Niyə "Facebook"da təhlükəsizliyin yoxlanılması məhz Paris terrorundan sonra tətbiq edildi?

Zukerberq təhlükəsizliyin yoxlanılmasının indi tətbiq edilməsinin səbəbini izah edib

Ölkə.Az xəbər verir ki, "Facebook" sosial şəbəkəsinin təsisçisi və icraçı direktoru Mark Zukerberq təhlükəsizliyin yoxlanılması funksiyasının Beyrutdakı partlayışlardan sonra yox, məhz Parisdə baş verən terror aktından sonra işə salınmasının səbəblərini açıqlayıb.

Yeni funksiya sayəsində istifadəçilər xəsarət almadıqları və təhlükəsiz şəraitdə olduqlarını bildirə bilirlər.

Zukerberq izah edib ki, bu yenilik yalnız təbii fəlakətlər üçün nəzərdə tutulsa da, insan faciələrinə də uyğunlaşdırılıb.

"Bu məsələ ilə bağlı müraciət edənlərə təşəkkür edirəm. Siz haqlısınız, dünyada bir çox mühüm münaqişələr var. Biz bütün insanların qayğısına eyni dərəcədə qalırıq və mümkün olduğu qədər insanlara müxtəlif vəziyyətlərdə yardım etmək üçün çalışacağıq", - deyə Zukerberq bildirib.

Qeyd edək ki, Beyrutda ötən həftə baş verən terror aktından sonra 40 nəfər ölüb, 180 nəfər isə ağır yaralanıb.

Fransanın paytaxtı Parisdə törədilən terror aktları nəticəsində 153 nəfər ölüb, azı 200 nəfər yaralanıb.

İŞİD terror təşkilatı Parisdə baş verən terror aktlarına görə məsuliyyəti öz üzərinə götürüb. İŞİD hücumları Suriya üçün "Vendetta" adlandırıb.

Rəşid Mustafazadə

Ölkə.Az