2 Fransa təyyarəsində bomba həyəcanı

Təyyarələrdəki sərnişinlərə suallar verilib, bütün yüklər tək-tək yoxlanılıb

ABŞ-ın fərqli şəhərlərindən Fransanın paytaxtı Parisə getmək üçün havaya qalxan "Air France"-a aid 2 sərnişin təyyarəsi, bomba həyəcanına görə fərqli hava limanlarına eniş etməli olub.

Bizimyol.info xəbər verir ki, Los-Angelesdən Parisə uçan təyyarə Salt-Lake City-ə, Vaşinqtonun "Dulles" hava limanından havaya qalxan təyyarə isə Kanadanın Halifax şəhərinə təcili eniş edib.

"Air France"-nın səlahiyyətli nümayəndəsi Christophe Paumierin verdiyi məlumata görə, təyyarələr havaya qalxdıqdan sonra naməlum şəxslər telefonla əlaqə yaradaraq təyyarədə bombanın olduğunu deyib. Paumier bildirib ki, fərqli hava limanlarına eniş edən təyyarələrdə FBI (Federal Təhqiqatlar Bürosu) əməkdaşları və hava limanı polisləri saatlarla axtarış aparıblar.

Təyyarələrdəki sərnişinlərə suallar verilib, bütün yüklər tək-tək yoxlanılıb. Təyyarələrdə hələ ki, bombanın tapılmadığı bildirilir.

Qeyd edık ki, "Air France"-nın Salt Lake City-ə yönləndirilən təyyarəsində 497, Halifax şəhərinə enən təyyarəsində isə 298 sərnişinin olduğu bildirilir.

Ölkə.Az