etməsini də həzm edə bilmədiyini və bu səbəbdən də, tədbirin beynəlxalq miqyasda əhəmiyyətinə kölgə salmaq məqsədilə Azərbaycana qarşı çirkin oyunların başlatdığını görürük. Bu məqsədlə həmin qüvvələr nəzarətlərində olan Avropa strukturlarından istifadə edərək Azərbaycana qarşı absurd və əsassız iddialarla bir təzyiq vasitəsi kimi istifadə etmək yolunu seçiblər. Fransanın, Ermənistanın və erməni lobbisinin əlində təzyiq aləti kimi istifadə edilən Avropa Parlamenti Azərbaycana qarşı qərəzi xüsusi ilə seçilir".
Bunu Ölkə.Az-a açıqlamasında deputat Məlahət İbrahimqızı deyib.
Deputat bildirib ki, Avropa Parlamentinin absurd iddialar və heç bir fakta söykənməyən faktlar əsasında Azərbaycanla bağlı qəbul etdiyi ölkəmiz üçün heç bir əhəmiyyət kəsb etməyən kağız parçası da bu qəbildəndir: "Bu qətnaməni Avropa Parlamentində dərin kök salmış korrupsiyanın və rüşvətxorluğun ağır fəsadları kimi qiymətləndirsək, hər halda, yanılmarıq. Fransanın, Ermənistanın və erməni lobbisinin yalan narrativləri üzərində qurulmuş bu qətnamə əslində əldə olunmuş maddi mənfəətin bir qarşılığıdır. Təəssüf ki, avropalı parlamentarilər hətta iqlim dəyişmələri kimi mühüm bir məsələni siyasiləşdirərək, Azərbaycana qarşı ittiham aləti kimi istifadə etməkdən belə çəkinmirlər.
Bir neçə kağız parçasında Azərbaycana qarşı saxta məlumatlara əsaslanan faktlar, absurd iddialar, ittihamlar, təhdid və tələblər irəli sürülür. Əslində bu sənəd ölkəmizin ərazi bütövlüyünə və suverenliyinə açıq şəkildə hörmətsizlik və daxili işlərimizə müdaxilə cəhddən başqa bir şey deyil. Bu sənəd əslində işğalı, sepratizmi, terroru və terrorçuları dəstəklədiyindən Ermənistandakı revanşist meyilləri gücləndirməklə Cənubi Qafqazda münaqişənin yenidən alovlandırılmasına xidmət edir. Avropa Parlamentinin qəbul etdiyi sənəd həm də şovinist, irqçi və müstəmləkəçi təfəkkürün göstricisidir. Bu bir daha onun sübut edir ki, Azərbaycan Prezidenti cənab İlham Əliyevin rəhbərliyi altında həyata keçirilən, ölkəmizin milli, suveren maraqlarına xidmət edən müstəqil siyasət bu qüvvələri ciddi narahat edir. Amma onlar bu amili də unudurlar ki, Azərbaycanla təzyiq və ultimatum dilində danışmaq olmaz. Bundan uduzan tərəf yenə də özləri və xüsusən də dəstəklədikləri Ermənistan olacaq. Azərbaycan indiyədək qarşsına qoyduğu bütün hədəflərə nail olub düşmənlərini məğlub və məyus etdiyi kimi, bundan sonra da düşmənlərini məyus edib xəyal qırıqlığına uğradacaq".
Mürtəza
Ölkə.Az
