Demokratiya anlayışı güclərin əlində məkrli alətdir

"Azərbaycanın geosiyasi vəziyyəti, böyük dövlətlərin Azərbaycan marağı, bu maraqlar altındakı məkrli niyyətlər sanki özünün zirvəsinə çatmaqdadır. Bu məkrli niyyətlər hər zaman olub. Məhz bu məkrli niyyətlər ermənilərə rəvac verib ki, Azərbaycana qarşı işğalçılıq siyasəti yeritsinlər. Azərbaycana qarşı məkrli niyyətin mahiyyəti ondan ibarət olub ki, 30 il Azərbaycana ATƏT MQ vasitəsilə ümid verərək, işğal olunmuş torpaqlar sülh yolu ilə azad olunacaq. Yəni bu məkrli niyyətlər böyük dövlətlərin Qafqaz marağı və xüsusən də bunun içində xristian dünyasına daxil olmayan müsəlman ölkəsi olan Azərbaycana qarşı olan xüsusi bir xəttdir. Bu xəttə hansısa bir zaman kəsiyində baş verən hadisə kimi baxmaq olmaz. Mənfi və müsbət mənada tarixi təcrübəmiz var. Biz bu gün üz-üzə gəldiyimiz dövlətlərin yürütdüyü siyasətlə bir neçə il əvvəl Avropa Oyunları ərəfəsində də şahidi olduq".

Bunu Ölkə.Az-a açıqlamasında deputat Fəzail İbrahimli deyib.

Deputat əlavə edib ki, o zaman onlar niyyətlərini gizləmətə çalışırdılar və hadisələr gizlin baş verirdi. "Hadisələrin üzərinə açıq formada gedilmirdi. Bütün siyasi qüvvələr səfərbər olunmuşdu ki, Avropa Oyunlarını boykot etsinlər. Nəticə nə oldu? Azərbaycan bütün dünyaya bəyan etdi ki, biz bacarırıq. COP29 isə Azərbaycanın dünya səviyyəsində aparacı və ev sahibliyi edəcəyi növbəti bir mötəbər tədbirdir. Bu tədrib ilk növbədə Azərbaycanın deyil, BMT-nindir. Əgər BMT adlanan qurum varsa, ona hörmət varsa, BMT deyilən bir qurum beynəlxalq hüququn təminatçısıdırsa, o zaman bütün bunlar baş verə bilməzdi. Azərbaycan sadəcə olaraq tədbirə ev sahibliyi edir. Bu tədbir ötən il BƏƏ-də keçirilib bu il isə Azərbaycanda keçirilir. Növbəti ilə isə başqa bir ölkədə.

Bəs belə olan halda Azərbaycan niyə hədəf seçilir?

Digər tərəfən məsələni elə qoyurlar ki, guya Azərbaycan belə bir tədbirin keçirilməsinə layiq deyil. Əgər layiq deyildisə, niyə BMT-də bu məsələlər müzakirə olunanda dünya ölkələri yekdilliklə Azərbaycanın belə bir tədbiri keçirməyə layiq olduğuna razı olub səs verdilər. O zaman sual olunur ki, bu keçən müddətdə nə baş verdi. Dünya bir daha onun şahidi oldu ki, beynəlxalq hüquq beynəlxalq gücün ətəyində sürünür. Demokratiya anlayışı mürtəce güclərin əlində öz məkrli, çirkin niyyətlərini həyata keçirmək üçün bir alətdir. Ona görə də bu təkcə Azərbaycan qarşı deyil, digər ölkələrə qarşı həyata keçirilir. Biz bunun son zamanlarda Gürcüstan timsalında da şahidi olduq. Bu dövlətlər və qüvvələr hesab edirlər ki, onlar necə düşünürsə, gürcü də, azərbaycanlı da elə düşünməlidir. Amma bizim öz milli maraqlarımız və milli ruhumuz var, ona görə də öz siyasətimizi yürüdürük", - o qeyd edib.

Deputatın fikrincə, Gürcüstandakı parlament seçkiləri saxta demokratiyanı dünyaya sırımağa çalışan dövlətlərə, ələlxüsus da Avropaya qarşı ciddi yumruq oldu: "Necə oldu ki, xarici agentlər, LGBT haqqında qərar verməyənədək Gürcüstan dünyanın demokratik ölkəsi idi və bu ölkəyə külli miqdarda pul verirdilər. Ancaq gürcü xalqı iradəsini ortaya qoyub müstəqil yolunu seçmək düşüncəsi ilə hərəkət edən zaman gürcülər dünyanın qeyri-demokratik ölkəsi oldu. Odur ki, bu təkcə bizə qarşı deyil. Amma necə deyərlər, bizim əsgimiz tüstülüdür. Əgər gürcülər daxili problemi ilə bağlı məsələni həll etməyə çalışırdı. Ancaq Azərbaycanla bağlı məsələ tamam başqadır.

Azərbaycan işğala son qoyan ölkədir. Azərbaycan dünya tarixində böyük güclərin qarşısında dayanıb öz haqqını dünyaya sübut etməyi bacaran xalq və dövlətdir. Azərbaycan dünyanın mötəbər təşkilatı olan BMT-nin Ermənistanın işğalçılıq siyasətinə son verməsi ilə bağlı qəbul etdiyi 4 qətnaməni icra edən ölkədir. Azərbaycan özünü dünyaya milli maraqlarını qoruyan və kölə olmadığını sübut edən ölkədir.

Bir yumruq millət, xalq kimi vahid iradə nümayiş etdirib, iradəli, cəsarətli lider ətrafında birləşən müsəlman ökəsi olan Azərbaycanın bu uğurlarını Fransa, ABŞ və onların yedəyində gedən ölkələr heç cür həzm edə bimirlər. Ona görə də əllərinə fürsət düşən kimi Azərbaycana qarşı hücuma keçirək COP29-u boykot etməyə cəhd edirlər. Ancaq onların bu niyyətləri baş tutmayacaq və Azərbaycan COP29-u ən yüksək səviyyədə keçirməklə dünyaya bir daha sübut edəcək ki, verdiyim sözü yerinə yetirən ölkəyəm. Bu dövlətin cənab İlham Əliyev kimi uzaqgörən, müdrik, iradəli bir lideri var və hamı onun liderliyi ətrafında bir yumruq kimi birləşərək bütün çətinlikləri dəf edərək uğurlara imza atacaq. Bundan itirən yenə də böyük dövlətlərin havası ilə oynayan dövlətlərə, xüsusən də Ermənistana növbəti bir dərs vermiş olacaq".

Mürtəza
Ölkə.Az