"BakuBus"ın avtobusları damır?

"BakuBus MMC"nin şəhərə gətirdiyi yeni marşrut avtobuslarının damının su buraxdığı ortaya çıxıb.

Ölkə.az xəbər verir ki, bu haqda öz "Facebook" profilində tanınmış yazıçı-jurnalist Azər Qismət yazıb.

"BakuBus MMC"yə məxsus 3 saylı marşrutun yağışdan sonra içərisinin gölməçə olduğu jurnalist tərəfindən yayılmış fotolarda aydın görünür. Jurnalistin paylaşdığı şəkillərdə "BakuBus" avtobusunun döşəməsində və oturacaqlarının üzərində yığılmış su aydın görünür.

Jurnalistin yazdığı statusu olduğu kimi sizə təqdim edirik:

"BakuBus-un 3 saylı marşrut avtobusu damır. Səhər bu mənzərə ilə rastlaşanda bir az duruxdum, amma gördüm damıb. Bəlkə də avtobus yuyulanda suyun təzyiqi yuxarı olub. Hər şey ola bilər. BakuBus-un əhaliyə xidmət göstərməsi yüksək səviyyədədir. Bu avtobusları paytaxtımızda görəndə və ondan istifadə edəndə adam özünü adam kimi hiss edir. Adama elə gəlir ki, Avropanın hansısa şəhərindəsən. Belə problemləri aradan qaldırsalar yaxşı olar. Bir məsələni də qeyd edim. BakuBus-un Hövsandakı bazasında birazdan avtobuslar yağışın, qarın altında qalmasalar yaxşıdır, çünki bu günə qədər həmin dayanacağın üstü örtülməyib. İnşasına başlansa xeyrini hamı görər və uzun illər bu avtobuslardan istifadə edərik".

Ölkə.az